2 Tekwaro 13

Lweny pa Abija gin ki Jeroboam

(1 Luk 15:1-8)

1I mwaka me apar wiye aboro me loc pa rwot Jeroboam, en aye Abija ocako loyo iye jo Juda. 2En obedo kaloc i Jerucalem pi mwaka adek. Nying mine Mikaya ma nya pa Uriel me Gibea.

Lweny obedo tye ikin Abija ki Jeroboam. 3Abija yam ocito kalweny kun woto ki monye ma gin oteka lweny, ma giromo alip miya angwen ma kiyerogi ayera. Ci Jeroboam orwayo dul monye pi cok ka lweny ikome ki jo ma kiyerogi matego alip miya aboro, ma gin twoni oteka lweny. 4Abija ocung iwi got Jemaraim matye i lobo gotgot ma i lobo Epraim, kun waco ni, “Winy loka, in Jeroboam ki wun jo Icrael ducu!” 5Pe wungeyo mono ni Rwot Lubanga pa Icrael omiyo ker bot Daudi ki likwaye i gicike ma kimoko ki kado, me loyo Icrael matwal? 6Jeroboam wod pa Nebat, ma latic pa Solomon wod pa Daudi, pud dok ojemo woko ikom rwode. 7Jo mogo ma konygi pe ma kitgi obedo atata gucoke bote, ci gubalo Rekoboam wod pa Solomon woko. Pien onongo Rekoboam pud tidi ma time bene pud woto atata, dok nongo bene pe otwero kwero tamgi.

8Nen kombedi wumito kwanyo ker pa Rwot woko ki i cing likwayo pa Daudi, pien ni wun wutye ki lwak madwong, dok wutye bene ki cal lutino twoni apaya me jabu ma Jeroboam otiyo me bedo lubangawu. 9Wun pe dong wuryemo ajwaki pa Rwot woko, ma gin likwayo pa Aron, ki Lulevi, ka dok wuketo ajwaki pirwu kenwu macalo jo ma i lobo mukeneni? Kun ka ngat mo obino bot wu, teke en mito ni ki kwere ci en okelo wod twon nyo nyogi romi abiro, ci tugi doko ajwaka cut pi jogiwu ma pe gin Lubanga kikomeni. 10Ento ki tung botwa, Rwot en aye Lubangawa, peya wabwoto en, wan watye ki ajwaki ma gitiyo ki Rwot ma gin aye likwayo pa Aron, ki Lulevi ma gikonyogi ki tic. 11Odiko ki odiko ki otyeno ki otyeno, kiwango gitum awanga ki odok eceta ma ngwece kur, gicano mugati inyim Rwot iwi meja me jabu ma kiliyo maber, dok gigwoko lacib mac me jabu wek mace obed kalyel otyeno ki otyeno; ci wan watye kagwoko cik ma mako tic pa Rwot Lubangawa, ento wun wutyeko bwoto en woko. 12Nen, Lubanga tye kwedwa, tye katelo wiwa, ki ajwakine gitye ki tum ma gikutu me ywayo mony me lweny ikomwu. Wun awobe pa Icrael, pe wulweny ikom Rwot, Lubanga pa kwariwu, pien pe wutwero loyo mony.

13Jeroboam onongo ocwalo dul mony gukane woko me bino ikomgi ki yo ngegi; kitmeno onongo monye tye inyim jo Juda, ki jo ma gubutu gurumu piny woko tye tung ngegi. 14Ka jo Juda guneno, ci gunongo ni mony tye inyimgi ki i ngegi bene; ci gucako kok bot Rwot, kun ajwaki gikutu tum. 15Ci jo Juda gucako wayu me lweny. Ikare ma jo Juda gudange, Lubanga oloyo Jeroboam woko, omiyo jo Icrael ducu guringo woko ki inyim Abija ki jo Juda. 16Jo Icrael guringo woko, ci Lubanga omiyogi i cing Abija. 17Abija ki jone gunekogi ki nek malit tutwal; ci jo ma guto giromo alip miya abic ki ikom jo ma kiyerogi ayera ki ikin jo Icrael. 18Kiloyo jo Icrael kitmeno, pien jo Juda ma oloyogini onongo gujenge ikom Rwot Lubanga pa kwarigi. 19Abija olubu kor Jeroboam ci omayo taun madito mogo pa jo Icrael woko ki bote, Betel ki gangi matino ma ingete, Jecana ki taun madito ki matino ma ingete, ki Epron ki taun madito ki matino ma ingete. 20Jeroboam pe dok olimo tek mo wacel ikare pa Abija; dok Rwot opwode, ci oto woko. 21Ento Abija omede odoko tek, onyomo mon apar wiye angwen, onywalo kwedgi lutino awobe pyere aryo wiye aryo ki anyira apar wiye abicel. 22Lok kom Abija mudonge ducu, ma nyutu kite mayam oloko, kityeko coyone i Buk pa lanebi Iddo.