2 Petero 3:9

Cike me dwogo pa Rwot

1Lurema, man dong waraga me aryo ma acoyo botwu. I gin aryo ducu acuku iye cwinywu wek wutam tam ma atir, kun apoyo wiwu bene, 2wek wupo ikom lok ma lunebi maleng yam guloko con, ki ikom cik pa Rwot ma en lalar, ma lukwena yam gukelo botwu. 31 Mukwongo myero wuniang man ni, ikare me agiki jo ma lucac gibituc ki cacgi, kun gilubu mitigi me komgi. 4Gin bipenyo peny bene ni, “Cike me dwogone ma gitito pire ni tye kwene? Pien cake ma kwarowa guto woko, jami ducu tye ikit mayam gitye kwede i acaki cweyo lobo.” 52 Gimiyo wigi wil woko akaka ilok man ni, polo yam onongo obedo tye con, ki lobo bene ma kicweyo, ki pii ma oa ki i pii, pi lok ma Lubanga oloko. 63 Pii bene aye mayam otyeko lobo me kare maca ka pii aluka ocore omwonyo woko. 7Pi lok pa Lubanga acel lu bene, polo ki lobo me kare man dong kikano pi kuru mac, ma gitye ka gwokone nio ka nino me ngolo kop ki tyeko dano ma pe gilworo Lubanga oromo. 84

Ento pe wiwu owil, lurema, ilok man ni, ki bot Rwot nino acel rom ki mwaka alip acel, mwaka alip bene rom ki nino acel. 9Rwot pe gale agala ka cobo cikene kit macalo jo mogo gitamo kwede, ento en pud tye ka diyo cwinye ikomwu, pien en pe mito ni ngat mo oto woko matwal, ento mitoni jo ducu guo i ningut. 105 Ento nino pa Rwot bibino macalo lakwo, ka dong polo birwenyo woko ki mor madwong, lakalatwe bileny woko i mac, lobo ki jami ducu matye iye biwang woko.

11Kit macalo jami magi ducu bitum woko kitmenoni, myero wubed jo ma cal ningning? Kwowu omyero obed ma lubu kit kwo maleng ki me woro Lubanga. 12Myero wukur nino pa Lubanga, wuket cwinywu iye wek ninone oo oyotoyot. Inino meno polo bilyel, leny woko, ki lakalatwe bene bileny woko i mac. 136 Ento macalo en yam ociko, watye ka kuru polo manyen ki lobo manyen, kama kit ma atir bedo iye.

14Pimeno, lurema, ka wutye ka kuru man, wuket tek wek Lubanga pe onong roc mo nyo bal mo ikomwu, ento onong wutye ki kuc. 15Wutam ni, diyo cwiny pa Rwot aye larewa enu. Ominwa Paulo ma wamaro ocoyo botwu bene kitmeno, pi ryeko ma kimiye, 16kun loko lok pi lok man macalo en loko pire i waragane ducu. I waragane tye lok mogo ma niang iye tek, ma jo ma pe gupwonye, ki jo ma pe gucung matek, gidwalo tere woko, macalo gutimo bene ki coc mukene mayam kicoyo, ma omiyo gin ki komgi gurwenyo woko matwal. 17Pimeno, lurema, kit madong onongo wungeyo man con, wugwoke pe wuwek jo ma pe giworo cik mo gubwolwu, dok pe gungakwu woko i tamwu, miyo wupoto woko ki kama wucung iye matek. 18Wumede ki dongo i kica pa Rwotwa, ma en Lalarwa Yecu Kricito, kun wumede ka ngeye bene. Deyo obed bote kombedi ki nakanaka. Amen.