2 Tekwaro 16

Icrael oywayo mony ikom Juda

(1 Luk 15:17-22)

1I mwaka me pyere adek wiye abicel me loc pa Aca, Baaca rwot pa jo Icrael ocito ka ywayo monyo ikom jo Juda, ci orumu taun me Rama ki cel matek, wek ogeng dano cito woko nyo bino bot Aca rwot me Juda. 2Ci Aca okwanyo ryal ki jabu ma i ot kano lim pa Rwot Lubanga ki ma i ot pa rwot, ci ocwalo bot Ben-adad rwot me Ciria, mayam tye bedo i Damaciko, kun waco ni, 3“Wek an ki in waribe kacel, kit macalo ribe con obedo tye ikin wora ki woruni. Nen, atyeko acwali ryal ki jabu; cit wek i citi itur ribe matye ikin in ki Baaca rwot me Icraeli woko, wek en oa woko ki bota.” 4Ben-adad owinyo lok pa rwot Aca, ci ocwalo ludito monye kamonyo taun madito pa jo Icrael, ci guloyo Ijon, Dan, Abel-maim, ki taun madito ducu me kano cam ma i lobo pa jo Naputali. 5Ka Baaca owinyo loke ci en oweko gero cel Rama woko, ci ogiko tice iye. 6Rwot Aca olwongo jone ki i Juda ducu, ci guyweko lutino godi ducu ma i Rama kacel ki lwak bao, mayam Baaca obedo ka gedo kwede, ci ogero kwede cel i Geba ki Mijpa.

Lanebi Kanani

7Ikare meno Kanani ma lanebi obino bot rwot Aca, ci owace ni, “Pien in dong i geno rwot me Ciria, ma pe ibedo ki gen ikom Rwot Lubangani, omiyo mony pa rwot me Icrael guringo gubwot woko ki boti. 8Onongo mony pa jo Etiopia ki pa jo Libya yam pe dit tutwal ma gitye ki lwak gadigadi lweny ki wegi aguraguragu? Ento in ibedo ka eno Rwot, ci oweko en omiyogi i cingi. 9Pien wang Rwot neno lobo ducu, me nyutu teke bot jo ma gibedo ki lengic ikome. In itimo lok me mingo mada i lok man; pimeno cake tin in ibibedo ki lweny.” 10Cut kiniga omako Aca ikom lanebi, ci okete i mabuc, otweye ki okol, pien ojul ikome pi lok meno. Ka dok oketo can ikom jo mogo bene matye ikin lwak ikare meno.

11Lok kom Aca nia i acakine nio i agikine ki tyeko coyone i Buk pa Luker me Juda ki me Icrael. 12I mwaka pyere adek wiye abongwen me loc pa Aca, en aye two omako iye tyene, ci twone omede marac mada; ento i twone ni en pe oyenyo kony ki bot Rwot, obedo mere kayenyo kony ki bot ludaktar. 13Aca oto i mwaka me pyere angwen wiye acel me loce, ci en oywe kacel ki kwarine. 14Kiyike i lyel ma onongo en okwinyo pire kene i taun madit me kal pa Daudi. Gupyelo kome iwi kitara ma kiketo iye lwak angwece mapatpat ma kiyubu ki diro pa luyub angwece; ka dok gumoko mac madit mada pi miyo ki en deyo.