2 Tekwaro 12

Rwot Cicak me Ejipt omonyo Juda

(1 Luk 14:21-28)

1Ka ker pa Rekoboam dong omoko maber, kun mede ki cung matek, en kacel ki jo Icrael ducu gucako bwoto Cik pa Rwot. 2I mwaka me loc pa Rekoboam me abice, en aye Cicak rwot me Ejipt obino kwede kalweny ikom jo ma i Jerucalem, pien gubwoto Rwot woko. 3Ci gubino ki gadigadi lweny alip acel ki miya aryo, ki lulweny ma giringo ki aguragura alip pyere abicel. Ki lwak dul mony ma welgi pe kwane gubino kwede ma gua ki i Ejipt, jo Libya, jo Cukiim, ki jo Etiopia. 4Ci en omako taun madito ma kirumu ki cel gogo ma i Juda ducu nio kwede wa i Jerucalem. 5Ci Cemaya ma lanebi ocito bot Rekoboam ki bot rwodi me Juda, ma onongo gin ducu gucoke gitye i Jerucalem pi lworo Cicak ka owaco botgi ni, “Rwot owaco kuman ni, ‘Wun wutyeko bwoto an woko, pimeno an bene atyeko miyowu i cing Cicak.’” 6Rwodi me Icrael ducu kacel ki rwot gumwole woko, omiyo guwaco ni, “Rwot loke tye kakare.” 7Ka Rwot Lubanga oneno ni gumwole ken gi, ci lok pa Rwot obino bot Cemaya ma waco ni, “Gin gumwole ken gi; pe dong abityekogi woko, ento dong abilarogi, pe dong abitoyo akemona ikom Jerucalem ki i cing Cicak. 8Ento gibibedo lutice, ka wek gunge tic kweda ki dok me tic ki luloc me lobo mukene bene.” 91

Kitmeno Cicak rwot me Ejipt ocako bino kalweny ikom Jerucalem, ci oyako jami ma kikano i Ot lim pa Rwot Lubanga, ki jami ma kikano i ot lim pa rwot Rekoboam. En oyako woko ducu, dok oyako lwak kwot mapol me jabu mayam Solomon otiyogi. 10Rwot Rekoboam dok otiyo lwak kwot mapol mukene; otiyo kwot me mola, ci omiyogi i cing ludito pa lugwok rwot ma gigwoko dogola ot pa rwot. 11Ikare ducu ma nongo rwot cito i Ot pa Rwot Lubanga, lugwok en yam gimako kwot, ka dok gidwoko kakagi i ot kicika pa lugwok rwot. 12Ka dong en omwole kene ci akemo pa Rwot oa woko ki ikome, ci pe omiyo kityekogi woko liweng, ci kwo odoko yot i Juda.

Ladol lok me loc pa Rekoboam

13Kitmeno Rekoboam omoko ker mere matek i Jerucalem dok obedo kaloc bene, Rekoboam ocamo ker ma mwaka me dite romo pyere angwen wiye acel, ci obedo kaloc i Jerucalem pi mwaka apar wiye abiro, Jerucalem ma en aye taun madit mayam Rwot oyero ki ikin kaka ducu me Icrael pi keto iye nyinge wek ki wor. Nying min Rekoboam obedo Naama ma anyira Ammon. 14En con obedo katiyo gin marac, pien pe oketo cwinye pi yenyo miti pa Rwot.

15Lok kom Rekoboam mudonge ducu, nia i acaki nio i agikine, ki tyeko coyone i Buk me Tekwaro ma Lanebi Cemaya ocoyo, ki i Buk ma Lanebi Iddo ocoyo. Lweny yam obedo tye ikin Rekoboam ki Jeroboam pi kare me locgi ducu, lweny obedo magwar ikin gi ma pe ogik. 16Rekoboam oto, oywe kacel ki kwarine, ci kiyike kacel ki kwarine i gangkal pa Daudi; wode Abija aye oleyo katyene.