Yocwa 13

Lobo ma odong ma peya kiloyo

1Ikare ma Yocwa dong otii woko, ma mwaka me dite dong dwong, Rwot owaco bote ni, “In dong itii woko ma mwaka me diti dong dwong, ento pud lobo odong mabup ma myero obed mewu. 2Magi aye nying lobo ma pud gudong: lobo pa jo Piliciti ducu ki bere, ki lobo pa jo Gecur ducu. 3(Lobo meno ducu kikwano ni pa jo Kanaan, cake wa i Cikor ma inget Ejipt tung kunyango dok kwede i tung malo wa iwang lobo me Ekron; matye ite loc pa rwodi abic pa jo Piliciti, rwodi me Gaja, Acidod, Acikelon, Gat ki Ekron.) Pud odong lobo ducu pa jo Ayim bene matye 4tung kupiny; ka dok lobo ducu pa jo Kanaan cake ki i Me-ara pa jo Cidon cito kwede wa i Apek ma iwang lobo pa jo Amor; 5ki lobo pa jo Gebal, ki Lebanon ducu ma tung kunyango, cake ki i Baal-gad ma ite got Kermon nio kwede i yoo madonyo i Kamat. 61Rwot Lubanga owaco kuman ni an kikoma aye abiryemogi woko ki inyim jo Icrael, gin aye jo ducu ma gibedo i lobo godi, cake ki i Lebanon nio kwede i Micrepot-maim, ma gin en aye jo Cidon ducu. Ci in aye i pok loboni bot jo Icrael kun i bolo kwir wek obed lobogi, kit mayam aciki kwedeni. 7Kombedi dong i pok lobo man obed me ginaleya pa kaka abongwen mudong ki pa nucu kaka pa Manace.”

Poko lobo loka Jordan ma tung kunyango

82

Nucu kaka mukene pa jo Manace, kacel ki jo pa Reuben ki jo pa Gad onongo dong gutyeko gamo lobogi ki i loka Jordan tung kunyango, kit macalo Moses latic pa Rwot omiyo botgi, 9cake ki i Aroer matye i dog nota me kulu Arnon ki taun madit matye i dye notanu, kacel ki abami me Medema nio wa i Dibon; 10ki taun madito ducu pa Cikon rwot pa jo Amor mayam obedo kaloc i Kecbon nio kwede iwang apoki lobo pa jo Ammon; 11ki lobo Gilead bene, ki lobo pa jo Gecur ki jo Maaka, got Kermon ducu, ki lobo Bacan ducu nio wa i Caleka; 12ki ker ducu pa Og ma gang kale yam gubedo Acitarot ki Edrei i lobo Bacan. En kene aye yam odong ki ikin jo Repaim; rwodi aryonu Moses oloyogi, ci oryemogi woko. 13Ento jo Icrael pe guryemo jo Gecur ki jo Maaka; jo Gecur ki jo Maaka pud gibedo i dye jo Icrael nio wa onyo. 143

Kaka pa Levi keken aye Moses pe omiyo botgi lobo mo me aleya; gityer ma kiwango ki mac bot Rwot Lubanga pa Icrael aye gubedo ma ka lobogi, kit ma Rwot yam owaco boteni.

Kaka pa Reuben

15Moses yam omiyo lobo bot kaka pa jo pa Reuben ma oporo dogolagi ducu. 16Pieno wang lobogi ocake ki i Aroer matye i dog nota kulu Arnon, ki taun madit matye i dye notanu, okwako lobo matye apyelapyel ducu ma orabo nget Medeba; 17kacel ki Kecbon ki taun ducu ma guryeyo wi abami kunu, Dibon, Bamot-Baal, Bet-baalmeon, 18Jakaj, Kedemot, Mepat, 19Kiriataim, Cibma, Jeret-cakar ma kigero iwi got ma i dye nota, 20Bet-peor, apyel got Piciga, ki Bet-jecimot, 21meno aye taun ducu ma gitye iwi apyel, ki ker ducu pa Cikon rwot pa jo Amor ma gang kale yam tye i Kecbon, mayam Moses olwenyo kwede oloyo woko, kacel ki ludito pa jo Midian ma gubedo i lobonu ite loc pa Cikon; nyinggi aye Eyi, Rekem, Jur, Kur ki Reba. 22Balaam wod pa Beor bene, ma latyet, obedo ikin jo ma jo Icrael gunekogi ki pala lucwan. 23Kulu Jordan obedo wang lobo pa jo Reuben. Meno aye obedo lobo pa jo pa Reuben ma oporo wel dogolagi, meno aye taun gi madito ki taun matino ma ingetgi.

Kaka pa Gad

24Moses omiyo lobo bot jo pa Gad bene ma oporo wel dogolagi. 25Lobogi obedo Jajer ki taun madito me lobo Gilead ducu, ki nucu lobo pa jo Ammon nio wa i Aroer matye inget Raba, tung kunyango. 26Cake ki i Kecbon cito kwede wa i Ramat-mijpe ki Betonim, dok cake ki i Makanaim cito kwede iwang lobo me Lo-debar, 27kacel ki Bet-aram, Bet-nimra, Cukot ki Japon, taun madito ma i nota, en aye lobo mudong ki ikom ker pa Cikon rwot me Kecbon. Wang lobogi obedo kulu Jordan ocito kwede wa i but nam me Kineret tung kumalo, loka Jordan ma dok tung kunyango. 28Meno aye obedo lobo ginaleya pa jo pa Gad ma oporo wel dogolagi, meno aye taun gi madito ki taun gi matino ma ingetgi.

Nucu kaka pa Manace

29Moses omiyo lobo bot nucu kaka pa Manace bene; en opoko bot nucu kaka pa Manace ma oporo wel dogolagi. 30Lobogi ocake ki i Makanaim, okwako lobo Bacan ducu, en aye ker pa Og rwot me Bacan ducu liweng, ki gangi me Jair ducu ma gitye i Bacan, gangi pyere abicel, 31ki nucu lobo Gilead, kacel ki Acitarot ki Edrei ma gin aye gangkal pa Og i lobo Bacan. Meno ducu kipoko bot jo pa Makir wod pa Manace, pi nucu kaka pa jo Makir ma oporo wel dogolagi.

32Meno aye lobo mayam Moses opoko i lobo aroo me Moab ma loka Jordan tung kunyango mukemo Jeriko. 334Ento ki tung bot jo Levi, Moses pe omiyogi lobo mo; onongo Rwot Lubangagi aye obedo ginaleyagi, kit mayam owaco botgini.