2 Tekwaro 17

Ker pa Yekocapat omoko matek

1Yekocapat ma wod pa Aca aye oleyo katyen wone, ci oyubu monye odoko tek mada ikom jo Icrael kun tayogi woko ki i lweny. 2Oketo mony i taun madito ma kirumu ki cel gogo ma i Juda ducu, ka dok oketo ludito wi mony oromo i lobo Juda ducu ki taun madito ma i Epraim mayam wone Aca omayogini. 3Rwot ogwoko Yekocapat, pien en obedo kalubu kit pa wone ma con otiyo boteni; en pe obedo ka woro nyo yenyo kony ki bot lwak lubanga Baalgu. 4En obedo kayenyo kony ki bot Lubanga pa wone ki lubu cike ducu, pe bene obedo kalubu kit pa jo Icrael. 5Pieno Rwot omoko kere matek i cinge; ka jo Juda ducu gubedo kakelo lim ajog bot Yekocapat; ci en onongo tye ki lonyo madwong wa ki deyo bene. 6En obedo ki awaka madit me lubu kor Rwot Lubanga dok me tic bote; ci en omuku wang jogi bene ducu ma iwi godi woko ki i Juda, kacel ki yen ma kicomo pi woro Acera ma jok ma dakoni.

7I mwaka me adek me loce ocwalo rwodine Ben-kail, Obadia, Jekaria, Netanel ki Mikaya ka pwony i taun madito ma i Juda. 8Medo ikomgi en dok ocwalo Lulevi magi, Cemaya, Netania, Jebadia, Acael, Cemiramot. Yekonatan, Adoniya, Tobiya ki Tob-adoniya; ki ajwaki ma onongo guwoto kwedgi obedo Elicama ki Jekoram. 9Gucako pwony i Juda, ma gitye ki buk me Cik pa Rwot; ci gubedo bene kawot i taun mukene ducu me Juda kun gipwonyo iye dano.

Yweka pa Yekocapat

10Ci lworo ocako mako ker ducu ma gurumu lobo me Juda, ci pe guero lweny ikom Yekocapat. 11Lupiliciti mogo gukelo motgi bene bot Yekocapat, guculu bote ryal, jo Arab bene gutero bote nyogi romi alip abiro ki miya abiro, ki nyogi dyegi alip abiro ki miya abiro. 12Ci ker pa Yekocapat ocako dongo omede odoko madit mada. En ogero cel gogo ki taun madito me kano jami i Juda. 13En obedo ki odi madito me kano jami i Juda. Obedo ki lwak acikari i Jerucalem ma gin twoni oteka lweny. 14Man aye onongo welgi ma kiryeyo malubu dog odi pa kwarigi. I ot pa Juda ludito mony maloyo jo alip gin ene: Adna ladit me mony, kacel ki twoni oteka lweny alip miya adek; 15ki ma lubu en obedo Yekokanan ladit me mony, maloyo jo alip miya aryo ki pyere aboro; 16ki ma olube obedo Amacia wod pa Jikri, ma odyero kome pi tic pa Rwot, kacel ki jo alip miya aryo ma gin twoni oteka lweny. 17I ot pa Benjamin onongo tye Eliada, ma en twon oteka lweny, kacel ki jo alip miya aryo ma gitye ki atum ki kwot; 18ki ngat ma olubu en obedo Yekojabad, kacel ki jo alip miya acel ki pyere aboro ma guruke pi lweny. 19Magi aye jo ma gubedo lutic pa rwot, medo ikom jo mayam rwot oketogi i taun madito ma kirumu ki cel gogo ma i Juda.