2 Tekwaro 20

Lweny ikom jo Moab ki jo Ammon

1Lacen jo Moab ki jo Ammon ki jo mogo me Meun gubino kalweny ikom Yekocapat. 2Jo mogo gucito ci gutito bot Yekocapat ni, “Mony madwong tye kabino kalweny ikomi ma gia ki i Edom, gua ki loka nam; nen, dong gitye wa i Kajajon-tamar” (ma en aye En gedi). 3Ci lworo ocako mako Yekocapat matek, en kikome dong ocako yenyo kony ki bot Rwot cut, ka dok ociko pi rii kec i lobo Juda ducu. 4Ci jo Juda gucoke kacel pi yenyo kony ma a ki bot Rwot Lubanga; dano oa wa ki i taun madito ducu me Juda gucito kayenyo kony ki bot Rwot Lubanga.

5Yekocapat oa malo obino ocung inyim jo Juda ki jo Jerucalem ma gucoke. En obino ocung inyim Ot pa Rwot, ki inyim dyekal manyen, 6ka dong olego ni, “Ai Rwot, Lubanga pa kwariwa, in aye pe Lubanga ma i tye i poloni? Pe in aye iloyo lwak ker ducu matye i lwak roki ducu bo? Tek ki tweroni tye i cingi, pieno pe tye ngat mo matwero juku in. 71Pe in aye Lubangawa, ma oryemo jo ma i loboni ki inyim joni jo Icrael, ci imiyo bot likwayo pa Abraim laremi matwali? 8Ka gubedo iye, ci gugero piri kabedo Maleng pi miyo deyo i nyingi, kun giwaco ni, 9‘Ka gin mo marac opoto ikomwa, macalo lweny nyo lok ma in ingolo ikomwa, nyo two gemo, nyo kec, ci wan ka wabicung inyim Ot man, pien nyingi tye i Ot man, ci wabikok boti pi aroma can ma watye iye wa inyimi; ci in ibiwinyo ci ilarowa.’ 102

Dong inen jo Ammon, jo Moab, ki jo me got Ceir, mayam in pe iye Icrael omonyogi ikare ma gua ki i lobo Ejipt, mayam kwariwa gubwoto odong ma pe kijwerogi wokoni. 11Nen kit ma dong giculuwa kwede ki bino karyemowa woko ki i loboni mayam imiyowa wacamo me bedo ginaleyawa. 12Ai Lubangawa in pe ibingologi kop? Pien wan pe watye ki teko mo me lweny ikom mony man madwongi ma gubino kalweny ikomwani. Pe wangeyo giwa gin ma omyero watim, ento waketo wangwa keken ikomi ni in aye ikonywa ikom lukwor magi mateki.”

13I karenu onongo jo Juda ducu gubino gucung inyim Rwot, co madito ki mon gi ki lutinogi. 14Ci Cwiny pa Rwot obino opoto ikom Jakajiel wod pa Jekaria, wod pa Benaya, wod pa Jeyel, wod pa Matania, ma Lalevi ma jo pa Acap; onongo en tye i dye kal i coke meno. 153En owaco ni, “Wuwiny, wun jo Juda ki jo Jerucalem, ki in rwot Yekocapat: Rwot Lubanga owaco botwu kitman ni, ‘Pe wulwor, dok bene cwinywu pe opoti pi lwak man madwongi; pien lweny man pe mewu ento pa Lubanga gire. 16Diki wucit kalweny ikomgi; nen, gibibino kun giwok ki iwi cere me Jij; wubinongogi wa kama nota ogik iye, tung kunyango me tim Jeruel. 174Lweny man pe wun aye wubilwenyone, wun wubed i kabedowu, wucung iye mot, wek wunen kit ma Rwot bilarowu kwede tin, wun jo Juda ki Jerucalem.’ Pe wulwor, pe cwinywu opoti, diki wucit kalweny ikomgi, Rwot bibedo kwedwu.”

18Yekocapat okulu wiye olungo wange piny i ngom, ci jo Juda ducu ki jo Jerucalem guryebe piny inyim Rwot, kun giworo Rwot. 19Lacen Lulevi ma jo pa Kokat ki jo pa Kora, gucung kapako Rwot, Lubanga pa Icrael, ki dwon gi malongo.

20Gua malo odiko con ci gucito i tim Tekoa. Ikare ma gicito, Yekocapat ocung ci owaco botgi ni, “Wuwiny an, wun jo Juda kacel ki wun jo ducu ma wubedo i Jerucalem! Wuye Rwot Lubangawu, ci wubicung matek; wuye lok pa lunebine, ci wubiloyo.” 21Ka otyeko penyo tam ki bot lwak, ci ocako yero jo ma myero gubed kawer bot Rwot kun gipake ma guruku bongo maleng kun gitelo kwede nyim mony, ma giwero kuman ni,

“Wumii pwoc bot Rwot,

pien mar mere ma pe loke bedo nakanaka.”

22Ka gucako wer ki pak, Rwot oketo mony ma gubutu pi kuru lweny ki jo Ammon, ki jo Moab, ki jo me got Ceir, ma gubino ikom Juda ni, ci kiloyogi woko. 23Pien jo Ammon ki jo Moab gubino kalweny ikom jo ma gibedo i lobo godi me Ceir, ci gujwerogi woko liweng. Ikare ma lweny tum ikom jo ma gibedo i Ceir, gin bene gucako neke keken gi.

24Ka jo Juda gua malo guito wa iwi lubele ma tung tim, ka guneno tung bot lwak monyi, ci guneno lwak kom dano ma oto ka gurade piny; ma acel mo pe obwot. 25Ka Yekocapat ki lwake gucito kayako jamigi, ci gunongo dyangi mapol, ki jami ki bongi ki jami me welgu, ma gubedo kayakone me bedo meggi nio ka tingone oloyogi. Gubedo kayako jami pi nino adek, ento jamine obedo dwong mukato kare. 26Inino me angwene gucoke i nota Beraka, pien gubedo kapwoyo Rwot ki kenyo; ma omiyo nying kabedo meno kilwongo ni nota Beraka nio wa onyo. 27Dano gudok cen, jo Juda ducu ki jo Jerucalem kun Yekocapat telo wigi; gudok cen i Jerucalem ki nyate, pien Rwot omiyo gubedo ki nyate pi loyo lumerokgi. 28Gubino i Jerucalem ki nangagi ki opuk ki obute wa i Ot pa Rwot. 29Lubanga omiyo lworo omako ker ducu ma i lobo mapatpat ikare ma guwinyo ni Rwot obedo kalweny ki lumerok pa jo Icrael. 30Kitmeno ker pa Yekocapat obedo mupye mot, pien Lubanga omiye yweyo i kabedo ma orumu ngete ducu.

Agiki me loc pa Yekocapat

(1 Luk 22:41-50)

31Kitmeno Yekocapat oloyo lobo Juda. Yekocapat ocamo ker ma mwaka me dite pyere adek wiye abic, ci obedo, kaloc i Jerucalem pi mwaka pyere aryo wiye abic. Nying mine Ajuba ma nya pa Cilki. 32En obedo kalubu kit pa wone Aca ducu; pe oloke oweko lubu kore; en obedo katiyo gin manen atir iwang Rwot. 33Ento wang jogi ma iwi godi pe kimuku woko; lwak ducu onongo pud peya guketo cwinygi ikom Lubanga pa kwarigi.

34Lok kom Yekocapat mudonge ducu, nia i acakine nio i agikine, kityeko coyo i Buk me Tekwaro pa Yeko Wod pa Kanani, ma kicoyo i Buk pa Luker me Icrael.

35Lacen Yekocapat rwot me Juda oribe gin ki Akajia rwot me Icrael, mayam obedo katiyo bal maracu. 36Oribe kwede pi payo mel mapol me cito i Tarcic; gubedo kapayo mel i Ejion-geber. 37Ento Eliejer wod pa Dodayaku me Mareca otito lok ma okemo Yekocapat, kun waco ni, “Rwot bijwero gin ma wutiyoni woko, pien ityeko ribe ki Akajia.” Ci mel ducu gutur woko, pe gucito i Tarcic.