Ejira 1

Ciro ociko ni Lujudaya gudok cen i lobogi

(2 Tek 36:22-23)

11

I mwaka mukwongo me loc pa Ciro rwot me Percia, Rwot Lubanga oweko lok mayam oa ki idog Jeremia ocobe kakare. Rwot Lubanga otugu cwiny Ciro rwot me Percia omiyo en otito lok oromo i lobo ma ite kere ducu. Rwot Ciro ocoyo i waragane kitman: 22

“Man aye lok ma Ciro rwot me Percia ociko: Rwot, ma en Lubanga me polo, otyeko miyo ker ducu ma iwi lobo i cinga, dok ocika ni ager ot pire i Jerucalem matye i Juda. 3Bot ngat mo keken ma ikinwu matye ikin lwak pa Lubanga awaco ni Lubanga myero obed kwede. Dano meno omyero oa ocit i Jerucalem, matye i Juda, kagero Ot pa Rwot Lubanga pa Icrael, ma kiworo i Jerucalem. 4Pieno dano acel acel ma pud odong i kabedo mo ma en bedo iye, wek jo ma i kabedo meno gumiye kony me ryal ki jabu, kacel ki kit jami mo keken ki lim makwo, kun kimedo ikom gityer ma igi opwoyo ma kimiyo pi Ot pa Lubanga matye i Jerucalem.”

5Ludito ma giloyo dog odi pa kwarigi ma gitye i kaka pa Juda ki Benjamin, ajwaki pa Lubanga, Lulevi kacel ki jo ducu ma Lubanga otugu cwinygi, gucako yube me cito kagero Ot pa Rwot matye i Jerucalem odoco. 6Jo ducu ma orumugi gumiyogi kony me jami me ryal, jabu, ki lwak jami mapatpat, kacel ki lim makwo, ki mot ma welgi dongo, medo ikom lim ducu ma dano gutyero ma cwinygi opwoyo me miyone.

7Rwot Ciro bene okwanyo jami mayam kitiyo kwedgi i Ot pa Rwot, mayam Nebukadnejar oyako ki i Jerucalem ci otero oketo i ot jok pa lubangane. 8Ciro rwot me Percia okelogi ci omiyogi i cing Mitredat ma lakan lim, en okwano lwak jami meno ducu inyim Cecbajar ma en rwot me Juda. 9Wel jami onongo yam tye kit man: becen madongo me jabu pyere adek, becen me ryal alip acel, atabo weer me wango odok eceta pyere aryo wiye abongwen, 10atabo matino me jabu pyere adek, atabo me ryal miya angwen ki apar, ki jami mukene alip acel; 11jami me jabu ki me ryal ducu oromo alip abic ki miya angwen.3 Jami magi ducu Cecbajar odwokogi i Jerucalem ikare ma jo mayam kiterogi i opii i Babilon kidwokogi cen i Jerucalem.