2 Tekwaro 9

Rwot ma dako me lobo Ceba olimo Solomon

(1 Luk 10:1-13)

11

Ikare ma rwot ma dako me lobo Ceba owinyo pi yweka pa Solomon, ci en obino bote i Jerucalem katemo niange ki lapeny matego. Obino ki lwak jo madito mapol ma gucom i kore, kacel ki lwak kinagagu ma giyeyo angwece, ki jabu madwong tutwal, ki lutino godi me welgu. Ka en obino bot Solomon, ci ocako tite lok ducu ma onongo tye i cwinye. 2Solomon odok i lapenye ducu; pe onongo tye lok mo wacel ma okane ki bot Solomon ma en onongo pe romo tucune bot dakonu. 3Ka rwot ma dako me Ceba oneno ryeko pa Solomon ducu, ki ot ma en ogero, 4ki cam ma iwi mejane, ki kit kabedo pa luditone ducu, ki tic pa lutice, ki bongi me arukagi, ki luting kikopogu, ci tam otum woko ki i cwinye liweng.

5Ka dong owaco bot rwot ni, “Lok ikomi ducu mayam kitero bota ki i lobona, ki lok ikom ryekoni ducu bene, anongo loke weng tye kakare. 6Ento yam pe aye lok ma kitero bota ducu, nio ka abino kany ka aneno ki wanga. Ci nen, kadi wa nucu ryekoni madite onongo pe ki tita kulu, pien ryekoni ki lonyoni kato lok dog ma kitera ma awinyoni. 7Lutici gitye ki yomcwiny kuman! Lutici magi ducu gitye ki yomcwiny marom mene, ma gicung inyimi jwijwi kawinyo lok me ryekoni! 8Kipak Rwot Lubangani ma cwinye opwoyo in ci oketi iwi komker me bedo rwot pi Rwot Lubangani! Pien Lubangani omaro jo Icrael matwal, dok omito mokogi gubed matek, en aye omiyo en oketi ibedo rwot ma loyogi, wek ibed kangolo kop atir dok kakare.”

9Rwot ma dako me Ceba man omiyo bot Solomon jabu madwong maromo talanta miya acel ki pyere aryo, ki lwak angwece mapatpat madwong tutwal, ki lwak lutino godi me wel. Ikare ca onongo pe tye angwece mukene macalo meno ma rwot ma dako me Ceba omiyo bot Solomon.

10Ka dok lutic pa Kuram ki lutic pa Solomon ma onongo gukelo jabu nia ki i Opir, gukelo wa ki bao yat algum ki lwak godi matino me wel bene. 11Ci rwot otiyo ki bao yat algum pi jengo kor Ot pa Rwot Lubanga ki kor ot pa rwot. Ki mukene en otiyo kwede opuk ki nanga pa luwer. Kit jami macalo meno onongo peya yam onen kulu i lobo Juda.

12Ci rwot Solomon omiyo bot rwot ma dako me Ceba jami ducu ma cwinye omito, dok omiye gin ducu ma openyo, makato jami ducu ma onongo en okelo bot rwot. Kitmeno rwot ma dako me Ceba ocako wote me dok cen wa i lobone kikome, kacel ki lutice ducu.

Lonyo pa Solomon

(1 Luk 10:14-25)

13Lwak jabu ma obedo kabino bot Solomon i mwaka acel acel peke oromo talanta miya abicel ki pyere abicel wiye abicel 14ma pe kiribo iye ma lucatwil gikelo; ki luker pa jo Arabia, ki ludito maloyo lobo bene gikelo jabu ki ryal bot Solomon. 15Rwot Solomon otiyo lwak kwot ma dongo miya aryo me jabu, ma kitetogi ki nyol. Ikom kwot acel acel odonyo iye jabu ma peke romo cekel miya abicel. 16Dok otiyo kwot matinone miya adek me jabu ma kitetogi ki nyol, kun kwot acel acel kiteto ki jabu ma peke cok romo ratili apar. Ci rwot oketogi i ot ma ki lwongo ni, Bunga me Lebanon. 17Rwot dok otiyo komker madit me lak lyec, ci omwono kome woko ki jabu ma kiliyo maber. 18Komker meno onongo tye ki rwome abicel ki kom me jabu me teno tyen, ma kikubugi ikom komker. Kangete tungi ki tungi kiketo iye kateno cing dano, ki cal labwor aryo gucung kanget bad kom me teno cing, 19kun tye bene lwak cal labwor apar wiye aryo ma gucung i agiki rwom abiceli, tungi ki tungi. Pe tye kom mo ma kitiyo ma cal ki meno ite ker ducu.

20Jami ducu mayam rwot Solomon mato kwede onongo tye me jabu keken, wa jami ducu ma kitiyo kwedgi i ot Bunga me Lebanon yam kitiyogi ki jabu ma kiliyo maber. Ikare pa Solomon pe tye ngat mo ma tamo pi ryal. 21Rwot Solomon onongo tye ki lwak mel ma giwoto Tarcic kacel ki mel pa Kuram. Mel me Tarcic yam dwogo cen ka mwaka okato adekadek kun gikelo lwak jabu, ryal, lak lyecgu, ayomgu, ki gunyagu.

22Rwot Solomon obedo dit makato lwak luker ma wi lobo ducu pi lonyone ki pi ryekone. 23Lwak luker ducu me wi lobo gubedo kayenyo kit yo me neno wang Solomon ki bene pi winyo kit ryekonegu ma Lubanga oketo i cwinyeni. 24Dano acel acel yam tero mote bote, kun gitero jami me ryal, me jabugu, me ginarukagu, odok mura, angwece, aguraguragu, ki kanagu, mwaka ki mwaka. 252

Solomon obedo tye ki loc alip angwen pi aguragurane ki pi gadigadi lwenye, ki lulweny ma giringo ki aguragura alip apar wiye aryo. En yam oketo mogo i taun madito me gadigadi lweny ki mukene gubedo bote wa i Jerucalem. 263En oloyo luker ducu cake wa i kulu Euprate nio kwede i lobo pa jo Piliciti, ki iwang lobo me Ejipt. 27Rwot Solomon yam omiyo ryal odoko gin ma lam marom ki gwenggu i Jerucalem, dok okelo yadi cedar mapol ata marom ki olam ma i bar Cepela. 284Solomon yam gamo aguragura ma a ki i Ejipt ki i lobo mukene.

Ladol lok me loc pa Solomon

(1 Luk 11:41-43)

29Lok kom Solomon mudonge ducu, nia i acaki nio i agikine, kityeko coyone i Buk me Tekwaro Mamako Kwo pa Lanebi Natan, ki Lok me Nebi pa Akija ma jo Cilo, ka dok i Buk me gin Anyuta pa Lanebi Iddo ma ocoyo lok ikom Jeroboam wod pa Nebat. 30Kare ma Solomon oloyo kwede jo Icrael kun bedo i Jerucalem oromo mwaka pyere angwen, 31Solomon oto ci oywe kacel ki kwarine, ka kiyike i gangkal pa wone Daudi. Rekoboam ma wode aye oleyo katyene.