Latit lok 8

1Anga macalo dano ma ryek? Dok anga ma ngeyo gonyo tyen lok mo? Ryeko miyo cwiny dano bedo ma yom, dok miyo colwang me adagadaga ma en tye kwede rweny woko.

Lub cik pa rwot

2Myero ilub gin ma rwot ociko, pien ikwonge inyim Lubanga ni ibicobone. 3Pe igale inyim rwot; a woko ka lok dong odoko rac, pien rwot twero timo gin mo keken ma en mito ikomi. 4Rwot loko kitwero, dok anga ma twero waco bote ni, “In itimo man pingo?” 5Ngat ma lubu gin ma en ociko pe birwate ki kit peko mo, dok dano ma ryek ngeyo kare, ki yo maber me aluba. 6Kit lok acel acel tye ki karene dok ki yone, kadi bed ayela tye mapek ma obwoyo kom dano woko. 7Dano pe ngeyo gin ma bitime i anyim, pimeno anga ma twero tito botwa gin ma bitime. 8Pe tye dano mo ma tye ki twero me gwoko tipune, kadi ki twero me gengo ni en pe etoo ka nino me tone oromo. Wan pe watwero nguny ki ngewa pi lweny man, dok tim maracu bene pe bilaro jo ma gin lutim maracu.

Jo maracu ki jo ma kitgi atir

9Man ducu aneno kun aporo ki jami ducu ma tye katime i lobo, kun dano ma tye ki twero loyo jo mukene ki tek. 10Lacen aneno ka kiyiko lutim maracu; ma ka dano gia ki iwi lyel gidok paco, dano pakogi mada i taun madit ka mayam gutimo iye tim maracu. Man bene gin ma konye peke.

11Ka pe kimiyo pwod oyotoyot ikom dano ka otimo gin marac, miyo jo mukene bene giketo cwinygi atika pi timo gin marac. 12Kadi bed labalo otim gin marac ma romo tyen miya acel kun medo mwaka ma myero eri kwede i lobo, ento an angeyo atir ni jo ma gilworo Lubanga aye gibibedo maber, pien gibedo ki lworo inyime. 13Ngat ma latim marac pe bibedo maber wa ki acel, dok bene en calo tipu, pe birii i lobo pi kare malac, pien en pe tye ki lworo inyim Lubanga.

14Tye gin ma konye peke ma tye katime i lobo; tye jo mogo ma kitgi atir ma can poto ikomgi ma myero opot ikom lutim maracu, dok tye lutim maracu mogo ma ginongo gum maber ma opore pi jo ma kitgi atir. Ci awaco ni man bene gin ma konye peke.

15Dong aniang maber ni gin ma mite ma myero dano otim en aye me bedo ki yomcwiny, pien pe tye gin mo maber i lobo kany pi dano, kono me cam ki mato gin amatagu, wek oyom cwinye macalo en twero, pien man aye gin ma en biwot kwede i tice ducu ma otiyo, ikare me kwone ducu ma Lubanga omiye i lobo man.

16Ka aketo cwinya me niang matut i kit yo ma ryeko tiyo kwede, ki dok me neno tic ma dano gitiyo i lobo, kun aneno dano pe miyo wange pi nino i dyeceng kadi i dyewor, 17ci aneno tic ducu ma Lubanga otiyo, aniang ni dano kara pe twero ngeyo gin ma tye katime i lobo. Kadi bed dano mo oyele marom mene me yenyone, pud pe binongo; dok kadi bed dano ma laryeko tamo ni engeyo, pe twero nongone bene.