Latit lok 9

1Aketo i cwinya, kun angiyo ducu maber, ci anongo ni, jo ma kitgi atir ki jo ma luryeko, gin ducu ma gitiyo tye i cing Lubanga; kono obedo mar nyo adagadaga. Pe tye dano mo ma ngeyo gin ducu ma pud tye anyim. 2Apokapoka mo peke, pien kit can acel bipoto ikomgi ducu, bipoto ikom jo ma kitgi atir kacel ki ikom jo ma gin lutim maracu, ikom jo mabeco ki ikom jo maracu, ikom jo maleng ki ikom jo ma komgi ki keni, ikom ngat ma tyero gitum ki ikom ngat ma pe tyero gitum. Can ma poto ikom dano maber rom aroma ki can ma opoto ikom ngat ma labalo; ki ngat ma kwongo kwong rom ki ngat ma lworo kwongo kwong. 3Man aye gin marac manen ki i gin ducu ma tye katime i lobo man; kit can acel bino pi jo ducu. Dok cwiny dano ducu opong ki gin marac, dok apoya bene tye i cwinygi ikare me kwogi ducu, ka lacen gito woko oyotoyot. 4Ento ngat ma kwo bedo ki gen, pien gwok ma kwo ber kato labwor ma oto. 5Jo makwo gingeyo ni gibito, ento jo ma dong guto woko pe gingeyo gin mo. Gin pe gitye ki kit pwoc mo ma gibilimo, dok wi dano wil woko ikomgi matwal. 6Pe dong gitye ki dul mo ma gibinywako ki jo mukene matwal i tic ducu ma gitye katiyone i lobo man, pien mar meggi ki adagadagagi kacel ki miti ma onongo gitye kwede ducu otyeko gik woko licwic inino ma guto iye.

7Dong imede ki camo kwoni ki yomcwiny, dok imat bwinoni ma nongo cwinyi yom ata; pien Lubanga otyeko pwoyo gin ma itiyo.

8Ruk ginaruka maleng kare ducu, ma pe ikeng wiro wii ki moo bene.

9Bed ki yomcwiny kacel ki dako ma imaro, i mwaka me kwoni ducu ma konye pekeni ka pud ikwo. Tii tici ma kimiyi ka pud irii i lobo man, pien meno aye dul ma gipoko boti i kwoni i lobo man. 10Kit gin mo keken ma cingi onongo me atiya, tii iye ki teki ducu; pien tic nyo tam nyo ngec nyo ryeko mo dong peke i lyel, kama ibicito iyeni.

11Dok aneno ni ngat madwir aye pe loyo ngwec, ngat matek bene pe en aye maloyo lweny, pe ngat ma ryek aye ma nongo kwon ma myero ecam, kadi jo ma tye ki ngec matut pe gin aye ma ginongo lonyo ma dwong, nyo jo makwiri i tic pe gin aye jo ma kipwoyogi, ento kare kacel ki gumkom poto ikomgi ducu. 12Dano acel acel pe ngeyo bino pa nino ma mere. Macalo rec ma kimakogi ki obwo, onyo winyo ma gimoko i owic; kitmeno bene dano kimakogi ki owic ikare ma can marac poto ikomgi atura.

Tam ikom ryeko ki mingo

13Dok bene aneno kit labol man kit macalo ryeko tye kwede i lobo, ci onen madit mada ki tung bota. 14Yam tye taun mo matidi ki jo manok keken ma gibedo iye; ci rwot mo madit obino omonyo taun meno kun mito mayone woko, ci ocako toro cel lobo matek orumu taun meno woko dyere. 15Ento dano mo ma lacan ma ryek i taun meno aye ma olaro taun meno ki ryekone. Ento pe tye ngat mo kadi ki acel ma wiye opo ikom dano meno ma lacan. 16Ento aniang ni, ryeko loyo tek kom, kadi bed kicayo ryeko pa dano ma lacan ca, dok bene ngat ma owinyo loke obedo peke.

17Ka iwinyo lok pa ngat ma ryek mot laling, ber kato ma ibedo kawinyo lok pa laloc ma dange kwede adanga i kacoke pa luming. 18Ryeko ber loyo jami lweny, ento labalo acel keken twero balo lwak jami mabeco mapol ata.