Yocwa 18

Lobo ma kipoko ki i Cilo

1Lacen jo Icrael gucoke i Cilo, ci guguru Kema me Rwate kunu. Onongo dong gutyeko loyo lobo woko ducu, 2ento pud odong kaka abiro ma peya kipoko dul lobo mo botgi me aleyagi.

3Ma omiyo Yocwa owaco bot jo Icrael ni, “Wubibedo kajunge nio kwede wa awene ma pe wucito kacamo lobo ma Rwot Lubanga pa kwarowu dong omiyo botwuni? 4Wukwany dano adek ki i kaka acel acel wek gucit guwire i loboni ducu, guco lok ikome kun gipo ni bibedo lobo me ginaleya pa kakagi, ka dok gudwog bota. 5Myero kipok lobo i dul abiro, kun nongo jo Juda pud bimede ki bedo i lobogi ma tung kupiny, ki jo pa Yucepu bene bibedo i meggi ma tung kumalo. 6Wubicoyo lok ikom lobo kun wunyutu kit ma lobone tye kwede ikom lobo abironu ducu, ci wukel gin ma wucoyoni bota, ci abibolo kwir pirwu kany inyim Rwot Lubangawa. 7Jo pa Levi pe bilimo dul lobo mo ikinwu, pien ginaleyagi aye ticgi me bedo ajwaki pa Rwot; dok jo Gad, jo Reuben ki nucu kaka pa Manace gutyeko limo lobogi loka Jordan tung kunyango, ma Moses latic pa Rwot omiyo botgi.”

8Jo meno ma gucito kacoyo lok ikom lobo gucako wotgi, ci Yocwa ocikogi kun waco ni, “Wucit wuwot wurum lobo kaweng kun wucoyo kit ma loboni tye kwede ducu, ka wudwog bota; ci abibolo kwir pirwu kany i Cilo ki inyim Rwot.” 9Ci jonu gucito kawot i lobonu, kun gicoyo lok ikom taun acel acel i buk malubu dul lobo abiro ma gupoko iye. Lacen gudwogo bot Yocwa i gony ma i Cilo. 10Ci Yocwa obolo kwir pirgi i Cilo ki inyim Rwot. Opoko lobo bot jo Icrael ki kunu, kun kaka acel acel limo dul lobone.

Lobo ma kipoko bot jo pa Benjamin

11Dul lobo ma kwir okwanyo pi kaka pa Benjamin ma oporo dogolagi obedo kit man: lobo ma kimiyo botgi obedo ikin lobo me kaka pa Juda ki me kaka pa Yucepu. 12Ki tung kumalo wang lobogi ocake ikom kulu Jordan, ka ocito malo wa i kor got ma inget Jeriko tung kumalo, ka ocito kwede obaro kin lobo godi ma tung kupotoceng, ka ogik kwede i tim me Bet-aven. 13Ki kunu wang lobogi ocito tung kupiny kun kemo Luj nio wa i kor got ma inget Luj (en aye Betel), ka dong ocito Atarot-adar, kun wok ki iwi got matye inget Bet-koron Mapiny tung kupiny. 14Ka dok wang lobo oloke omano nge got ma okemo Bet-koron tung kupiny kun kato ki inget got cito kemo tung kupiny nio kwede i Kiriat-baal, ma en aye Kiriat-jearim, ma taun madit pa kaka pa Juda. Meno aye wang lobo ma tung kupotoceng. 15Ki tung kupiny wang lobo ocake ki i agiki gang Kiriat-jearim ocito kwede tung piny nio iwang pii me Neputoa; 16ka dok ocito iwang agiki got ma okemo nota pa wod pa Kinom matye i agiki nota me Repaim tung kumalo. Ka dok ocito piny kun lubu nota pa Kinom ma inget kor got pa jo Jebuc tung kupiny nio kwede En-rogel. 17Ka dok oloke odok tung kumalo wa i En-cemec. Ki kunu dok ocito Gelilot ma inyim kor got kama ki ito iye malo i Adumim; ka dok cito i got ma Boan wod pa Reuben ocibo, 18ka okato kwede ocito tung kumalo ma orabo kwede kor got me Bet-araba, ocito wa i Araba. 19Ka dok orabo nget kor got me Bet-kogla kun wok tung kumalo, ocito ogik i jang Nam me Kado ma i but nam tung kumalo kama kulu Jordan donyo ki iye. Meno aye wang lobo tung kupiny. 20Kulu Jordan aye obedo wang lobogi tung kunyango. Meno aye lobo pa jo pa Benjamin ma oporo dogolagi, ki wang lobo ducu ma okwako lobogi.

21Taun madito pa jo pa Benjamin ma oporo dogolagi gin ene; Jeriko, Bet-kogla, Emek-kejij, 22Bet-araba. Jemaraim, Betel, 23Avim, Para, Opra, 24Kepar-ammoni, Opni, Geba, gin ducu taun madito apar wiye aryo ki taun matino ma ingetgi.

25Gibeon, Rama, Beerot, 26Mijpe, Kepira, Moja, 27Rekem, Irpeel, Tarala, 28Jela, Elep, Jebuc, ma en aye Jerucalem, Gibea ki Kiriat-jearim, taun madito apar wiye angwen ki taun matino ma ingetgi. Meno aye lobo pa jo pa Benjamin ma oporo dogolagi ducu.