2 Tekwaro 8

Tic mukene ma Solomon otiyo

(1 Luk 9:10-28)

1Otero Solomon mwaka pyere aryo me gedo Ot pa Lubanga ki ot me bedone. 2Solomon dok oroco taun madito odoco mayam Kuram omiyogi bote, ci omiyo jo Icrael gubedo i igi.

3Solomon dok ocito i Kamat-joba, ci omako woko. 4En ogero taun madit me Tadmor ma i tim, ki taun madito ducu me kano cam ma i Kamat. 5Dok en ogero Bet-koron Mamalo ki Bet-koron Mapiny orumu taun madito magi ki cel gogo, dok oketo iye dogola ma gicego ki rii. 6Ogero Baalat bene, ki taun madito ducu me kano cam ma en Solomon yam tye kwedgi, ki taun madito me keto gadigadi monye, ki taun madito pa lulweny ma giringo ki aguragura, ki bene omede kiyubu kit gedo ducu mayam en Solomon omito ni kigergi i Jerucalem, ki i Lebanon, ki i lobo ma en loyo ducu. 7Jo ducu mayam gubwot ci gudong ki ikom jo Kit, jo Amor, jo Periji, jo Kiv ki jo Jebuc, ma pe gin jo Icrael, 8gin aye Solomon oketo tic muroni iwigi, kit macalo tyeni nio wa onyo. 9Ento Solomon pe odiyo jo Icrael i tic me opii; gin gubedo acikarine, ki luditone, ki ludito me gadigadi monye, ki lulweny ma giringo ki aguragurane. 10Jo magi gin aye ludito tic pa rwot Solomon ma giloyo dog tic ducu; welgi romo miya aryo ki pyere abic. 11Solomon okelo nya pa Parao nia ki i gangkal pa Daudi ci otere i ot ma en ogero pire, pien owaco ni, “Dakona pe bibedo i ot pa Daudi rwot me Icrael, pien kabedo ducu ma dong Canduk pa Rwot obino iyeni dong odoko kabedo maleng.”

12Dok Solomon obedo katyero gitum awanga iwi keno tyer pa Rwot mayam en ocano inyim kicika Ot ma i dogola me Ot pa Rwot. 131En obedo kamiyo gityer kit ma tic me nino acel acel mite kwede, kun lubu Cik pa Moses i ceng Cabit ducu, ki i Por Dwe, ki inino madito adek me mwaka ki mwakani, ma gin aye nino madito me Mugati ma Tobi Pe iye, nino madit me kwero Karama me Kac, ki nino madito me Bolo. 14Kit macalo yam wone Daudi ociko, en oketo lwak dul pa ajwaki ki dog ticgi, ki Lulevi man ki dog ticgi me pako Lubanga ki me tic inyim ajwaki, muporo tic me nino acel acel. Opoko bene tic pi lugwok dogola ducu ki dulgi i dogola acel acel, kit ma Daudi ma dano pa Lubanga yam ociko. 15Gin gubedo kalubu cik ducu ma rwot Daudi ociko ki ajwaki ki Lulevi, pe guweko gin mo ma mako lok ducu, ki ma mako kano lim.

16Solomon otyeko tice ducu kitmeno, cake ki inino ma kiketo iye guti me te ot pa Rwot nio ka tice ducu dong otum, en otiyo tice ducu maleng labongo kalo mo ki iye.

17Solomon dok ocito wa i Ejion-geber ki i Elot ma i dog nam, ma i lobo Edom. 18Kuram yam ocwalo lutice ki meli bot Solomon; en ocwalo lutice ma gungiyo ki nam, ci gucito wa i Opir kacel ki lutic pa Solomon, guomo ki kunu jabu maromo talanta miya angwen ki pyere abic, ci gukelo bot rwot Solomon.