Yocwa 19

Lobo ma kipoko bot jo pa Cimeon

1Kwir ma kibolo me aryone opoto ikom Cimeon, pi kaka pa jo pa Cimeon ma oporo dogolagi; lobogi obedo i dye lobo ma kimiyo bot jo me kaka pa Juda. 21 Lobo pa jo pa Cimeon okwako taun magi: Beer-ceba, Ceba, Molada, 3Kajar-cual, Bala, Ejem, 4Eltolad, Betul, Korma, 5Jiklag, Bet-markabot, Kajar-cuca, 6Bet-lebaot ki Caruken, taun madito apar wiye adek ki taun matino ma ingetgi. 7Ain, Rimmon, Eter, ki Acan, taun madito angwen ki taun matino ma ingetgi. 8Magi ducu kacel ki lwak taun ducu ma orumu nget taun madito nio wa Baalat-beer, ma kilwongo bene ni Rama me Negeb. Meno aye obedo lobo pa jo pa Cimeon ma oporo dogolagi. 9Lobo pa jo pa Cimeon obedo dul lobo ma kipoko ki ikom lobo pa jo pa Juda; onongo dul lobo ma kipoko bot jo pa Juda obedo lac mada ma obwoyo komgi woko, ma omiyo jo pa Cimeon gulimo lobogi i dyegi.

Lobo ma kipoko bot jo pa Jabulon

10Kwir ma kibolo me adeke opoto ikom kaka pa jo pa Jabulon ma oporo dogolagi ducu, ci lobo ma guleyo oo wa i Carid. 11Ki kunu wang lobogi owoto tung kupotoceng oo wa i Mareal, ka ogudu kwede Dabecet ki nota ora matye tung kunyango me Jokneam. 12Cake ki i Carid bene wang lobone mukene mukemo kunyango ma tung kunyango ocito oo wa iwang lobo me Kiclot Tabor, 13ka ocito kwede wa Dabera, ka oo i Japia. Ka oa ki kunu okato tung kunyango oo kwede Gat-keper ki Etkajin, ka ocito Rimmon ci oloke odok Nea. 14Wang lobo ki tung kumalo ogom woko ocito Kanaton ci ogik i nota Iptakel. 15Mede ikom meno gubedo ki taun madito magi: Katat, Nakalal, Cimron, Idala ki Beterekem; taun madito apar wiye aryo ki taun matino ma ingetgi. 16Meno aye lobo pa jo Jabulon ma oporo dogolagi, taun madito ki taun matino ma ingetgi.

Lobo ma kipoko bot jo pa Icakar

17Kwir ma kibolo me angwene opoto ikom Icakar pi kaka pa jo pa Icakar ma oporo dogolagi. 18I lobogi onongo tye iye taun magi: Jejreel, Keculot, Cunem, 19Kaparaim, Sion, Anakarat, 20Rabit, Kicion, Ebej, 21Remet, En-ganim, En-kada, Bet-pajej. 22Wang lobogi ogudu Tabor bene, Cakajuma ki Bet-cemec, ci ogik i kulu Jordan. Taun magi madito ducu obedo apar wiye abicel, ki taun matino ma ingetgi. 23Meno aye lobo pa jo Icakar ma oporo dogolagi, taun magi madito ki taun matino ma ingetgi.

Lobo ma kipoko bot jo pa Acer

24Kwir ma kibolo me abice opoto ikom kaka pa jo pa Acer ma oporo dogolagi. 25Lobogi onongo tye iye taun magi:

Kelkat, Kali, Beten, Akicap, 26Alam melek, Amad ki Mical. Wang lobogi ogudu Karmel tung kupotoceng, ki Cikor-libnat. 27Kikenyo oloke odok tung kunyango ocito Bet-dagon, ci ogudu lobo pa jo Jabulon ki nota Iptakel tung kumalo i Bet-emek ki Neiel. Wang lobo ma tung kumalo ocito Kabul, 28Ebron, Rekob, Kamon ki Kana ci oo wa i Cidon Madite. 29Kikenyo wang lobo oloke ocito Rama oo kwede Turo ma kicelo ki cel gogoni, ci oloke ocito Koca ka ogik i dog Nam Mediterranean. Taun gi mukene obedo Makalab, 30Umma, Apek ki Rekob, ducu taun madito pyere aryo wiye aryo ki taun matino ma ingetgi. 31Meno aye lobo pa jo pa Acer ma oporo dogolagi, taun gi madito magi ki taun matino ma ingetgi.

Lobo ma kipoko bot jo pa Naputali

32Kwir ma kibolo me abicel opoto ikom kaka pa jo pa Naputali ma oporo dogolagi. 33Wang lobogi ocake i Kelep ite yat kworo ma i Jaananim owok ki i Adami-nekeb ki Jabneel, ocito wa i Lakun ka ogik kwede i kulu Jordan. 34Ki kunu wang lobo oloke okemo tung kupotoceng ocito Ajinot-tabor, oa ki kunu ocito Kukok; kumeno ogudu lobo pa jo pa Jabulon tung kupiny, lobo pa jo pa Acer tung kupotoceng ki kulu Jordan tung kunyango. 35Taun gi madito ma kicelo ki cel gogo obedo Jidim, Jer, Kammat, Rakat, Kineret, 36Adama, Rama, Kajor, 37Kedec, Edrei, En-kajor, 38Yiron, Migdalel, Korem, Bet-anat ki Bet-cemec: Taun gi madito ducu obedo apar wiye abongwen ki taun matino ma ingetgi. 39Meno aye lobo pa jo Naputali ma oporo dogolagi, taun gi madito kacel ki taun gi matino ma ingetgi.

Lobo ma kipoko bot jo pa Dan

40Kwir, ma kibolo me abiro opoto ikom kaka pa jo pa Dan ma oporo dogolagi. 41I lobo me ginaleyagi onongo tye iye taun madito magi: Jora, Ectaol, Ir-cemec, 42Caalahin, Aijalon, Itla, 43Elon, Timna, Ekron, 44Elteke, Gibeton, Baalat, 45Jekud, Bene-barak, Gat-rimmon, 46Mejarkon ki Rakon ki lobo ma inyim Jopa. 472Ento ka lobo pa jo pa Dan orwenyo woko ki i cinggi pien camone oloyogi, ci gucito gulwenyo ikom taun madit mo ma nyinge Lecem, gumayo dok guneko dano ma gibedo iye woko ducu ki pala lucwan, ka guloko taun madit meno odoko meggi, ci gucako bedo iye. Guloko nying Lecem gucako ni, Dan macalo nying kwarogi Dan. 48Meno aye lobo pa jo pa Dan ma oporo dogolagi, taun gi madito magi ki taun gi matino ma ingetgi.

Lobo ma kimiyo bot Yocwa

49Ka dong gutyeko poko lobo i dul mapatpat me bedo lobogi, ci jo Icrael gumiyo dul lobo mo bot Yocwa wod pa Nun me bedo ginaleyane ikin gi. 50Gumiyo bote taun madito ma en olego ki botgi kit ma Rwot ocikogi kwede, en aye Timnat-cera ma i lobo godi pa jo pa Epraim. En dok ogero gange odoco ci obedo iye.

51Meno aye lobo ma ajwaka Eleajar ki Yocwa ki ludito kaka ma i odi pa kwarogi gupoko bot jo Icrael i Cilo inyim Rwot i dogola Kema me Rwate kun kibolo iye kwir; ci gutyeko poko lobo kitmeno.