2 Petero 1

Mot

1Waraga man oa ki bot an Cimon Petero, latic dok lakwena pa Yecu Kricito.

Bot wun jo ma wunongo niye ma pire tek marom ki mewa pi kit ma atir pa Lubangawa ma en Lalarwa Yecu Kricito.

2Kica ki kuc myero onya botwu pi ngeyo Lubanga ki Rwotwa Yecu Kricito.

Lwongo ki yer pa Lubanga

3Teko pa Lubanga omiyo botwa jami ducu mamite pi kwo kacel ki cwiny me woro en, pien wan watye ki ngec ikom en ma olwongowa i deyone ki ber ma mere kikome. 4Pi deyone ki ber ma mere en omiyowa cike madongo tutwal ki me wel madwong, wek ka walimo, wabwot woko ki i bale me kit pa dano matye i lobo pi miti marac, ka wek dong waribe ikit pa Lubanga. 5Pi lok man, wucuke matek me medo kit maber ikom niyewu, ki bene wumed ngec ikom kit maber, 6ikom ngecwu wumed iye gwoke kenwu, ki ikom gwoke kenwu wumed iye diyo cwiny, ikom diyo cwiny wumed iye cwiny me lworo Lubanga, 7ikom cwiny me lworo Lubanga wumed iye mar me utmego, ki ikom mar me utmego wumed iye mar pi jo ducu. 8Pien ka wutye ki gin magi ducu, ma wutye kwede bene mabup, ci bimiyo wubedo jo ma ngeyo Rwotwa Yecu Kricito i yo ma konyo, dok ma wunyak nyig mabeco. 9Pien dano ma pe ki gin magi nongo en neno macek, pe neno gin mo matye bor, dok nongo wiye dong owil woko ni yam kilwoke woko ki ikom bale macon. 10Pimeno, utmegina, myero wuteme me mede wek wumok i lwongowu matek, ki i yer ma Lubanga oyerowu kwede, pien ka wutimo kitmeno, ci pe wubipoto kadi ki acel. 11Meno bimiyo yo yabe botwu malac me donyo i ker ma rii nakanaka pa Rwotwa ma en Lalarwa Yecu Kricito.

12Meno en aye gin ma omiyo kare ducu amito poyo wiwu ilok magi, kadi bed wungeyogi, dok bene wumako matek liking lok ada ma kityeko kelo botwu. 13Atamo ni ber tutwal an me poyo wiwu, ma pud atye ki kom me lobo man, 14pien angeyo ni, kare me tona dong cok, kit macalo Rwotwa Yecu Kricito yam onyuta kwede. 15Dok abiketo tek, wek wubed ki gin ma poyo wiwu ilok magi kare ducu, ka dong ato woko.

Lucaden ma guneno deyo pa Kricito

16Pien ikare mayam watitiwu pi teko pa Rwotwa Yecu Kricito, ki pi dwogone, onongo pe walubu lok ododo mogo ma wan wayubu ayuba ki ryekowa, ento wan yam waneno deyo me dite ki wangwa. 171 Yam waneno ka en olimo woro ki deyo ki bot Lubanga Won, ikare ma dwon oa ki bot Won Deyo Madit, obino botwa kun waco ni, “Man aye Woda ma amaro, ma cwinya yom ikome.” 18Dwon meno yam wawinyo oa ki i polo ada, pien onongo wan watye kacel kwede kunu iwi got maleng. 19Meno dong omoko botwa lok mayam lunebi guloko. Wun bene myero wuket cwinywu ilokgi, pien lokgi ni bedo macalo tara ma lyel ki latwok bene oryeny, omenyo cwinywu. 20Mukwongo myero wunge man ni, pe tye lok mo ma lunebi gucoyo ma ngat mo twero gonyo tere kekene; 21pien pe tye lok pa lanebi mo mayam obino pi mit pa dano, ento Cwiny Maleng aye ma omiyo dano guloko lok ma oa ki bot Lubanga.