Latit lok 4:9

1Dok aneno kit macalo jo mukene tye kaunu ki luwotgi i lobo man. Nen, jo ma kiunugi gikok akoka ki pig wanggi, pien pe gitye ki ngat mo ma myero okwe cwinygi! Pe gitye ki ngat mo ma konyogi, pien jo ma unugi nongo gitye ki twero. 2Omiyo atamo ni jo ma dong guto woko komgi gum kato jo makwo ma pud gudong ma gibedo i lobo man. 3Ento ngat makato gin ducu en aye dano ma pud peya kinywalo, ma peya oneno tim maracu ma kitye katimone i loboni.

4Atyeko neno bene ni tic ducu ma dano tiyo ki dirone ducu, tiyo pi nyeko ma en tye kwede ikom lawote, ni myero en aye ebed ki jami makato lawote. Man bene gin ma konye peke, dok rom ki ryemo kor yamo ma kodo.

5Dano ma laming bedo abeda ma odolo cinge, pimeno kec bineke nio wang ma oto.

6Ka itye ki jami manok ma romo pongcing keken, kun itiyo kwede inongo ni itye ki kuc i cwinyi, ber kato jami matye pongcing aryo ma kuc mo pe iye ma opong ki tic matek, dok bene man rom ki ryemo kor yamo ma kodo.

7Dok aniang bene ni tye gin mukene ma konye peke i lobo man. 8Inongo dano ma bedo kene, ma pe tye ki lareme mo, latine mo bene peke, kadi omine mo bene peke, ento pud inongo ni tye katiyo tic matek ma pe ywe, ento ki tung bote neno ni lonyo ma etye kwedeni pud pe rome. En bene pe twero penye kekene ni, “Tic matek ma atye katiyoneni mono atiyo pi anga, ma genga woko ki nongo yomcwinyi?” Man bene gin ma konye peke, dok gin ma pe miyo yomcwiny bot dano.

9Bedo jo aryo ber kato ma dano acel obedo kene, pien gin jo aryonu gitwero nongo pwoc maber ma a ikom tic ma gitiyo. 10Ikin jo aryoni ka ngat acel opoto piny, ci lawote ile woko malo; ento ngat ma bedo kene tye ki can, pien ka opoto piny pe tye ngat mo mukene matwero ile woko malo. 11Dok ka jo aryo gubutu i kabutu acel kacel, gin ducu komgi bedo lyet, ento ka dano acel obutu i kabutu kene, ci kome twero bedo lyet ningning? 12Kadi bed dano mo twero bwoyo ngat ma tye kene, ento jo aryo kulu bwoyo en woko marac tutwal. Pe tye ngat mo matwero codo tol adek ma kiwiyogi kacel oyotoyot.

13Awobi ma lacan dok ma ryek ber kato rwot ma otii ma laming, ma pe dong winyo tam ducu ma kimiye. 14Awobi macalo meno twero doko laloc me lobo, kadi bed kinywale ma en lacan onyo ka kigonyo woko ki i buc. 15Ento awobi matidi mukene doko laloc lobo, ci lwak ducu gicwako en. 16Aneno ni lwak jo ma pe kwane gipong kun gicwako en. Ento inge mwaka manok mo keken gin bikwere woko. Adada man bene gin ma konye peke, dok rom ki ryemo kor yamo ma kodo.