Latit lok 7

Tam ma mako kwo

11

Bedo ki nying maber ber kato moo me wel ma ngwece kur; ki nino me to pa dano, ber kato nino ma kinywale iye.

2Bedo ber me cito i ot kama dano tye iye kakumu pi lato, kato ma icito i ot kama kiyubu iye karama; pien to aye agiki pa dano ducu, jo makwo gibipo ilok man dok gibiketo cwinygi iye.

3Cwercwiny ber kato nyero, cwercwiny miyo wangi nen ki can ci miyo niang matut boti in dano moni. 4Tam pa dano ma ryek rwate ki tam pa jo ma gitye kakumu i ot; ento luming tamgi rwate ki tam pa jo ma gitye i ot kama kinongo iye yomcwiny.

5Ka dano owinyo juk pa ngat ma ryek ber, kato ma en obedo kawinyo wer pa luming.

6Nyero pa luming obedo gin ma konye peke; cal ki yen okutu ma kirwako i mac ite agulu dek, ma wang mwoc lirwatrwat.

7Dano ma ryek ka unu dano, loke doko ngat ma laming, dok gamo lim me wilo dano i mung balo tam pa dano woko.

8Agiki pa gin moni ber kato acakine; dok dano ma diyo cwinye ber kato ngat ma lawake. 92

Pe myero iwek kiniga omaki oyotoyot; jo ma luming aye kano kiniga i cwinygi.

10Pe myero ipeny ni, “Pingo jami me kare ma okato angec ber makato me kare man!” Peny macalo man nyutu ni i peke ki ryeko.

11Dano acel acel ma bedo i lobo myero obed ryek, pien ryeko ber macalo ngom ma dano oleyo ki bot kwarone.

12Ryeko twero gwoko dano kit macalo lim gwoko ki ngat ma tye kwede; ryeko gwoko kwo pa ngat ma ryek, man aye ber me bedo ki ngec.

13Kong itam pi tic pa Lubanga; anga ma twero twenyo gin ma en oketo ma ogom wek obed atir?

14Bed ki yomcwiny ikare ma itye maber, dok ikare ma piny rac ber ipo ni; Lubanga aye ma miyo dano gibedo maber nyo marac, wek dano pe gunge gin ma bitime lacen ma nongo dong guto woko.

15Anongo ni kwona kara konye peke, kadi bed oweko aneno jami ducu. Aneno ni dano ma kite atir to pi lengcwinye, kun dano marac ma en latim marac bedo rii nakanaka ikom time maraci. 16Pe myero ibed dano ma kite atir tutwal, pe bene ikete keni me bedo ryek ma okato kare. Pingo imito neke woko kekeni? 17Dok pe myero ibed dano marac ma okato kare, pe ibed laming bene. Imito ni ito woko pingo, ma pud peya kareni oromo? 18Bedo ber ka pe ibedo ngat ma timo tim me mingo onyo gin marac; pien lworo Lubanga miyo ibwot ki ikom gin aryoni ducu.

19Ryeko miyo teko bot dano ma ryek, kato gin ma luloc apar kulu twero tiyo i taun madit ma gitye iye.

20Adada pe tye dano mo ma kite atir i lobo man, ma timo gin maber keken ma pe balo.

21Pe icik iti me winyo lok ducu ma dano giwaco, miyo iwinyo lok mogo maracu ma latici loko me yeto in. 22Dok in bene ingeyo ki i cwinyi kekeni ni tyen mapol ata ibedo kaloko lok maracu kun iyeto ki jo mukene.

23Atiyo ki ryekona me temo man ducu, kun awaco ni, “Abibedo ryek”; ento pe atwero nongo, pien ryeko tye kamabor kweda. 24Ngat mo twero yenyo tyen kwo ningning? Tye kamabor, matut dok matut adada; oweko pe tye ngat mo ma twero niang iye. 25Amoko tama me ngeyo ki me yenyo ryeko, kun amito aniang kama ryeko twero nonge iye, dok me niang tyen lok me jami ducu, ci aniang atir ni tim maracu aye mingo, ki tim mingo aye apoya kikome.

26Man aye gin ma bene anongo: tye kit dako marac makato to. Cinge ma gwaki kwedeni ki mare tye calo owic ma maki macalo nyor me tweyo dano. Ngat ma tiyo gin ma Lubanga mito twero bwot woko ki bote, ento ngat ma labalo aye dako meno twero makone. 27Nen ba, man aye gin ma dong atyeko niang, abedo ka nongo man motmot ikare ma atye kayenyo tyen lok ducu, 28ma obedo kabino i tama teretere, ento pe amedo ki nongo gin mo. Ikin dano alip acel anongo iye laco acel keken ma atwero woro, ento pe anongo dako mo kadi ki acel ikin gi ducu. 29Nen man aye gin acel keken ma anongo: Lubanga gire onongo ocweyo dano ma cwinygi tye atir, ento dano aye guyenyo yo mapol me timo jami maracu mapatpat.