Yakobo 2

Gwoke ikom tim me apokapoka

1Utmegina, kit macalo dong wuye Rwotwa Yecu Kricito kwedeni, ma en Rwot me deyo, pe dok wukel apokapoka mo ikin dano. 2Pien kace won agit jabu oruku bongi mabeco obino kwede i cokewu, ki lacan bene oruku bongi mugenyogeny, 3ce wukwongo tamo pi dano ma oruku bongi mabeconi, kun wuwaco ni, “Bed kany, ladit,” ento bot lacan wuwace ni, “Cung kuca,” nyo ni, “Bed piny katyena kany.” 4Meno nongo pe dong wukelo apokapoka woko ikinwu kekenwu, kun wudoko bene lungolkop ma tamwu ogom woko?

5Wuwiny ba, utmegina ma amaro, pe Lubanga aye ma oyero jo ma lucan iwi lobo wek gubed lulonyo i niye, dok me miyogi ker mayam ociko ni ebimiyo bot jo ma mare? 6Ento wun wuketo lewic ikom lucan. Pe lulonyo aye ma buruwu? Pe gin aye ma ywayowu kun giterowu tektek inyim lungolkop? 7Pe gin aye luyet nying maber ma kilwongowu kwedeni? 81

Kace wumako cik me ker pa Lubanga kit mayam kicoyo kwede i ginacoya ni, “Mar lawoti macalo imare keni,” nongo wutimo ber; 9ento kace wupoko kin dano, nongo wutimo rac, nongo Cik ngolo kop ikomwu ni wun lubalo. 10Pien ngat ma gwoko cik ducu, kace opoto i cik acel keken, nongo oturu cik ducu. 112 Pien ngat ma owaco ni, “Pe i tim abor,” owaco bene ni, “Pe ineki.” Ka inen ce pe itimo abor ento ineko dano, nongo dong ituru Cik. 12Lok ma wuloko, ki gin ma wutiyo, myero obed macalo pa jo ma kibingolo kop ikomgi ite Cik makelo kuc. 13Pien pe kibitimo kica bot ngat mayam pe otimo kica; ento ka in ibedo ngat ma timo kica, ci Lubanga bitimo kica ka en ngolo kop ikomi.

Niye ma pe ki tic

14Konyo gin ango, utmegina, ka ngat mo waco ni etye ki niye kun pe keto i tic? Ci niye meno twero lare? 15Kace omeru nyo lameru peke ki bongo, kun cam me nino ducu bene remo, 16ci ngat mo ikinwu waco botgi ni, “Wucit ki kuc, komwu obed mormor, wubed ma wuyeng,” kun pe wumiyo botgi gin mo mamite pi pito kom, ci meno konyo ango? 17Kitmeno, niye kene ka pe kiketo i tic, nongo dong oto woko. 18Ngat mo biwaco ni, “In itye ki niye, ento an atye ki tic; nyuta niyeni labongo tic mo, ka dong abinyuti niyena ki tica.” 19Iye ni Lubanga tye acel, itimo ber. Kadi cen gu bene giye kitmeno, dok komgi myel. 20In laming, i mito kinyuti ni, niye ma pe ki tic konye pe? 213 Kwarowa Abraim yam pe kikwano ni kite atir pi tic, ikare ma en otyero wode Icaka me bedo gitum iwi keno tyer? 22Dong ineno ni niyene yam ocobe ki tic, 234 omiyo lok mayam kicoyo ocobe kakare ni, “Abraim oye Lubanga, omiyo kikwane ni en dano ma kite atir”; dok bene kilwonge ni en larem Lubanga. 24Dong ineno ni dano kikwane ni kite atir pi tice, ento pe pi niye keken. 255 Kitmeno bene, Rakab, dako ma malaya, pe yam kikwane ni kite atir pi tice, ikare mayam en ojolo lukwena ka lacen ocwalogi gucito woko i yo mukene? 26Kit macalo kayweyo dong pe ikom, nongo kom dong oto woko, kitmeno bene, niye ka pe kiketo i tic, nongo dong oto woko.