Latit lok 6

1Atyeko neno bal marac mapek ma obwoyo kom dano ducu ma bedo i lobo man. 2Lubanga twero miyo bot dano mo lonyo, lwak jami mapol ata, dok miyo dano giwore, weko dano meno bedo ma gin mo keken ma en mito pe rem bote, ento ka Lubanga pe omiye twero me nongo yomcwiny ikom lwak lonyoneni, ci dano mo ata aye binongo yomcwiny ikom jamine ducu; man gin ma konye peke. Man aye can marac mukato kare. 3Kadi bed dano mo onywal lutino ma romo miya acel kulu, kadi en obedo i lobo pi lwak mwaka mapol, ma mwakane bene dong dwong, ento ka pe onongo yomcwiny mo ikom jami mabeco me lobo man, ka pe bene kiketo deyo me yiko en ka oto, awaco ni latin ma kinywalo ma dong otyeko to woko ki i ic ber kato en woko. 4Kony me nywalo latin meno peke, pien en cito i colpiny, ka dong tye i colpiny ci wi dano wil woko pi nyinge. 5Dok latin meno pe oneno ceng, pe ongeyo gin mo; ento en nongo yweyo maber makato dano meno maditi, 6kadi bed dano meno orii i lobo pi mwaka alip aryo kulu, kun nongo pe obedo ki jami mabeco i lobo man. Pien i agikine gin aryoni ducu gicito i kabedo aceli.

7Dano tiyo tice ducu wek enong gin ma myero ecam, ento pe romo yeng ki cam ma en nongo. 8Gin ango maber ma dano ma ryek tye kwede makato ngat ma laming? Dok gin ango kono maber ma lacan ma ngeyo gwoko kwone tye kwede ikin jo makwo? 9Bedo ber ka jami ma itye kwedeni oromi, kato ma ibedo ki par ma dwong pi jami mukene; man bene gin ma konye peke, rom ki ryemo kor yamo ma kodo.

10Gin ma tye katimeni onongo dong kityeko moko wa yam con, dok wangeyo ni dano pe twero pyem ki ngat matek makato en. 11Ka dano pyem kun loko lok ma dwong, ci loke ducu doko gin ma konye peke, nongo en yele nono. 12Anga ma ngeyo gin maber pi dano ma kun nongo en obedo pi kare manok ki kit kwo ma konye peke, pien kwone rwenyo woko macalo tipu? Anga ma ngeyo gin ma bitime iwi lobo inge tone?