2 Tekwaro 14

Rwot Aca otayo mony pa Etiopia

(1 Luk 15:9-12)

1Abija oywe kacel ki kwarine, ci kiyike i gangkal pa Daudi; wode Aca aye oleyo katyene. Ikarene lobo oywe mot ki kuc pi mwaka apar. 2Aca yam obedo katiyo gin maber dok manen atir iwang Rwot Lubangane. 3En okwanyo keno tyer ki wang jogi ma iwi godi pa lurok woko, omuku wir jogigi bene, ka dok otongo yen ducu ma kicomo pi woro jok ma dako ma kilwongo Acera oreto woko piny. 4Ka dok ociko jo Juda ni gubin bot Rwot, ma Lubanga pa kwarigi, dok gugwok pwonye ki loke ki gin ducu ma en ociko. 5En bene yam omuku wang jogi ma i taun madito ducu ma i Juda, okwanyo keno tyer me wango odok eceta ducu, ci ker okwe mot ikarene. 6Ogero taun madito ma kirumu ki cel gogo i Juda, pien lobo onongo okwe mot. Pe obedo ki lweny pi lwak mwakanu ducu, pien Rwot onongo omiye kuc. 7En owaco bot jo Juda ni, “Wageru taun madito magi, warumugi woko ki cel ma wagero ikom odi matego ma ocudu malo, ci waket bene dogola iye ma kicego ki rii; lobo dong pud mewa, pien wabedo kabino bot Rwot Lubangawa, wabedo kabino bote ci en omiyowa kuc i kabedo ducu.” Gugedo dok gubedo ki lonyo madwong. 8Aca obedo ki lumony ma gua ki i Juda ma giromo alip miya adek, ma gitye ki kwot mapol ki tongi, ki lumony ma gua ki i Benjamin ma giromo alip miya aryo ki pyere aboro ma gutingo kwot mapol, ma gin bene lucel atum; gin ducu twoni oteka lweny ma gitego.

9Jera ma Laetiopia obino kalweny ikomgi ki mony maromo jo milion acel ki gadigadi miya adek; gubino guo cok ki Mareca. 10Ci Aca ocito karwate kwede, kun guryeyo monygi i nota Jepata i Mareca. 11Aca okok bot Rwot Lubangane ni, “Ai Rwot, pe tye lakony mo macalo in, ma konyo jo magoro kun lwenyo pirgi ikom jo matego. Konywa, ai Rwot Lubangawa, pien wa geno in, wabino kalweny ikom lwak man madwongi pi nyingi. Ai Rwot, in aye Lubangawa; pe i yee dano mo oloyo in.” 12Kitmeno omiyo Rwot oryemo jo Etiopia opoto woko ki inyim Aca ki inyim jo Juda, ci omiyo jo Etiopia guringo woko. 13Aca ki monye guryemo korgi nio wa i Gerar, ci guneko jo Etiopia matek ma dano mo acel pe obwot makwo; pien guket woko ata ki inyim Rwot ki monye. Jo Juda gutingo lwak jami madwong ma guyako gucito kwede. 14Guturu taun madito ducu ma gurumu Gerar, pien Rwot omiyo lworo opoto ikomgi. Guyako taun madito ducu, pien onongo jami me ayaka dwong i igi tutwal. 15Guputu kema pa jo mayam wegi dyangi, guyako romi madwong tutwal ki kinagagu. Ci gudok kwede cen i Jerucalem.