Esta 7

1Ci Rwot gin ki Aman gucito i karama bot Daker Esta. 2Dong inino man me aryone doki, ka gitye kamato kongo bwino, rwot dok openyo Esta ni, “Gin ango ma myero piri, Daker Esta? Gin ango ma ilego? Kadi wa nucu kera, jami ducu kitwero cobo kakare.”

3Ci Daker Esta ogamo ni, “Ka in rwot itwero tima ber me ye loka, abako doga ni pe iwek kineka, dok pe iwek kinek jo me roka. Man aye gin ma alego ki boti. 4Pien wan dong kicatowa woko me aneka, an ki jo me rokwa, ni omyero kijwerwa, kityekwa woko. Kono nene kicatowa acata keken macalo opii, kono pe awaco lok mo boti, ento wan koni dong kicok nekowa, kityekowa woko.”

5Ci rwot Akacwero openyo Daker Esta ni, “Anga ma owaco lakit lok macalo meno? En kono tye kwene ma ete katimo lok ma kit menoni?”

6Ci Esta owace ni, “Ai wayi lamerokwa, en lakel lok man ikomwani, aye Aman ma kite raci yo!”

Cutcut wang Aman otugi loke woko ki lworo madit mada inyim rwot ki Daker. 7Ci Rwot oa woko ki i karama ki kiniga madit mada, okato wa idyekal ma inget ot ker; ento Aman odong kalego pi kwone bot Daker Esta, pien oneno ni rwot dong oyube me keto can ikome. 8Ka rwot odwogo ki idyekal inget ot ker, ka odonyo i ot kama onongo gubedo iye kamato kongo bwinoni, ci onongo Aman orumu conge inget kom kama Esta obedo iye. Ci rwot owaco ni, “Imito timo anywar ikom Dakera wa ki iwanga kany, wa i oda kikome ma koma tye?” Ma pud rwot oloko aloka, kitweyo wang Aman woko cut. 9Ci Karbona ma en aye ngat acel ikin dano ma kikologi ma lugwok rwot owaco ni, “Tye yat me deyo dano ma Aman oyubu pi deyo Mordekai, dano ma loke olaro kwo pa rwoti, tye ocung i gang pa Aman, bore romo pwuti pyere abiro wiye abic kulu.”

Ci rwot odok iye ni, “Wude en iye.”

10Ci gudeyo Aman iwi yat meno ma en ceng oyubu pi deyo Mordekai. Ci kiniga pa rwot dong ocako kee.