Yakobo 4:8

Mako Larem ki lobo

1Gin ango makelo daa, ki gin ango makelo lweny ikinwu? Pe par ma wutye kwede aye tye kalweny i dul komwu? 2Wumito wunong jami, ento pe wunongo, ci wucako neko dano. Dok wuparo jami pa jo mukene, ento pe wunongo, ka dong wuero daa ki lweny. Pe wunongo gin ma wumito, pien pe wulego. 3Wulego ento pe wunongo, pien wulego marac, wulego ni wunong wek wutii kwede me cobo mitiwu keken. 4Wun jo ma pe wugene. Pe wungeyo ni mako larem ki lobo miyo dano doko lakwor pa Lubanga? Pimeno, ngat ma mito mako larem ki lobo loke kene doko lakwor pa Lubanga. 5Nyo wutamo ni, lok mayam kicoyoni obedo lok ma tere pe ni, “En tye ki par madwong tutwal ki nyeko ikom cwiny mayam en oketo ni obed i iwa?” 61 Ento en mede ki miyo kicane; pimeno, lok mayam kicoyo waco ni, “Lubanga dag jo ma wake, ento miyo kica bot jo mamwol.” 7Pimeno, wumiine kenwu me bedo ite loc pa Lubanga. Wulweny matek ki Catan, ci en biringowu woko. 8Wunyik cok bot Lubanga, ci en bene binyiko cok botwu. Wulwok cingwu woko, wun lubalo, ka dong wulony cwinywu obed maleng, wun jo ma tamwu tye aryo. 9Cwinywu myero owang, wukum, wukok bene. Nyerowu myero oloke odok kumu, ki yomcwiny ma wutye kwede oloke odok can. 10Wumwole kenwu inyim Rwot, ci en bitingowu malo.

Ngolo kop ikom dano mukene

11Utmegina, pe wulok lok mo marac kun ngat acel acel loko ikom lawote. Ngat ma loko lok marac ikom lawote, nyo ngolo kop ikom lawote, nongo oloko lok marac ikom cik, nongo dong bene ongolokop ikom cik. Ento ka in ingolo kop ikom cik, in dong pe lacob cik ento idoko langolkop. 12Lamii cik ki langolkop tye acel, en twero larowu ki nekowu. In anga mono ma ingolo kop ikom lawotini?

Cik ikom wake

13Kong wuwiny loka, wun ma wuwaco ni, “Tin nyo diki wabicito i taun munyo, wabityeko kunu mwaka acel kun wacato wil dok wanongo magoba,” 14kun kono pe wungeyo lok ma bitime diki. Kwowu tye ningning? Wun wubedo calo lupuu manen pi kare manok mo keken, ci lacen ke woko. 15Ma ka loko lok kitmeno, onongo myero wuwac ni, “Ka Rwot oye, wabibedo kwo, wabitimo man nyo maca.” 16Ento wun lunyate, dok wuwake bene. Lakit wake macalo meno ducu rac. 17Ngat ma ngeyo gin ma atir ma myero etim, ce pe otimo, nongo dong otimo bal.