2 Tekwaro 18

Lanebi Mikaya ociko Akab

(1 Luk 22:1-28)

1Yekocapat onongo tye ki lwak lonyo madwong wa ki yweka bene; ka en ocako ribe ki Akab, ci omiyo wode onyomo nya pa Akab. 2Lacen inge mwaka mogo manok en ocito bot Akab i Camaria. Akab oneko lwak romi ki twoni dyangi mapol ata pire ki pi lwak ducu ma onongo gitye kwede. Man otimo pi bito en wek ocit kwede kalweny ikom Ramot-gilead. 3Akab rwot me Icrael openyo Yekocapat rwot me Juda ni, “I bicito kweda kalweny ikom gang me Ramot-gilead?” Yekocapat ogamo dog rwot me Icrael kun wace ni, “An ki in wan acel, lwaka gin aye lwaki. Wabibedo kwedi i mony.”

4Yekocapat owaco bot rwot me Icrael ni, “Kong i kwong penyo lok ki bot Rwot.” 5Rwot me Icrael nongo ocoko lwak lunebine ducu kacel, gucoke gin miya angwen. En openyogi ni, “Wacit kalweny ikom Ramot-gilead, nyo pe waciti?” Gin lunebi gugamo ni, “Tugi cito cut, rwot, pien Lubanga bimiyogi icingi.” 6Ento Yekocapat dok owaco ni, “Lanebi mo mukene pa Rwot pe tye kany, wek kong dok wapeny doge?” 7Rwot me Icrael ogamo dog Yekocapat ni, “Pud tye dano mo acel ma myero wapenye wek wawiny dog Rwot ki bote, en Mikaya wod pa Imla; ento cwinya dage matek, pien peya otita kit lok mo maber, en tita lok marace keken.” Yekocapat ogamo doge ni, “Pe kumeno, rwot, wek lok kitmeno obedi.” 8Rwot me Icrael ocako lwongo ladit mo ci owace ni, “Cit i cikel Mikaya wod pa Imla oyotoyot.” 9Onongo rwot me Icrael ki Yekocapat rwot me Juda gubedo iwi komkergi, ma guruku jor kergi mabeco; gubedo kwede i laro moyo me dino bel ma inget dogcel ma ki donyo kwede i Camaria, kun lunebi ducu gitye katito lok inyimgi. 10Jedekia wod pa Kenaana otiyo cal tung lee me nyonyo pire kene, ci owaco ni, “Rwot owaco kuman ni, ‘I bitwomo jo Ciria kit magi nio ka ityekogi woko ducu.’” 11Ci lunebi ducu gutito lok ma kitmeno bene, kun giwaco ni, “Tugi cito i Ramot-gilead, ci ibiloyo; Rwot Lubanga bimiyogi i cingi, rwot.”

12Lakwena ma ocito kalwongo Mikaya ni obino owace ni, “Nen ba, lok pa lunebi ducu obedo me cuku cwiny rwot; pieno wek loki bene obed marom ki meggi, loki bene obed lok me cuku cwiny.” 13Ci Mikaya ogamo doge ni, “Macalo Rwot tye makwoni, gin ducu ma Lubangana owaca, en aye abilokone.” 14Ka Mikaya oo bot rwot, ci rwot openye ni, “Mikaya, wacit kalweny ikom Ramot-gilead, nyo pe waciti?” En ogamo ni, “Tugi cito cut, ci ibiloyo; Rwot bimiyogi i cingi.” 15Ento rwot dok owace ni, “An mono abiciko in i nying Lubanga tyen adi nio ka ibiloka lok ada keken i nying Rwot?” 161Ci Mikaya owaco ni, “Anene jo Icrael ducu guket woko lijayi iwi godi, macalo romi ma gipe ki lakwat; dok Rwot bene owaco ni, ‘Joni laditgi peke; wek ngat acel acel odok gire i pacone ki kuc.’” 17Rwot me Icrael owaco ki Yekocapat ni, “An pe onongo awaco ni, Mikaya pe bitito lok mo maber ma otika, ento bitito marace?” 18Mikaya ogamo ni, “Pimeno kong dok iwiny lok pa Rwot mono. Abedo kaneno Rwot Lubanga ma en obedo iwi komkere, kun lwak lumalaika ducu gucung kangete ki yo tung bade ma lacuc ki yo tung bade ma lacam. 19Rwot owaco ni, ‘Anga mono ma bibito Akab rwot me Icrael, wek ocit oto i Ramot-gilead?’ Ci lumalaika gubedo kawaco lok mapatpat. 20Lacen kit cwiny mo obino ci okati wa anyim, ci ocung wa inyim Rwot Lubanga, kun waco ni, ‘An aye abibito en.’ Ci Rwot openye ni, ‘Ibibito en ningning?’ 21En ogamo ni, ‘An abicito, ci abibedo cwiny ma lagoba kun aloko ki i dog lunebine ducu.’ Ci Rwot Lubanga ogamo ni, ‘In ibibite, ci biye loki; dong icitim kitmeno.’ 22Ci Mikaya omoko loke kitman ni: Kombedi in dong ineno ka Rwot otyeko keto cwiny ma lagoba i dog lunebini magi ducu; Rwot dong otyeko ciko pi kelo lok marac ikomi.”

23Ci Jedekia wod pa Kenaana onyiko cok bot Mikaya ci odongo leme ki cinge, kun en waci, “Cwiny pa Rwot dok oa ki ikoma ningning ka okobo oloko boti?” 24Mikaya owaco ni. “Meno ibiniang iye inino ma ibidonyo i kicika ma i tyelo wek i kane iye.” 25Rwot Akab me Icrael owaco ni, “Wumaka Mikaya woko, wudwoke cen wa bot Amon ma laloyo me gang, ki bot Yoaci ma wod pa rwot. 26Icit iwac ki gin ni, ‘Akab owaco kuman ni, wuket dano man i buc, dok wumiye ocam cam me buc, mugati ki pii keken, nio ka abidwogo paco ki kuc.’” 27Mikaya ogamo ni, “Kace idwogo paco ki kuc, ci pe Rwot aye oloko ki idoga.” Ci dok owaco ni, “Wun rok ducu dong wuwiny!”

To pa Akab

(1 Luk 22:29-35)

28Kitmeno rwot me Icrael ki Yekocapat rwot me Juda gucako cito i Ramot-gilead. 29Rwot me Icrael owaco bot Yekocapat ni, “An abiruke macalo dano mo ata ka dong acako cito kalweny, ento in iruk jori me ker.” Rwot Akab ocako ruke macalo dano mo ata, ka ocito kwede i mony. 30Onongo rwot me Ciria otyeko ciko ludito monye ma giloyo gadigadine me lweny ni, “Pe wucilweny ikom dano mo matidi nyo madit, ento wucilweny ikom rwot me Icrael keken.” 31Ka ludito mony ma giloyo gadigadi lweny guneno Yekocapat, ci guwaco ni, “Meno aye rwot me Icrael kikome.” Ci guloke kalweny ikome. Yekocapat ocako dange ki koko bot Rwot kun mwoc, cutcut Rwot okonye. Ci Lubanga okwanyogi woko ki bote. 32Ka ludito mony guneno ni pe en rwot me Icrael, ci guloke gudok woko cen gubwoto lubu kore. 33Ento dano mo otelo atume ocelo ata, ci ocelo kwede rwot me Icrael atura; atero obaro kin nyonyo me gengo kore ki nyonyo mukene me gengo kome ma obedo macalo pok rec. Rwot Akab owaco ki laryem gadigadine ni, “Loke i dok cen wek i cit ikwanya woko ki iwang lweny, pien ret otyeko maka woko.” 34Ci lweny odoko malyet inino meno, rwot me Icrael obedo ojenge i gadigadine kun wange okemo jo Ciria nio wa otyeno, ka ocako to ma ceng cito kapoto.