Jo Epeco 5

Wulub kit pa Lubanga

1Wulub kit pa Lubanga, pien wun lutinone ma en maro. 21 Wubed kun wulubu yo me mar, macalo Kricito ceng omarowa, ci omine kene pirwa me bedo gitum ma ngwece kur ma gityero bot Lubanga.

3Dong pimeno, tim kwele ki tim caro caro ducu, ki woro pe omyero kilwong nyinggi ikinwu pien wun wubedo jo pa Lubanga. 4Gin me lewic ki lok mingomingo, nyo kadi lok ki leb malik ma konye peke, omyero bene pe owinye botwu. Ma ka timo jami magi, wumii pwoc bot Lubanga. 5Wuniang maber ni, pe tye ngat mo ki ikin lutim tim abor nyo tim caro, nyo arima ikom jamigi (pien arima romaroma ki woro jami) ma binongo dul mo ma bedo mere iker pa Kricito ki pa Lubanga. 6Pe wuye ngat mo obwolwu ki lok mogo ma tere peke, pien kiniga pa Lubanga bino ikom jo ma pe winyo loke pi kit timginu. 7Pimeno, pe wuribe kwedgi. 8Yam wubedo i colpiny, ento kombedi dong wudoko dero i Rwot; kitwu omyero dong obed kit pa jo me dero. 9Pien nyig ma onyak pi dero nen woko i gin ducu matye maber, dok atir, ki me ada. 10Wutem pwonye ikom gin ma yomo cwiny Rwot. 11Pe wuribe ikit tic ducu me piny macol ma pe konyo, ento wunyut kit tic meno woko kamaleng. 12Pien bedo me lewic me lok ikom gin ma kitimo i mung. 13Gin ducu ma dero omenyo nen woko kamaleng; 14pien gin manen kamaleng nongo tye i dero. Man aye gin ma omiyo kiwaco ni,

“Coo woko, in ma laninoni!

Cer woko ki ikin jo ma oto,

ci Kricito bimenyi.”

15Wugwoke maber ikit kwo ma wubedo kwede; pe wubed macalo jo ma kwiya piny, ento calo jo maryek. 162 Tii ki kare ma itye kwedeni i yo maber, pien nino me kare man opong ki gin marac. 17Pimeno, pe wubed ming, ento wutem niang gin ma Rwot mito. 18Dok pe omyero wumer ki kongo, pien mero kelo kit me caro. Ma ka mero, wuwek Cwiny Maleng opong cwinywu, 193 kun wuloko ikinwu kekenwu lok me jabuli, ki wer agoya ki wer akuta me pak maber, kun wuwero ki cwinywu ducu me pako Rwot. 20Wupwo Lubanga Won ikare ducu pi jami ducu inying Rwotwa Yecu Kricito.

Co ki mon gi

21Wumiine kenwu ite loc pa jo mukene, ngat man bot lawote, pi woro Kricito. 224 Wun mon wumiine kenwu ite loc pa cogwu, macalo wumiine kenwu bot Rwot. 23Pien laco obedo lawi dakone, macalo Kricito en aye lawi lwak ma oye en, en bene lalargi; gin lwak meno aye kome. 24Macalo lwak ma oye Kricito gibedo ite loce, kitmeno mon bene omyero gubed ite loc pa coggi ikit yo ducu. 255 Wun co bene wumar monwu ikit macalo Kricito omaro kwede lwak ma oye en, ci omiyo kwone pirgi. 26En otimo man me dyero kanica bot Lubanga inge lonye ki pii ki lok, 27wek ekel lwak ma oye en inyime kene macalo nyako ma mwonya tutwal, kun pe tye kamo ma ojunge ki ikome, nyo kadi ki poyo mo bene peke, wek obed leng labongo kamo ma oroce. 28Kitmeno, co bene gumar mon gi macalo gimaro komgi ken gi. Ngat ma maro dakone, maro kome kene. 29Pe tye ngat mo ma dag kome kekene, ento pito ki cam dok gwoko maber macalo Kricito bene tiyo ki lwak jo ma oye en, 30pien wan wa dul kome. 316 Yam kicoyo ni, “Pi lok man laco biweko wone ki mine, ci biribe woko ki dakone, gin aryonu dong gidoko kom acel.” 32Man mung madit tutwal. An ki tung bota agonyo tyen loke ni mako kom Kricito ki lwak ma oye en. 33Pimeno, laco acel acel ikinwu omyero omar dakone macalo maro kome kene, ki dako bene omyero onen ni eworo cware.