Esta 4:14

Mordekai olego kony ki bot Esta

1Ka Mordekai ongeyo gin ma otime ducu, oyeco bongine woko ci ocako ruku bongo cola ki oonyo buru i wiye pi cwercwiny, ocito kwede idye gang madit, kun dange ki koko, 2nio ka ocito kwede wa i dogcel pa rwot. Ento pe odonyo i cel pa rwot pien onongo cik okwero ni dano ma oruku bongo cola pe donyo kunu. 3I dul lobo acel acel, kama lok pa rwot oo botgi ki cik man, kumu obedo madit mada ikin Lujudaya. Gurii kec, gukok, gukumu, ci polgi guruku bongo cola kun gubuku wa wigi ki buru.

4Ikare ma angeca pa Esta ki lutice ma kikologi gubino gutite, Daker onuru mada ki cwercwiny, ci en ocwalo bongi ni Mordekai oruki wek oluny bongo cola woko, ento Mordekai pe ogamogi. 5Lacen Esta olwongo Atak, ngat acel ikom lutic pa rwot ma kikolo, ma onongo kimiyo bote me bedo laore, ci ocwale kapenyo Mordekai gin ango ma otime, ki bene pingo en timo kumeno. 6Ci Atak ocito bot Mordekai idye bar malac me gang maditi, inyim dogcel pa rwot. 7Ki kunu, Mordekai otite gin ducu ma otime ikome, ki wel lim kikome ma Aman ocike me culune i ot kano lim pa rwot pi neko Lujudaya. 8Mordekai bene omine kopi me waraga me cik ma kipoko i Cuca pi nekogi, wek en onyut ki Esta me niang ikom lok meno, wek ocik Esta ni ocit bot rwot ci obak doge, wek rwot otim kica ki jo me roke. 9Ci Atak ocito otito lok man ki Esta kit ma Mordekai owaceni. 10Cutcut Esta oloko ki Atak kun cwalo kwena bot Mordekai ni, 11“Lutic pa rwot ducu ki dano ma i dul lobo ducu ma i te loce gingeyo ni kit dano mo, laco nyo dako, ma ocito bot rwot, ka odonyo wa idyekal ma i iye ma pe kilwonge alwonga, tye mere cik acel keken ma omako dano ducu, ni danonu myero kineke woko, kono nyo ka rwot oilo odoo kere me jabu tung bote, en aye twero kwo. Ento an pud peya kilwonga inyim rwot pi nino pyere adek kulu.” 12Ci kitito ki Mordekai lok ma Esta owaco. 13Mordekai odwoko lok ni kitit bot Esta ni, en pe otam ni ebibwot ki ikin Lujudaya mukeneni ducu pien etye i gang kal pa rwot. 14Pien ka eling ikare ma kit man, ci kony ki lar bibino bot Lujudaya ki i kabedo mukene, ento en ki ot pa wone gibito woko. Anga kono ma ngeyo ka nyo kimiyo en odoko Daker pi kare macalo man?

15Ci Esta owaco ni, “Wutit ki Mordekai ni, 16ocit ogur Lujudaya ducu ma gitye i Cuca kacel, gucak rii kec pira, pe gucam gin mo dok pe gumat gin mo pi nino adek dyewor ki dyeceng benebene. An bene ki angecana wabirii kit macalo gin bene birii kec. Ci dong abicito bot rwot kadibed cik okwero. Ka dong ato, ci wek ato.”

17Mordekai ocito otiyo gin ducu kit ma Esta ocike kwede.