Yocwa 16

Lobo ma kipoko bot jo pa Epraim ki jo pa Manace

1Wang lobo pa likwayo pa Yucepu ma kipoko ki bolo kwir ocake ki i kulu Jordan inget Jeriko, oweko pii me Jeriko odong tung kunyango, ocito tung tim, kun oa ki i Jeriko cito wa i lobo godi me Betel. 2Oa ki i Betel ocito Luj, ka okato ocito Atarot ma i lobo pa jo Arki; 3ka dok okato kwede tung piny ma tung kupotoceng, i lobo pa jo Japuleti, oo i lobo ma inget Bet-koron Mapiny, ocito Gejer, ka ogik kwede i Nam Mediterranean. 4Meno aye obedo lobo pa likwayo pa Yucepu, jo pa Manace ki jo pa Epraim.

Lobo pa jo pa Epraim

5Lobo pa jo pa Epraim ma oporo dogolagi obedo kit man: wang lobogi ma tung kunyango ocake i Atarot-adar ocito kwede i Bet-koron Mamalo. 6Oa ki kunu okemo tung Nam Mediterranean, oo i Mikmetat tung kumalo; ka dok oloke okemo Taanat-eilo tung kunyango, orabo ngete okato kun weko Janea bene tung kunyango. 7Ka dok oa ki inget Janoa ocito Atarot ki Naara, ogudu Jeriko, ocito ogik kwede i kulu Jordan 8Wang lobo dok ocake ki Tapua okemo tung kupotoceng o kwede i nota ora ma nyinge Kana ka ogik kwede i Nam Mediterranean. Meno aye lobo pa jo Epraim ma oporo wel dogolagi, 9kacel ki taun ki gangi mogo ma kikoyo pi jo Epraim i dye lobo pa jo Manace, taun meno ducu ki gangi ma ingetgi. 101Ento jo Epraim pe guryemo jo Kanaan woko ma gibedo i Gejer, ma omiyo jo Kanaan gibedo i dye jo Epraim nio wa onyo, ento gudoko opiigi me tiyo tic matek.