Yakobo 1:5

Mot

11

Waraga man oa ki bot an Yakobo ma latic pa Lubanga ki pa Rwotwa Yecu Kricito.

Bot kaka apar wiye aryo ma guket woko ata ikin piny: Amotowu ba.

Niye ki Ryeko

2Utmegina, wubed ki yomcwiny madwong ka kitemowu i yo mapatpat, 3pien wungeyo ni temo niyewu miyo wudiyo cwinywu. 4Wek diyo cwiny ocob tice kakare, wek wubed jo muteggi, ma roc mo pe ikomwu, dok wubed ma gin mo bene pe orem botwu.

5Kace ngat mo tye ikinwu ma ryekone nok, myero en oleg Lubanga ma miyo bot jo ducu ki yomcwiny, kun pe twono ngat mo; ci bimiye. 6Ento myero en oleg ki niye, labongo akalakala mo; pien ngat ma bedo ki akalakala rom ki pii me nam ma twage, ma yamo coro tagge atata. 7Kit dano macalo meno myero pe otam ni ebinongo gin mo ki bot Rwot, 8pien en bedo ma tame aryo, ma pe cung matek ikit yo me kwo ne ducu.

Can ki lonyo

9Lacan myero owake ka Lubanga omedo rwome malo, 102 lalonyo bene kitmeno myero owake ka Lubanga odwoko rwome piny; pien lalonyo birwenyo woko calo tur lum. 11Pien ceng tuc ki lyetone matek, ci nero lum, ture o, bere bene rwenyo woko. Lalonyo bene birwenyo woko ata kitmeno i dye tice me kare ducu.

Temo cwiny ki bita

12Ngat ma kitemo cwinye tye ki gum ce ocung matek; pien ka dong kiteme, ce en oloyo, ci binongo mot me lalukana me kwo ma Rwot ociko me miyo bot jo ma maro en. 13Ka kibito ngat mo, en pe myero owaci, “Lubanga aye ma bita,” pien Lubanga pe bite ki gin marac, en bene pe bito ngat mo. 14Dano acel acel gire mitine kene aye ma bite, ywaye, kun omo cwinye. 15Miti ka oyac ci nywalo bal. Bal ka dong odongo muteggi nywalo to.

16Utmegina ma amaro, pe wuwek kibwolwu. 17Pien kit gin mo ducu maber, ki mot ducu mabeco tutwal ma kimiyowa, a ki malo, a ki bot Lubanga Won bino piny, ma en aye won dero ducu ma i polo, ma pe tye ki alokaloka mo, dok tipu mo ma nyutu lokene bene pe. 18Pi mitine gire kene, en onywalowa ki loke me ada, wek wabed calo cam ma i poto mukwongo cek ki ikin ginacweya ducu.

Winyo lok ki ketone i tic

19Utmegina ma amaro, wunge lok man. Dano acel acel myero owiny lok oyotoyot, ento pe myero orune me gamone, dok bene pe omyero owek kiniga omake oyot. 20Pien kiniga pa dano pe cobo tic ma atir inyim Lubanga. 21Wubol gin ducu me lewic woko cen ki tim maracu madong onya botwu, wek wugam lok pa Lubanga ma opito i iwu ki mwolo, pien twero laro tipuwu. 22Ento wubed jo ma keto gin ma giloko i tic, pe wubed jo ma winyo awinya keken kun wubwole kenwu. 23Pien kace dano mo obedo lawiny lok keken ma pe tiyo, ci bedo calo ngat ma ngiyo wange i kiyo. 24Ento ka dong otyeko ngiine kekene, cito woko, ci wiye wil woko oyotoyot i calle ma en obedo kanenone tutwali. 25Ento ngat maneno cik maber makelo kuc, ka orii iye, ma pe bedo calo ngat ma winyo ka dok wiye wil woko, ento ngat ma keto lok ma en owinyo i tic, kibimiye gum i gin ma en otiyo ducu.

26Kace dano mo otamo ni en ladini kun pe juku lebe, nongo bwole abwola kene ki i cwinye, dininenu konye peke. 27Dini me ada maleng, ma cilo pe iye inyim Lubanga Wonwa en ene: konyo lutino kic ki mon ma coggi oto ikom can ma gitye kwede, ki gwoke ken ikom bal me lobo.