2 Tekwaro 15

Aca odwoko cwiny jone ikom Rwot

(1 Luk 15:13-15)

1Cwiny pa Lubanga obino ikom Ajaria wod pa Oded, 2omiyo en ocito orwate ki Aca, ci otite ni, “Winy an, Aca, ki jo Juda ki Benjamin ducu. Rwot tye kwedwu, kace wun wutye kwede. Ka wuyenyo en, ci wubinongo en, ento ka wubwoto en, en bene bibwotowu. 3Jo Icrael onongo gubedo labongo Lubanga me ada pi kare ma lac, wa ajwaka ma pwonyogi bene onongo peke, dok gubedo labongo cik. 4Ento ikare ma arubaruba madwong odiyogi ci guloke bot Rwot, Lubanga pa Icrael, kun giyenyo en, omiyo gunongo en. 5Ikare meno ducu onongo ngat mo pe tye ki kuc me kato woko nyo kadi me dwogo cen i gang, pien cwiny dano orube woko pi can mapatpat ma obedo kapoto ikom jo ma gibedo i lobo ducu. 6Ci kin gi opoke woko atata, rok lwenyo ki rok wadi ki taun madit ikom taun madit wadi, pien Lubanga odiyogi ki can ikit yo mapatpat. 7Ento wun, cwinywu obed tek! Pe wuwek badwu okwe woko ki bedo nyabo, pien Lubanga biculu wang ticwu.”

8Ka Aca owinyo lok meno ducu, ma lanebi Ajaria wod pa Oded otitoni, ci loke ocuku cwinye odoko tek, omiyo ocako jwero cal jogi me kipyeda woko ducu ki i lobo Juda ki Benjamin ki i taun madito ducu ma en omayogi i lobo godi ma i Epraim, ci oyubu keno tyer pa Rwot mayam tye inyim kicika ma kidonyo kwede i Ot pa Rwot. 9En ocoko jo Juda ducu ki jo pa Benjamin, ki jo ma gua i Epraim ki Manace ki Cimeon, ma onongo gibedo ikin gi, pien onongo jo mapol gudak gua ki i Icrael gukobo bote pien guneno ni Rwot Lubanga tye kwede. 10Ci gucoke i Jerucalem i dwe me adek i mwaka me apar wiye abic me loc pa Aca. 11Ci gutyero gitum bot Rwot inino meno, kun kikwanyo ki ikom jami ma gukelo, mayam guyako, twoni maromo miya abiro ki romi alip abiro. 12Ci gucako keto gicike me tic bot Rwot, Lubanga pa kwarigi, ki cwinygi ducu ki tipugi ducu; 13ki dok bene guciko matek ni ka ngat ma pe bitic bot Rwot, Lubanga pa Icrael, ci myero kineke woko, kadi bed dano matidi nyo dano muteggi, laco nyo dako. 14Ci gucako kwongo kwong bot Rwot ki dwon malongo, kun gidange, ma gikutu tumgu ki bilagu. 15Ci jo Juda ducu cwinygi obedo yom pi kwongo kwong man; pien gukwongo kwong ki cwinygi ducu, kun gudwogo bot Rwot pi cobo mitine dok gunongo en, ci Rwot omiyo botgi yweyo ki oweko gubedo ki kuc ikin gi ki lobo ma orumugi dyere.

16Rwot Aca pe orwo, en oryemo wa minne Maaka woko, pe oye ni omede ki bedo daker pien en otiyo cal me kipyeda pi Acera ma jok ma dako. Aca otongo cal joke ongido woko, ci owango woko i nota kulu Kidron. 17Ento wang jogi ma iwi godi pe kimukugi woko ducu ki i Icrael. Kadi bed kumeno, Aca obedo ki lengic ikom Rwot pi kare me kwone ducu. 18En okelo i Ot pa Rwot mot ma wone odyero, kacel ki mere kikome bene ma en odyero, ryal ki jabu ki weergu. 19Lweny kong dok obedo peke i lobo nio wa i mwaka me pyere adek wiye abic me loc pa Aca.