Latit lok 5

Pe ikwong kwong rucurucu

1Myero igwok kiti ka icito ka donyo i Ot pa Lubanga; pien nyiko cok kawinyo lok pa Lubanga ber kato gitum ma luming gimiyo bote, pien gin pe gingeyo ni gitye katimo bal. 2Myero kong ikwong tamo pi gin ma imito loko ma peya iloko gin mo, pe myero icike oyotoyot inyim Lubanga; myero ilok manok mo keken inyime, pien en tye i polo, ki in itye i lobo.

3Ka ibedo kaparo par mapol ci lek bino iwii, dok ka in lalok mapol, ci polkare bene ibibedo lalok mingomingo. 41

Pimeno ka ikwonge bot Lubanga pe igale, dok myero igwok kwongi; pien Lubanga cwinye pe yom ikom luming. Myero icob gin ma in dong ikwongo. 5Onongo bedo ber ka in pe ikwongo kwong mo, kato ma ikwonge kun pe icobo gin ma ikwongo. 6Pe iwek lok ma iloko oteri katimo bal, dok pe myero iwac bot lukwena pa Lubanga ni meno dogi onongo ocer acera. Pingo iweko kiniga mako Lubanga ikomi pi lok ma iloko, ma miyo en balo tici ducu mayam itiyo ki cingini?

7Myero ilwor Lubanga, kadi bed lek mapol bimede ki bino iwii, ma miyo iloko lok ma dwong ata ma konygi peke.

Kwo konye peke

8Pe myero ibed ki ur mo kace ineno ni lucan ma gitye i dul lobo mo kitye ka unugi, ma kopgi pe kingolo atir kun kitimogi ki tim me bwami; pien tye laloc madit ma kato en, dok gin aryonu ducu bene gitye ki luloc madito katogi. 9Dong gin maber makato ducu, en aye rwot mo ma omiyo lobo ma en loyo kipuru dok kipito iye cam ma dwong pi lwake.

10Ngat ma maro lim, lim pe twero romone wa ki acel; ki ngat ma maro lonyo bene kadi bed nongo magoba ma dwong, pud dok waco ni peya orome. Man bene gin ma konye peke.

11Ka lonyo pa dano woto ki mede, ci jo ma gicamo cinge bene ginya mede ameda. Dong kit kony ango ma lalonyo man tye kwede? En neno lonyone anena ki wange keken.

12Ngat ma latic matek nino mot liywi, kadi bed camo cam manok nyo madwong, ento ngat ma olony mukato kare pe nino pien bedo kaparo lonyone.

13Gin marac tutwal ma aneno i lobo en aye ni: dano kano lwak lonyo ma dwong, ci lacen dok lonyo meno kelo can ikomgi, 14dok lwak lonyogini rwenyo woko liweng pi gum marac. Man miyo dano dong ki cinge nono labongo gin mo ma en twero pito ki lutinone. 152Pimeno kit macalo dano yam mine onywale kwede i lobo man ma tye munero, en bene biweko lobo man dok ki cinge nono labongo gin mo, pe bikwanyo jami mo ma oa ikom tice kadi ki acel ma bimako i cinge kun cito kwede. 16Man bene gin marac atika! Kit macalo en obino i lobo nono labongo gin moni, en bene bidok nono kitmeno. Ci dong dano meno nongo kit pwoc ango ikom tice ma en otiyo? Otiyo tic me mako yamo keken. 17Pi kare me kwone ducu en obedo i colpiny ki can ki cwercwiny ma dwong mukato kare, dok ki two wa ki keccwiny.

18Dong gin maber ma aneno ma myero dano otim en ene: en myero ocam cam dok omat mat bene wek onong yomcwiny ikom tice ducu ma en otiyo pi kare manok me kwone ma Lubanga omiye i lobo man, pien man aye dul ma kipoko bote. 19Dano acel acel ma Lubanga omiye lonyo, kacel ki jami ma dwong wa ki twero me yomo cwinye ki jami magi, mito ogam dul ma kipokoni obed mere, wek onong yomcwiny ikom tice, pien man aye mot ma Lubanga omiyo. 20Man miyo dano pe po ni kare me kwone nok tutwal, pien Lubanga oye ni en obed kun cwinye yom.