2 Petero 2

Lunebi ki lupwony ma lugoba

1Ento lunebi ma lugoba bene yam gunen ikin dano, kitmeno bene lupwony ma lugoba binen ikinwu. Gibikelo pwony mogo mapat i mung ma rwenyo dano. Gin bikwero Laditgi woko ma owilogi, ento meno bimiyo gin ki komgi gibirwenyo woko oyotoyot. 2Jo mapol bilubu kitgi me timo tim kwele, ci bimiyo dano cayo yo me ada pi timgi. 3Pi worogi me lim, miyo gibinongo lim ki botwu pi lokgi me goba ma gin guyubu ayuba. Ento lok mayam kingolo ikomgi dong kitye ka yubone, ki topiny ma myero opot ikomgi bene dong tye ma otere!

4Pien Lubanga yam pe oweko lumalaika ka gubalo, ento obologi woko piny ibur lyel, ocwalogi ibur ka macol, wek kigwokgi kunu nio ka kare me ngolo kop dong oromo. 51 En yam pe oweko lobo ikare macon, ento ogwoko Nua keken, latit lok me kit ma atir, kacel ki jo mukene abiro, ikare mayam en ocwalo pii aluka wek omwony lobo pa jo ma pe gilworo Lubanga woko. 62 Lubanga owango gangi me Codom ki Gomora woko ducu gudoko buru, kun ongolo kop me tyekogi woko, ci omiyo gubedo lanen bot jo ma pe bilworo Lubanga ikare me anyim. 73 Ento Lubanga olaro Lot, dano ma kite atir, mayam cwinye ocwer tutwal pi tim kwele pa jo maracu. 8Pien tim maracu ma dano ma kite atir ni obedo ka nenone ki kawinyone nino ki nino, ikare ma en obedo botgi, omiye wangcwiny madwong tutwal. 9Kitmeno Rwot ngeyo laro dano ma gilworo en ki i ayelayela ki kitme me keto jo ma kitgi pe atir ite pwod nio ka nino me ngolo kop oromo, 10makatone gin jo ma lubu mitigi me kom ma cidogi woko, kun gicayo twero pa Lubanga.

Cwinygi tek, gicere woko acera pirgi ken gi, pe bene gilworo yeto wegi deyo. 11Kadi bed lumalaika loyogi ki tek ki twero, ento pe gidotogi ki yet inyim Rwot. 12Ento jo meno gical ki lee ma pe ryek, dok ma lubu kit ma kiketogi kwede, ma kinywalogi me amaka ki me aneka, gicayo lok ma gikwiya. Kibinekogi woko calo lee, 13kun gitimogi marac pi gin marac ma gutimo. Cwinygi yom i karama maracu ma gicamo i dyeceng. Gikelo lewic ki bal ka guribe kwedwu i camo karama, pien gimito megi gat me yomcwiny marac keken. 14Wanggi yenyo mon ma myero gitim kwedgi abor, pe giywe ki yenyo yo me timo bal. Giciko owic me mako jo ma niyegi goro. Cwinygi dong opwonye woko i yo me woro me lim. Gin dong jo ma kiceno! 154 Gubwoto yo ma atir, gurwenyo woko ata. Gulubu yo pa Balaam wod pa Beor, mayam maro lim ma onongo pi timo gin marac, 16ento yam kijuke pi turu cik. Kana ma pe loko yam oloko ki dwon pa dano, ci ojuku apoya pa lanebi meno woko cut.

17Magi gin wang it ma pii pe iye, lupuu ma yamo bayo. Gityeko yubu kabedo macol licuc pirgi. 18Giloko lok mogo maditodito me wake ma tere pe, kun gibito ki dano ma pud gubwot abwota ki ikin jo ma kitgi obedo atata, ka giterogi i timo abor gu kun gin lubu miti me kom. 19Gin gicike me miyo jo meno bedo agonya, kun gin ki komgi gibedo opii pa gin ma balogi; pien ka gin mo oloyo kwo pa dano mo, en dong nongo odoko opii pa gin meno. 20Kace dano dong gubwot woko ki i cilo me bal me lobo pi ngeyo Rwotwa ma en Lalarwa Yecu Kricito, ka dok pud gumoko ikom bal meno ci loyogi woko matwal, bimiyo gibedo marac lacene makato mayam con. 21Onongo twero bedo ber ka kono gin pe gungeyo yo me kit ma atir, kato ma gungeyo ka dok guweko cik maleng ma kimiyogi woko. 225 Man otime ikomgi calo lok ma carolok me ada oloko ni, “Gwok loke dok ka nango ngoke,” ki dok ni, “Opego ma gilwoko kome, loke dok ka nywene i coto.”