Esta 8

Kiye ki Lujudaya ni gulweny ikom lumerokgi

1Ininonu rwot Akacwero omiyo ot pa Aman ma en lamerok pa Lujudaya bot Daker Esta. Cake ikare meno kiye ni Mordekai obino inyim rwot, pien Esta dong onongo otyeko tito pi wat matye ikin en ki Mordekai. 2Ci rwot Akacwero owoto agit mayam omiyo ki Aman woko ki i cinge, ci omiyo ki Mordekai. Ci Esta oketo ot pa Aman i cing Mordekai.

3Lacen Esta dok ocito ocako lok ki rwot; opoto piny i katyen rwot, ka ocako bako doge kun kok ki pig wange ni omyero ojuk yub man maraci woko ma Aman ma jo Agag oyubu pi neko Lujudaya liwengi. 4Ci Rwot oilo odoo kere me jabu tung bot Esta, 5ci Esta oa ocung inyim rwot, ci owace ni, “Kace cwinyi opwoyo, dok ka itwero tima ber, ka dong in rwot ineno giri ni ber, kun ayomo cwinyi, kono dok icoyo cik mukene me juku waraga mayam Aman ma jo Agag, wod pa Amedata ocoyoni, kun onongo dong oyubu lok ni omyero kinek Lujudaya ma i dul lobo ducu matye ite loc ma meri. 6Atwero ciro ningning ma aneno ka can madwong tye kabino ikom roka? Atwero ciro ningning ma aneno ka kimito tyeko wadina woko?”

7Ci rwot owaco ki Daker Esta ki Mordekai ma Lajudaya ni, “Nen, dong atyeko miyo ot pa Aman woko bot Esta, dok bene kityeko deyo Aman woko kun kilyere iwi yat me deyo dano, pien en onongo mito neko Lujudaya.

8Dong wutwero coyo kit ma iwu mito ikom lok meno bot Lujudaya ducu i nyinga, kun wudiyo agit pa rwot ikom odok ma kimwono kwede waraga; pien cik ducu ma kicoyo i nying rwot, ki ma dong kidiyo iye agit pa rwot i lobo man, pe kitwero lokone.”

9Inge lok meno ki tugi lwongo lukaran pa rwot cut i karenu i dwe me adeke ma en aye dwe me Civan1, inino dwe pyere aryo wiye adek, ci gucoyo cik kit ma Mordekai ocikogi ducu i lok kom Lujudaya bot luloc madongo, bot lulo dano, ki bot luker maloyo dul lobo mapatpat ducu, nia ki i India nio kwede wa i lobo Etiopia, dul lobo mapatpat maromo miya acel ki pyere aryo wiye abiro kulu. Kicoyo bot jo me dul lobo acel acel ki kit nukuta ma jo kunu gingeyo, ki i leb mapatpat ma oporo rok mapatpat ducu, ki bot Lujudaya ducu ikit cocgi ki lebgi bene. 10Kicoyo loke ducu i nying rwot Akacwero kun kidiyo agit pa rwot ikom odok ma kimwono kwede. Kicwalo ki luter waraga ma giringo ki aguragura, aguragura madwir tutwal ma kitiyo kwede pi tic pa rwot, ma kinywalogi i ot pito aguragura me ker.

11I waraga man rwot omiyo twero bot Lujudaya i gangi ducu ma gibedo iye me ribe kacel me gwoko komgi ki ikom lumerokgi wek gunek, gutyek dok gujwer kit mony mo keken woko ma ete me lweny ikomgi, onyo dul lobo mo keken, ma mito poto ikomgi ki lutinogi ki ikom mon gi, ki ma gimito yako jamigi, ci gin twero yako jami pa jo meno ma oete me lweny ikomgi gulok odok meggi. 12Cik man onongo bitic inino acel i dul lobo ducu liweng matye i te loc pa rwot Akacwero, en aye inino dwe apar wiye adek me dwe me apar wiye aryo ma en aye dwe me Adar inino ma ceng Aman gumoko me tyeko ki Lujudayani. 13Kimiyo lok man obedo macalo cik i dul lobo acel acel ma rwot Akacwero loyo ducu, kun bene kipoko kopi me waraga man wek kimwon i dog gang madito ducu me poko ngec. Man otime wek Lujudaya gubed ma gutere ada inino meno pi culu kwor ikom lumerokgi ma orokogi. 14Kitmeno luter waraga ma giringo ki aguragura ma gidwire ma gitiyo kwedgi pi tic pa rwot, gucako ringo oyotoyot mada pi cobo cik pa rwot; dok cik meno kimiyo ongene i taun madit me Cuca bene.

15Mordekai ocako kato woko ki inyim rwot kun onongo oruku ruk me ker ma obedo bulu ki matar, ki twon lalukana me jabu, ki jor ma kikwoyo ki bongo camanini maber ki bongo ma lamarlamar, ma inongo mere taun madit me Cuca opong ki woo me yomcwiny. 16Lujudaya gujolo lok man ki yomcwiny, dok komgi opye mot kun gibedo agonya ci gucako gomo loc aye dong ikare meno. 17I dul lobo acel acel ki i taun madito ducu kama lok pa rwoti oo iye ki cik man, ki tung bot Lujudaya gin gubedo ki yomcwiny madit mada, gutedo wa karama dok bene gubedo ki yweyo. Jo mapol ikin rok mapatpat ma i lobo guwaco ni gin Lujudaya, pien gubedo ki lworo.