Esta 5

Esta olwongo rwot ki Aman me bino i karamane

1Inino me adeke Esta oruku jor me kere ocung kwede idyekal ma i iye ma i gangkal pa rwot, ma opime ki ot malac me coke. En rwot onongo kono obedo iwi komkere i gang kale ma opime ki dogcel me gang kal. 2Ikare ma rwot oneno Daker Esta ocung idyekal, ci gum okaye inyime, ci oilo odoo kere me jabu ma onongo tye i cinge tung bot Esta. Ci Esta onyiko obongo wi odoo ker. 3Ci rwot ocako penye ni, “Kop ango, Daker Esta? Imito atimi gin ango? Kitwero mini kadibed nucu kera.”

4Ci Esta owaco ni, “Ka onongo ber piri, rwot, amito ni wubin wun ki Aman i cam ma ayubu piri tin.”

5Ci rwot owaco ni, “Wukel Aman oyot, wek, watii gin ma Esta mitoni.” Ka rwot gin ki Aman gucako bino kacamo cam ma Esta oyubu. 6Ikare ma gucako mato kongo bwino, rwot openyo Esta ni, “Gin ango ma myero piri? Kitwero mini. Gin ango ma ilego? Kadi wa nucu kera, jami ducu kitwero cobo kakare.”

7Ento Esta owaco ni, “Legana ki gin ma apenyo en aye ni, 8ka in rwot itwero tima ber me ye loka ki cobo gin ma alego, myero in rwot idwog kany wun ki Aman diki kacamo cam ma abiyubu pirwu, ci diki abititi gin ma amito.”

Aman opiro lok me neko Mordekai

9Ci Aman ocito ma cwinye yom mada inino meno. Ento Aman ka oneno Mordekai i dogcel pa rwot kun pe oa malo, pe bene kome oryange pire, kiniga omake cut matek tutwal ikom Mordekai. 10Kadi bed kitmeno, Aman ociro dok odiyo cwinye, ci ocito i pacone. Ooro dano kalwongo lureme ki dakone Jerec. 11Ci Aman ocako boko pi lonyone kit ma dwong kwede, ki okwano wel awobene, ki rwom mapatpat ma rwot omiye me wore, ki kit ma omiye kwede twero mamalo makato luker ki lutic pa rwot mukeneni ducu. 12Aman omedo dok ni, “Wa cam ma Daker Esta oyubu pe oye ngat mo me bino iye, kono wan ki rwot keken. Dikini dok olwonga kacam aye wan ki rwot. 13Ento magi ducu peya bera ka pud aneno Mordekai ma Lajudayani bedo i dogcel pa rwoti.”

14Ci dakone Jerec ki lureme ducu guwace ni, “Yub yat me deyo dano, mabor tutwal maromo pwuti pyere abiro wiye abic, wek diki adika odiko itit ki rwot ni omyero kide Mordekai iye; ka wek icit ki yomcwiny kacamo cam ma kiyubu pirwu wun ki rwot.” Tam man oyomo cwiny Aman tutwal; omiyo otugi yubu yat me deyo Mordekai woko cut.