2 Tekwaro 10

Jemo pa jo Icrael ikom Rekoboam

(1 Luk 12:1-20)

1Rekoboam ocito i Cekem, pien onongo jo Icrael gumol gucito i Cekem kaketo en me bedo rwot. 2Ka Jeroboam wod pa Nebat owinyo pire, ci oa ki i Ejipt odok cen; pien onongo Jeroboam yam pud tye i Ejipt kama yam oringo iye rwot Solomon. 3Kicwalo lukwena kalwonge, ka Jeroboam ki lwak jo Icrael ma gucoke ducu guwaco bot Rekoboam ni, 4“Woru oketo yec mapek ikomwa. In dong ilok tic matego ma woru omiyowa, ki yec mapek ma en oketo ikomwani, obed mayot, ci wan wabibedo lutici”. 5En ogamo ni, “Wudwog bota kany inge nino adek.” Ci lwak gudok cen.

6Rwot Rekoboam ocako yubu lok ki ludongo muteggi, mayam gicung inyim wone Solomon ikare ma en pud kwo, ci openyogi ni, “Wun wumiya kit tam ango wek adok iye ki lwak man?” 7Gin guwace ni, “Kace kica bimaki ikom lwak man, ma ikweyo cwinygi, kun iloko botgi lok ducu mabeco, ci gin ducu bene gibibedo lutici matwal.” 8Ento en obwoto tam pa ludongo muteggi woko, ocako dok yubu lok ki awobe ma yalwake, ma gimiye tam. 9Openyogi ni, “Wun wumiya kit tam ango wek adok iye ki lwak man ma gupenya ni, ‘Wek yec ma woru oketo ikomwa mapek obwoyo wa ni obed yot?’ ” 10Ci awobe ma yalwake guwace ni, “Ibidok iye ki lwak ma gupenyi kit man ni, ‘Woru yam omiyo yecwa odoko pek, ento in imii obed yot botwa;’ ci in ibidok iye ki gin kit man ni, ‘Nyig cinga kinong makato pyer wora. 11Dong abitiyo kit man: wora yam oketo yec mapek ikomwu, an dok abimedone bedo mapek ada. Wora yam opwodowu ki del anino, an abipwodowu ki yib oton.’”

12Jeroboam ki lwak ducu ma gubino bot Rekoboam ikom nino me adeke, kit mayam rwot ociko ni, “Wudwog cen bota inino me adeke.” 13Rwot ocako dok i peny pa lwak ki gero, pien oweko tam ma ludongo muteggi gumiye. 14Rwot Rekoboam oloko ki lwak kit ma awobe guyubu kun waco ni, “Wora yam omiyo yecwu odoko pek, ento an abimedone bedo mapek ada; wora yam pwodowu ki del anino, an abipwodowu ki yib oton.” 15Rwot Rekoboam pe oye winyo lok pa lwak; pien Rwot Lubanga aye omiyo en okwero, wek loke ma ceng oloko ocobe kakare, mayam en oloko bot Jeroboam wod pa Nebat kun ocwalo Akija ma jo Cilo ocito ka otiteni. 161

Ka jo Icrael ducu guneno ni rwot Rekoboam dong pe owinyogi, ci lwak gudok iye ki rwot ni, “Wan watye ki wang pok wa ango ikom Daudi? Pe watye ki dul mo ikom latin pa Yece. Wun jo Icrael wudok i kemawu! Wek Rekoboam dong oloo jo ma i ot pa Daudi.” Ci jo Icrael gucako poke woko, gudok i pacogi. 17Ento Rekoboam pud loyo jo Icrael ma gibedo i taun madito ma i Juda. 18Ci rwot Rekoboam ki Adoram gucito kaporo lok ki jo Icrael, Adoram ceng obedo ladit maloyo tic muroni, ci nen jo Icrael ducu gucele ki got, guneke woko, ci rwot Rekoboam orune oito iwi gadigadi lwenye, ci oringo kwede woko wa i Jerucalem. 19Kitmeno jo Icrael gucako jemo woko kwede ikom ot pa Daudi nio wa onyo.