Yakobo 3

Gwoko lebi

1Utmegina, pe myero jo mapol ikinwu gudok lupwony, pien wungeyo ni wan lupwony kibingolo kop mapek iwiwa makato jo mukene. 2Wan ducu ngat acel acel timo lwak roc mapol, ento kace inen ngat mo pe roco i gin ma en loko, ci danoni nongo dano maber tutwal, twero loyo kome ducu. 3Wan warwako nyonyo i dog aguragura wek guwinywa, ci wawiro komgi ducu dok tung kama wamito. 4Kong wunen mel, ginen dongo mada, dok yamo aye ma kologi, ento ngat ma kwango twero wiro cito kama en mito ki latin pol mo matidi keken. 5Kitmeno, leb obedo dul kom manen tidi mo, ento wake mada i jami madongo. Nen kit ma mac matidi mo keken wango kwede bunga madit!

6Leb bene obedo calo mac. Ikin dul komwa leb rom ki lobo ma gin ma en tiyo pe atir, ci balo komwa woko ducu. Leb cwinyo kwowa ki mac ma pe to. 7Dano twero loyo kit lee ducu, wa winyi, twol gu ki ginacweya ducu ma bedo i nam, dok bene guloyogi woko yam con. 8Ento pe tye dano mo matwero loyo leb. Leb aye twon gin mo ma pe juke, opong ki kwir ma neko dano. 9Leb en aye gin ma wapako kwede Rwot Lubanga Wonwa, en leb acelu bene waceno kwede dano ma kicweyogi i cal pa Lubanga kikome. 101 Miyo pwoc ki ceno dano a i dog acelu. Utmegina, pe myero obed kitmeno. 11Wang it acel mono twero mol iye pii mamit ki makece? 12Utmegina, oduru mono twero nyak yaa? Nyo olok twero nyak oduru? Kitmeno pii mamit bene pe twero mol kun a ki iwang it ma piine obedo kadokado.

Ryeko ma oa ki malo

13Anga ikinwu maryek dok niang jami? En myero onyut tic me ryekone ki mwolo, pi kwo ne maber. 14Ento ka wutye ki nyeko icwinywu, paro piri keni, pe wuwake, pe bene wuwac lok goba ikom lok ada. 15Kit ryeko macalo meno pe oa ki i polo ento obedo me lobo, pe woro Lubanga, ento pa Catan. 16Pien kama nyeko ki paro piri keni tye iye, inongo anyobanyoba ki tim ducu maracu tye iye. 17Ento ryeko ma oa ki malo mukwongo, bedo leng, dok bedo me kuc, me mwolo, gamo tam ducu mabeco, opong ki kica, ki nyako nyig maber, ngat matye kwede pe poko kin dano, pe bedo ngat ma labute. 18Jo makelo kuc gicoyo kodigi i kuc me nyako kit ma atir.