Esta 9

Lujudaya guneko lumerokgi

1I dwe me apar wiye aryo, i dwe me Adar, ikom nino dwe apar wiye adek, onongo dong omyero lumerok pa Lujudaya gucob iye lok me cik ma rwot onongo omoko me nekogi iye. Ento kit ma otime kwede inino meno kikome en aye Lujudaya guloyo iye lumerokgi. 2Inino meno Lujudaya onongo gucoke kacel i gangigi ducu matye i dul lobo ma ite loc pa rwot Akacwero, me neko jo ma onongo gimito timo aranyi ikomgi. Jo ma i lobo ducu onongo pe gitwero cung inyimgi, pien lworo madit omako rok ducu ma orumugi ma pe gitwero ete me lweny ikomgi. 3Rwodi ducu me dul lobo mapatpat, ki luloyo madongo, ki lulo dano, ki lutic pa rwot gukonyo Lujudaya, pi lworo Mordekai madite onongo tye kamede ameda ikin gi oweko gumede ki miyo kony bot Lujudaya. 4Pien ikare meno Mordekai onongo tye dano madit me awora mada i ot pa rwot, dok ywekane onongo dong oromo i dul lobo meno ducu. Twero pa Mordekai obedo kamede mada. 5Ci Lujudaya gucako lweny ikom lumerokgi ducu; gunekogi ki pala lucwan, gutyekogi woko, gutimo gin ma igi mito ikom jo ma onongo gidaggi.

6I gangkal madit me Cuca keken, Lujudaya guneko dano maromo miya abic gutyekogi woko. 7Guneko bene Parcandata, Dalpon ki Acapata, 8Porata, Adalia ki Aridata, 9Parmacata, Aricai, Aridai ki Vaijata, 10ma gin aye obedo awobe apar pa Aman wod pa Amedata, lamerok pa Lujudaya; ento pe guyako gigi jami mo.

11Ininonu kikome jo ma kinekogi i gangkal me Cuca kinyutu welgi ki rwot. 12Ka rwot Akacwero otito bot Daker Esta ni, “Lujudaya tin guneko lumerokgi miya abic i gangkal me Cuca ka imedo iye awobe apar pa Aman. Ci gin dong guneko mapol marom mene ki i dul lobo mukeneni ma ite kera? Kombedi dong imito gin ango mukene ma myero piri? Kibimini gin mo keken ma ipenyo. Tita gin mukene ma cwinyi mito ma pud peya ipenya wek amini.”

13Ci Esta ogamo ni, “Ka oyomo cwinyi, ci myero dok kiket cik ni diki adika dok aye Lujudaya matye i Cuca gutim kit macalo tin ikom lukworgi. Ki medo ikom meno bene awobe apari pa Aman dok omyero kilyer komgi ma otoni iwi yat me deyo dano.” 14Rwot Akacwero oye ni omyero kitim kitmeno ci kimiyo cik meno ongene i Cuca ci gulyero kom awobe apar pa Aman iwi yat me deyo dano. 15Lujudaya ma onongo gitye i Cuca gucoke kacel dok inino dwe me apar wiye angwen me dwe me Adar, ci guneko dano miya adek i Cuca, ento pe guyako jami mo.

16Lujudaya mukene ma gibedo i dul lobo mapatpat ma ite loc pa rwot gugure kacel bene pi gwoko komgi, ci guneko dano alip pyere abiro wiye abic ikom jo ma nongo daggini, ma omiyo gunongo yweyo ki ikom ayela pa lumerokgi; ento pe guyako jami mo. 17Meno otime inino dwe apar wiye adek me dwe me Adar. Inino dwe apar wiye angwen en aye guywe iye, ci kiloko nino meno odoko nino me tedo karama ki me bedo ki yomcwiny. 18Ento Lujudaya ma onongo gitye i Cuca guywako mony ikom lukworgi inino dwe apar wiye adek ki apar wiye angwen, ma omiyo gin guywe inino dwe apar wiye abic, ci guloko nino meno odoko nino me tedo karama ki me yomcwiny. 19Pimeno Lujudaya ma gibedo i taun matino, ki ikin gangi, gikwero nino dwe apar wiye angwen me dwe me Adar macalo nino me yomcwiny ki me tedo karama ki me yweyo, ki me bedo kare ma dano poko iye mot me jami mabeco bot luwotgi.

Kwero karama me Purim

20Mordekai onongo ocoyo lok magi ducu ma ceng otime, ci ocwalo i waraga bot Lujudaya ducu ma gibedo i dul lobo ducu ma ite loc pa rwot Akacwero, ma gitye cok ki ma gitye kamabor. 21En ocikogi ni myero gukwer nino dwe apar wiye angwen me dwe me Adar, ki nino dwe apar wiye abic bene me dwe meno, mwaka ki mwaka. 22Magi aye nino ma Lujudaya gunongo iye yweyo ikom lumerokgi, dwe ma gua kwede ki i cwercwiny ki i kumu ci gunongo yomcwiny ki kuc. Ci kiwacigi ni guwek nino magi gubed nino me tedo karama ki me yomcwiny, nino me cwalo jami mabeco bot luwotgi, ki me cwalo mot bot lucan. 23Ci Lujudaya guye me timo kit ma onongo dong Mordekai ocikogi kwedeni. 241

Ceng Aman ma jo Agag wod pa Amedata, lamerok pa Lujudaya ducu, onongo opiro lok ikom Lujudaya me nekogi woko, ci obolo kwir ma kilwongo ni Purim me tyekogi woko. 25Ento Esta ocito inyim rwot, ci omiyo twer i coc ni lok marac ma Aman opiro ikom Lujudaya myero kidwok iwiye, dok ni awobe pa Aman myero kidegi woko iwi yat me deyo dano. 26Pieno nino me yweyo meno kilwongo ni Purim, pi lubu nying kwir ma kilwongo ni Pur. Pieno, pi lok ducu ma kicoyo i waraga meno dok pi can ma guneno pi lok meno ki gin ma otime ikomgi, 27Lujudaya guye lok man ni myero obed iwigi, ki iwi likwayogi, ki iwi jo ducu ma gibiribe kwedgi; myero kikwer nino magi aryoni, kun kilubu lok ma Mordekai ocikoni mwaka ki mwaka ma pe kikeng. 28Ci kimoko ni nino magi myero kipo pirgi dok kikwergi wa ikare pa likwayogi ducu i dogola acel acel, i dul lobo ducu ki i taun madito ducu. Lujudaya pe myero guwek kwero nino magi me Purim, dok po iye pe myero ogik ikin likwayogi matwal.

29Ci Daker Esta nya pa Abikail, ocoyo waraga gin ki Mordekai ma Lajudaya, kun moko waraga man me aryoni ikom Purim kitwerone ducu. 30Kicwalo waraga bot Lujudaya ducu ma i dul lobo miya acel ki pyere aryo wiye abiro ma ite loc pa rwot Akacwero ki lok me kuc ki ada, 31ni meno nino magi me Purim myero kikwer ikare ma kiciko, kit ma Mordekai Lajudaya ki Daker Esta guciko bot Lujudaya, ki kit ma Lujudaya onongo guciko pirgi ken gi ki pi likwayogi ikom lok ma mako kare me rii kecgi ki kokogi. 32Cik pa Daker Esta ma omoko ki lok man me Purim ducu kicoyo ci kigwoko i buk adola.