Latit lok 10

Gin ma mingo kelo

1Lwango ma oto miyo moo wir makur kwok doko mangwe, mingo matidi bene kitmeno, balo ryeko kacel ki deyone woko.

2Dano ma laryeko paro ki i cwinye me tiyo gin ma tye atir, ento ngat ma laming paro ki i cwinye me timo gin marac.

3Kadi bed inen laming tye kawot i yo, nongo tye ma wiye oding, dok miyo dano ducu ngeyo ni en laming.

4Kace inen kiniga omako laloc magwa ikomi, pe iwek dogtici pien kitwero timo kica pi bal madito ka komi pe oryange.

5Tye gin marac ma aneno i lobo ma obedo calo bal ma oa ki bot laloc. 6Jo maming aye kimiyo gibedo i kabedo me dito, kun lulonyo gibedo i kabedo ma piny adada. 7Aneno opii aye gitye ka ngwec ki aguragura, kun jo me awora giwoto awota ki tyen gi calo gin opii. 81

Ngat ma kwinyo bur bipoto i bur ma en okwinyo, ki ngat ma muku kicika me ot, twol bikayo en.

9Ngat ma tyengo got, got bingolo; ki ngat ma baro yen, yen biketo ret ikome.

10Kace latongi lake olu, ka pe ipako lake, myero itii ki tekoni makato; ento ryeko ber konyo dano weko tice woto maber.

11Ngeyo kit me bango twol pe konyo ka twol dong otyeko kayo dano woko.

12Lok ma dano ma ryek loko miyo dano gipwoye, ento ngat ma laming loko gin ma kelo can ikome kekene.

13Acaki me loke opong ki mingo keken, kaloke me agiki tye me apoya keken.

14Laming nyayo lok doko dwong. Pe tye dano mo ma ngeyo gin ma bitime i anyim, dok anga kono ma twero tito bote gin ma bitime lacen i anyim ma nongo en dong oto woko?

15Laming aye kome loc woko ki tic ma en tiyo, miyo pe ngeyo wa yoo ma en myero okwany me dok gange.

16Jami maracu bitime ikom jo ma laloc me lobogi obedo dano matidi ma laming, dok ka lutelane gibedo mere kacamo karama keken nino ki nino!

17Ento jo me lobo ma laloce obedo dano me awora tye ki gum, kun lutelane bene gicamo cam ikare ma mite, wek gilim teko, ento pe pi mero!

18Ka won ot obedo dano ma lacarcar ci wi ode ryebe woko, dok pi wackome miyo wi ot cwer ka kot ocwer.

19Karama miyo dano bedo ki nyero, ki mato bwino kelo yomcwiny bot jo ma gimato, lim aye ma miyo jami ducu twero tiine.

20Pe ilok lok marac ikom rwot lalingling, dok bene pe ilok lok marac ikom lulonyo ka itye i ot butuni; miyo winyo me polo tingo lok ma iwaconi tero woko, nyo kit gin mo ma bwome tye twero tucu lok meno woko kamaleng.