Latit lok 11

Gin ma dano ma ryek tiyo

1Cwal cami bot jo ma gitye loka nam tungcel, ci ibinongo iye magoba inge kare malac ma tye anyim.

2Tim biacara i kabedo abiro, nyo aboro, pien pe ingeyo gin marac ma bitime i lobo.

3Kace kot dong ocido i pol, ci cwer bino piny i lobo; dok kace yat opoto odok tung acuc, nyo tung acam, ci kabedo kama yat opoto iyeni, en aye yat bibutu iye.

4Ngat ma kuru ni kong enen kama yamo kodo kelo kot, pe twero coyo kodi i ngom; dok ngat ma bedo kaneno mere pol, pe bikayo cam mo.

5Kit macalo pe ingeyo kit ma latin ma i ot nyodo pa dako doko kwede gin makwo, kumeno bene pe ingeyo kit ma Lubanga tiyo jami ducu.

6Coo kodini i odiko, dok i otyeno bene kitmeno pe ijuk cingi katic; pien pe ingeyo mene ma bicek mabup, man nyo maca, nyo ka gwok gin aryo ducu gibibedo maromrom ci gicek maber.

7Dero ceng gin maber, dok neno odiko me nino manyen yomo cwiny dano.

8Kace dano mo obedo i lobo orii pi mwaka mapol, myero en obed ki yomcwiny pi lwak kare magi ducu; ento wiye myero opo ni bedo i lyel bibedo pi kare madwong adada. Gin ma bino ducu obedo gin ma konye peke.

9Bed ki yomcwiny ikare me tinoni ma pud in awobi, lub kit gin ducu ma cwinyi mito ki gin ma wangi oneno. Ento ber inge ni pi jami magi ducu Lubanga bingolo iye kop ikomi.

10Kwany tam me par mapol woko ki i tami, wek pe ibed ki arem ikomi; pien kare me tinoni ki acaki me kwoni ducu konygi peke.