Yocwa 14

Poko lobo matung kupotoceng me Jordan

1Magi aye lobo ma jo Icrael gulimo ki i lobo Kanaan, ma jo magi aye gupoko botgi: ajwaka Eleajar, Yocwa wod pa Nun ki ludito kaka ma i odi pa kwarogi. 21 Gupoko lobo me ginaleyagi ki bolo kwir kit mayam Rwot ociko ki Moses ni myero kipok kwede bot kaka abongwen ki nucu ma odongi. 32Moses onongo yam opoko lobo aleya bot kaka aryo ki nucu ki i loka Jordan. Jo Levi keken aye pe kimiyo botgi lobo mo me aleyagi. 4Likwayo pa Yucepu onongo gupoke i kaka aryo, jo Manace ki jo Epraim; ento pe kimiyo dul lobo mo bot jo Levi me aleyagi; kimiyogi taun madito me bedogi keken ki olet me kwayo dyangigi ki limgi mukene makwo. 5Jo Icrael gupoko lobo ikin gi kun gitiyo kit ma onongo Rwot ociko ki Moses.

Kimiyo Kebron bot Kaleb

63

Ikare meno jo pa Juda gubino bot Yocwa i Gilgal, ci Kaleb wod pe Jepune ma jo Keniji owaco bote ni, “In ingeyo gin mayam Rwot ociko bot Moses ma dano pa Lubangani, ma ociko ki i Kadec-barnea, lok ma dok ikomi ki ikoma. 74Onongo dong mwaka me dita romo pyere angwen ikare ma Moses latic pa Lubanga ocwala ki i Kadec-barnea pi roto lobo, ci adwogo ki lok kit mayam tye kwede i cwinya. 8Utmegiwa mayam gucito kwedani gumiyo cwiny lwak ongabe angaba, ento an yam alubu gin ma Rwot Lubangana mito ducu kikore. 95Moses okwongo kwong inino meno kun waco ni, ‘Adada, lobo mayam i nyono ki tyeni bibedo ginaleyani ki pa likwayi matwal, pien ibedo kalubu gin ma Rwot Lubangana omito ki cwinyi ducu.’ 10Kombedi nen ka Rwot pud ogwoka atye makwo wa onyo kit mayam owaconi, dong odoko mwaka pyere angwen wiye abic nia kwede wa ikare ca ma Rwot owaco iye lok man bot Moses, ma onongo jo Icrael pud gitye kawire i tim kuca; kombedi dong inen, mwaka me dita dong oromo pyere aboro wiye abic. 11Ento koma pud tek wa ikare man marom ki ikare mayam Moses ocwala kwede ca; i kareni tek koma pud rom ki tek koma macon ca, pud aromo lweny, aromo cito ka moni ci adwogo bene. 12Pieno miya loboni ma obedo lobo godi, mayam Rwot owaco pire ikare ca. Yam iwinyo ikare meno ni jo Anak gitye kunu kun gitye ki cog taun madito ma kirumugi woko ki cel matego; ka gwok nyo Rwot bibedo kweda ci abiryemogi woko kit macalo Rwot yam owaco.”

13Ci Yocwa olamo gum ikome, ci omiyo Kebron bot Kaleb wod pa Jepune wek obed ginaleyane. 14Kitmeno Kebron odoko lobo pa likwayo pa Kaleb wod pa Jepune ma jo Keniji nio wa onyo, pien obedo kalubu gin ma Rwot Lubanga pa Icrael mito ducu kikore. 15Nying Kebron okwongo bedo Kiriat-arba. (Arba yam obedo dano madit makato ducu ki ikin jo Anak.)

Ci lobo dong oywe, lweny obedo peke.