2 Tekwaro 21

1Yekocapat oto ci en oywe kacel ki kwarine, ci kiyiko kacel ki kwarine i gangkal pa Daudi; wode Jekoram aye oleyo katyene.

Jekoram rwot me Juda

(2 Luk 8:17-24)

2En yam tye ki omegine, ma gin awobe pa Yekocapat: Ajaria, Jekiel, Jekaria, Ajaria, Mikael, ki Cepatia; gin ducu onongo awobe pa Yekocapat rwot me Juda. 3Won gi omiyogi mot madito, me ryal, me jabu, ki me jami mabeco me wel, ki taun madito mogo ma i Juda ma kirumugi ki cel gogo; ento en omiyo ker bot Jekoram, pien Jekoram obedo latin kayone. 4Ka Jekoram obedo wi komker pa wone ma dong kere omoko matek, ci oneko omegine woko ducu ki pala lucwan, kacel ki rwodi mogo ma i Icrael. 5Jekoram ocamo ker ma mwaka me dite pyere adek wiye aryo, ci obedo kaloc i Jerucalem pi mwaka aboro. 6Obedo kalubu kit pa luker me Icrael, kun tiyo kit macalo jo me ot pa Akab gutiyo; pien dakone nya pa Akab, obedo katiyo gin manen maracu iwang Rwot. 71Ento Rwot pe omito tyeko Juda woko ducu, pi latice Daudi, kit ma con ocike kwede bote ni ebimiyo en ki likwaye bibedo kaloc matwal. 82

I karene en aye jo Edom gujemo iye woko ikom loc pa Juda, ci guketo rwotgi pirgi ken gi. 9Jekoram okato loka kacel ki ludito monye ki ludito ma giloyo gadigadi lwenye ducu; en oa woko i dyewor olwenyo ikom jo Edom. Jo Edom onongo gurumu en woko kacel ki ludito ma giloyo gadigadi lwenye. 10Kitmeno Edom ojemo woko ikom loc pa Juda nio wa onyo. Ka dok Libna bene ocako jemo woko ikom loce i karenu, pien en otyeko bwoto Rwot Lubanga pa kwarine.

11Dok bene Jekoram ogero wang jogi iwi godi i lobo godi me Juda; en omiyo jo ma gibedo i Jerucalem gucako woro jogi, ma pe dong gitye ki gen ikom Rwot, omiyo Juda ongak woko. 12Cut en olimo waraga ma oa ki bot lanebi Eliya, ma wace ni, “Rwot Lubanga pa kwaru Daudi owaco kuman ni, ‘In pe ilubu kit pa woru Yekocapat, nyo kit pa Aca rwot me Juda, 13ento ibedo kalubu kit pa luker me Icrael, ityeko miyo jo Juda ki jo ducu ma gibedo i Jerucalem guworo jogi, macalo jo me ot pa Akab gumiyo jo Icrael guworo jogi; dok bene ityeko neko omegini woko ducu, jo me ot pa woru, ma onongo gibeco gikato in. 14Nen, Rwot bikelo can madwong ikom lwaki, ikom lutinoni, ikom moni, ki ikom jamini ducu; 15in kikomi ibibedo ki two matek two ma i cin ii, nio ka min ii bikati woko jwijwi pi two meno.’”

16Rwot omiyo kiniga omako jo Piliciti ki jo Arab ma gibedo cok ki jo Etiopia; ci gubino gulwenyo ikom Jekoram. 17Ka gubino pi lweny ikom Juda gumonyo lobogi, ci guyako jami ducu ma gunongo. Gutero jami ma i ot pa rwot, ki awobene ki mone, guweko wode acel keken mudong, en aye Yekoakaj, ma wode matidine.

18Inge magi ducu Rwot opwode omiye two i cin iye ma pe twero cang. 19Ka omede inge mwaka aryo, ci min iye obino woko pi two meno, ci oto ki arem me kom madwong. Lwake pe gumoko mac wacel pi miye deyo kit ma kimoko kwede mac pi kwarine. 20En ocamo ker ma mwaka me dite pyere adek wiye aryo, ci obedo kaloc i Jerucalem pi mwaka aboro; cwiny dano mo pe ocwer pi tone. Kiyike i gangkal pa Daudi, ento pe ki yiko kome i lyel pa luker.