2 Tekwaro 19

Lanebi Yeko ojuku Yekocapat

1Yekocapat rwot me Juda odok gire cen maber wa i ode i Jerucalem. 2Ento Yeko wod pa Kanani ma lanen piny aye ocito karwate kwede, ci owaco bot rwot Yekocapat ni, “In aye i myero me konyo jo maracu, ki maro jo ma gidag Rwot? Nen akemo pa Rwot dong otyeko bino me lweny ikomi. 3Ento kadi bed kumeno gin mabeco tye ka nen ikin jami ma ceng i tiyogi, pien ityeko jwero yen ma kicomo pi woro jok Acera woko ducu ki i lobo man, ki me aryone in iketo cwinyi katiyo miti pa Rwot Lubangani.”

Alokaloka mabeco ma Yekocapat okelo

4Yekocapat obedo i Jerucalem; dok owoto ikin dano cake ki i Beer-ceba nio kwede wa i lobo godi me Epraim, ci en odwoko cwiny dano ikom Rwot Lubanga pa kwarigi. 5Dok oyero lungolkop ki i taun madito ducu ma kirumu ki cel gogo matye i Juda, ki taun madito ducu, 6ka dok ociko lungolkop ni, “Wubed ma wugwoko tamwu ikare ma wungolo kop; pimeno pe otim gin ma wutiyo pirwu kenwu, pien pe wubingolo kop pi dano ento pi twero pa Rwot Lubanga; dok en tye kwedwu ikare ma wungolo kop. 7Pimeno wulwor Rwot kun wugwoke bene ikom gin ducu ma wutiyo, pien Rwot Lubangawa pe mito ni kingol kop kimed ki goba ma nongo loke pe tye atir, nyo kadi dworo kor dano mo, ki dok bene pe mito ni kigam lim me wilo loyo kop.”

8Ki i Jerucalem Yekocapat dok oyero Lulevi mogo, ma ajwaki, ki ludito wi kaka me Icrael ducu, me bedo lungolkop pa Rwot ki me winyo pido ma pyem tye iye ma ngolo kope tek. Ci gin gubedo katic i Jerucalem. 9Ka ocikogi ni. “Wubitiyo kun wulworo Rwot, kun wubedo ki gen, ki dok wubitic bote ki cwinywu ducu. 10Kace utmegiwu ma gibedo i taun madito gukelo lok me pido mo mamako lok me oyo remo, ki mamako Cik pa Lubanga, nyo lok mo ma Lubanga ceng ociko nyo ongolo, wun aye wubipwonyogi, wek pe guting alii mo inyim Rwot, wek akemo pa Rwot Lubanga pe obin ikomwu ki ikom utmegiwu ducu. Wubitiyone kitmeno, wek pe wuting bal alii mo. 11Dok wunen, Amaria ajwaka madit en aye ma biloyowu ikom lok pa Rwot ducu; gin ki Jebadia wod pa Icmael, ma laloyo ma i ot pa Juda, en aye maloyo lok ma bot rwot ducu; ki Lulevi gibitic botwu macalo lukaraniwu. Wubed ma cwinywu tek ka wulubu lok man ducu ma aciko, Rwot myero okony jo ma kitgi atir!”