2 Tekwaro 11

Lok ma lanebi Cemaya otito

(1 Luk 12:21-24)

1Ka Rekoboam odwogo cen i Jerucalem, ci ocoko jo ma kiyero ki i ot pa Juda ki ikin jo Benjamin, ki twoni oteka lweny alip miya acel ki pyere aboro, pi lweny ikom jo Icrael wek kidwok ker bot Rekoboam. 2Ento lok pa Rwot obino bot dano pa Lubanga ma nyinge Cemaya, kun waco ni, 3“Wac ki Rekoboam wod pa Solomon ma rwot me Juda, ki bot jo ducu me ot pa Juda ki jo Benjamin ni, 4‘Wun pe wubicito kalweny ikom lutuwu ma gin jo Icrael. Wek dano acel acel odok cen i pacone, pien lok man oa ki bota.’” Gin ducu guwinyo lok pa Rwot, ci gudok cen i pacogi, pe dok gucito kalweny ikom Jeroboam.

Rekoboam orumu taun madito ki cel gogo

5Rekoboam obedo ki i Jerucalem, ci en ogero taun madito ma cel gogo orumugi woko me gwoko Juda ki ikom mony pa lumeroke. 6I lobo ma kipoko bot kaka me juda ki Benjamin en omiyo lutice ogero Beterekem, Etam, Tekoa, 7Bet-jur, Coko, Adulam, 8Gat, Mareca, Jip, 9Adoraim, Lakic, Ajeka, 10Jora, Aijalon, ki Kebron, gin ducu obedo taun madito ma kirumu ki cel gogo ma gitye i Juda ki i Benjamin. 11En oyubu cel gogo magi ducu obedo matek, ci oketo ludito mony i igi, ki okano iye cam, ki moo ki kongo bwino. 12Ka dok oketo kwot mapol ki tongi i gangi meno ducu, ci omiyogi gubedo matek mada. Kitmeno Juda ki Benjamin gudong ite loce.

Ajwaki ki Lulevi gubino i Juda

13Ajwaki ducu pa Lubanga ki Lulevi mayam gitye i lobo Icrael ma tung kumalo gua ki i kabedogi ducu, ci gubino ka bedo i Juda ki i lobo ma ingete Jerucalem. 14Lulevi gubwoto lobo ma nongo gibedo iye gudok wa i Juda ki i Jerucalem, pien Jeroboam ki likwayone gukwero woko ni pe dong guti tic macalo ajwaki pa Rwot. 151Jeroboam oketo ajwakine ma en oyero me tic iwang jogi ma iwi godi, ki bot jogi macalo nyogi dyegi, ki bot cal lutino twoni ma en oweko kitiyogi ki cing. 16Jo mayam guketo cwinygi kacito bot Rwot Lubanga pa Icrael gulubu kor ajwaki pa Rwot ki Lulevi, nia ki i kaka pa jo Icrael ducu, kun guwoto wa i Jerucalem katyero gitum bot Rwot, Lubanga pa kwarigi. 17Ci gujingo ker pa Juda matek, gumiyo Rekoboam wod pa Solomon obedo matek pi mwaka adek, pien gubedo kalubu kit pa Daudi ki Solomon pi mwaka adek.

Jo ot pa Rekoboam

18Rekoboam onyomo Makalat nya pa Jerimot wod pa Daudi. Min Makalat obedo Abikail nya pa Eliab ma wod pa Yece. 19Makalat onywalo ki Rekoboam lutino awobe magi, Jeuc, Cemaria ki Jakam. 20Ka dok ki ingeye en onyomo Maaka nya pa Abcalom ci onywalo kwede Abija, Atai, Jija, ki Celomit. 21Ci Rekoboam omaro Maaka nya pa Abcalom makato mon ma obedo kwedgi ducu wa ki mon angecanegu. En yam onyomo mon apar wiye aboro ci obedo ki mon angecane pyere abicel kulu; ci onywalo awobe pyere aryo wiye aboro ki anyira pyere abicel. 22Rekoboam oketo wode Abija latin pa Maaka me bedo ladit maloyo wi omegine, pien yam onongo omito keto en me bedo rwot. 23Rekoboam obedo katic ki ryeko mada, opoko awobene mogo i dul lobo ducu ma i Juda ki Benjamin, ci oketogi i dog taun madito me cel gogo ducu, ki opoko botgi cam madwong, dok bene onyomo botgi mon.