Esta 6

Rwot oketo deyo ikom Mordekai

1I dyewor meno rwot pe onino; ci en omiyo cik ni omyero kikel bote buk me nipo gin mabeco ma jo mogo gutiyo, matye i buk me tekwaro, ci kikwano inyim rwot. 21Ci gucako nongo kama yam Mordekai otito iye lok ikom Bigitana ki Terec, jo aryo ma kikologi ma gigwoko dogola pa rwot ma guyenyo yo me neko rwot Akacwero. 3Ci rwot openyogi ni, “Woro ango nyo dit ango ma kimiyo ki Mordekai pi gin ma en otiyoni?” Lutic pa rwot gugamo ni, “Pe kimiye gin mo” 4Ci rwot openyo ni, “Anga ki ikin lutelana matye idyekal?”

Onongo Aman aye pud odonyo adonya idyekal ma woko i gang kal kun mito tito ki rwot pi deyo Mordekai i yat ma en oyubu pi deyone. 5Lutic pa rwot gugamo ni, “Aman aye ocung idyekal ca;” Rwot dok owaco ni, “Wulwonge obin kany.” 6Ci Aman obino, rwot ocako penye ni, “Myero kitim gin ango ki dano ma rwot omaro me keto deyo ikome?” Aman otamo ni, “Man anga mono ma rwot twero maro me miye deyo makato an ni?” 7Ci Aman odok iye ki rwot ni, “Dano ma rwot omaro me keto deyo ikome, 8myero kikel jor me ker ma rwot oruku ki aguragura me ker ma rwot ringo kwede, ma kiruku lalukana iwiye. 9Jor ki aguragura myero kiket i cing dano madit me awora pa rwot, wek en oruk dano ma rwot maro me keto deyo ikomeni, ci ocit kwede idye bar malac me gang madit, kun nongo obedo iwi aguragura, katito inyim jo ducu ni, ‘Man aye kit ma kibitimo ki dano ma rwot maro me keto deyo ikome.’”

10Rwot dok owaco ni, “Rune oyot Aman, cit itim kit ma iwaconi. Cit ikel jor ki aguragura, ci itugi tiyo kit gin meno ducu ikom Mordekai Lajudaya ma bedo i dog gang ticani. Pe iwek gin mo odong ikom jami ducu ma ikwanogini.” 11Ci Aman okwanyo jor ki aguragura, ocako ruku Mordekai, ocito kwede wa i bar malac me gang madit meno, kun Mordekai obedo iwi aguragura, ci obedo katito ki dwon malongo ni, “Man kit ma kiworo ki dano ma rwot maro me keto deyo ikome!”

12Lacen Mordekai odok i dogcel pa rwot. Ento Aman orune me dok i gange kun tye kakumu, ma okulu wiye woko. 13Ci Aman ocako tito ki dakone Jerec ki bot lureme ducu gin ducu ma otime ikome. Lacen jo ma luryeko ma miye tam, kacel ki dakone, guwace ni, “Ka Mordekai ma koni dong ocako loyi ki diti obedo Lajudaya, pe ibitwero pyem kwede, ento ibipoto i rwom ma piny tutwal inyime.”

Kineko Aman woko

14Ma pud gitye kalok kwede, cutcut luor pa rwot ma kikologi gutuc guwace ni, “Kimiti oyotoyot tutwal pi karama ma Esta oyubu piri.”