Yocwa 17

Jo pa Manace ma tung kupotoceng

1Dok kibolo kwir me poko dul lobo pa jo pa Manace, pien en aye latin kayo pa Yucepu. Yam onongo kimiyo Gilead ki Bacan bot Makir won Gilead, latin kayo pa Manace, pien onongo en lalweny. 2Ka dok kibolo kwir pi poko lobo bot jo me kaka pa Manace ma pud odong ma oporo dogolagi ducu, dogola pa Abiejer, Kelek, Aciriel, Cekem, Keper ki Cemida; gin aye likwayo ma co pa Manace wod pa Yucepu.

3Jelopekad wod pa Keper onywalo anyira keken, awobene onongo pe. Nying anyirane Makala, Noa, Kogla, Milka ki Tirja. 41Gin gubino inyim ajwaka Eleajar ki Yocwa wod pa Nun, ci guwaco ni, “Rwot yam ociko Moses ni myero kimii lobo botwa kacel ki utmegiwa.” Ma omiyo Yocwa omiyogi lobo kacel ki omegi won gi, kit ma Rwot onongo ocikoni. 5Kitmeno jo pa Manace gugamo dul lobo apar medo ikom Gilead ki Bacan ma loka Jordan tung kunyango, 6pien anyira pa Manace bene dok gulimo lobo kacel ki awobene. Lobo Gilead onongo dong ki miyo bot likwayo mukene pa Manace.

7Wang lobo pa jo Manace ocake ki i Acer ocito kwede Mikmetat matye tung kunyango me Cekem. Ka dok ocito tung kupiny nio kwede En-tapua. 8Lobo Tapua obedo bot jo pa Manace, ento taun Tapua kikome ma iwang lobo pa jo pa Manace onongo kimiyo bot jo Epraim. 9Wang lobo dok ocito wa i nota ora Kana. Taun madito matye kunu inget kulunu tung kupiny kimiyogi bot jo pa Epraim, kadi bed gitye i ite loc pa jo pa Manace. Wang lobo pa jo pa Manace orabo nget kulunu tung kumalo ocito kwede i Nam Mediterranean. 10Lobo ma tung kupiny obedo pa jo pa Epraim ki lobo ma tung kumalo obedo pa jo Manace, kun Nam Mediterranean aye obedo wang lobogi tung kupotoceng. Lobo pa jo pa Manace orwate ki lobo pa jo Acer tung kumalo, ki tung kunyango orwate ki lobo pa jo Icakar. 11Ento i lobo pa jo Icakar ki jo Acer, jo pa Manace gubedo ki taun magi: Bet-cean ki taun matino ma ingete, ki Ibleam ki taun matino ma ingete; kimiyogi bene dano ma gibedo i Dor ki En-dor ki i taun matino ma ingetgi, ki dano ma gibedo i Taanak ki Megiddo ki i taun matino ma ingetgi. (Me adeke obedo Napat). 122Ento gamo taun madito meno wek oloke odok meggi oloyo jo pa Manace woko; ci jo Kanaan gucere gumedo ki bedo i lobo kunu. 13Ento lacen ka jo Icrael gudoko tek, guketogi i tic muroni, pe guryemogi woko ducu liweng.

14Kaka pa Yucepu guloko bot Yocwa kun giwaco ni, “Pingo imiyo kibolo kwir pirwa tyen acel keken, ma omiyo walimo dul lobo acel keken me bedo ginaleyawa? Wan watye ki lwak dano madwong mada, macalo Rwot dong obedo kamiyowa gum nio wa onyo.” 15Yocwa ogamo ni, “Ka wutye ki lwak dano mapol, ci wucit i bunga wujwer dul lobo mo ma i lobo pa jo Perej ki jo Repaim, kit macalo lobo godi pa jo pa Epraim pe romo wuni.” 16Ento jo me kaka pa Yucepu gugamo ni, “Lobo godi pe biromowa; dok bene jo Kanaan ma gibedo i bar gitye ki gadigadi nyonyo me lweny, gin jo ma gibedo i Bet-cean ki i taun matino ma ingete ki gin ma gibedo i nota me Jejreel bene.” 17Yocwa dok owaco bot likwayo pa Yucepu, jo pa Epraim ki jo pa Manace ni, “Wun wutye ki lwak dano madwong mada, dok wutye ki tek madwong bene; pieno pe wubibedo ki dul lobo acel keken. 18Lobo godi aye bibedo mewu, kadi obedo bunga; wubijwero woko wucamo doko mewu nio kwede wa i agiki wang lobo; pien wubiryemo jo Kanaan woko, kadi bed gitye ki gadigadi nyonyo me lweny, dok kadi bed gin jo matego.”