2 Tekwaro 22

Akajia rwot me Juda

(2 Luk 8:25-29; 9:21-28)

1Jo ma gibedo i Jerucalem guketo Akajia ma wod pa Jekoram matidine odoko rwot ma oleyo katyene; pien mony pa jo mayam gubino i gony kacel ki jo Arab gutyeko neko awobe madito woko ducu. Man aye gin ma omiyo Akajia wod pa rwot Jekoram me Juda ocamo ker. 2Akajia onongo dite romo mwaka pyere angwen wiye aryo ka ocamo ker, ci obedo kaloc ki i Jerucalem pi mwaka acel. Mine nyinge Atalia; en yam lakwar Omri. 3Akajia bene obedo kalubu kit pa jo me ot pa Akab, pien mine aye obedo kamiye tam me tiyo gin maracu. 4Ci obedo katiyo gin manen marac iwang Rwot, kit macalo jo me ot pa Akab gubedo katiyone; pien gin aye gubedo kamiye tam me tiyo gin marac ikare ma wone dong oto, ci gutere i to. 5En bene oye tamgi, ci ocito gin ki Jekoram wod pa Akab rwot me Icrael kalweny ki Kajael rwot me Ciria i Ramot-gilead. Jo Ciria guketo ret ikom Joram, 6ci en odwogo kamado rete i Jejreel, en aye wang ret ma jo Ciria guketo ikome ki i Rama ikare ma en olwenyo ikom Kajael rwot me Ciria. Akajia wod pa Jekoram rwot me Juda ocito kalimo Joram wod pa Akab i Jejreel, pien onongo kome lit.

Yeko oneko Akajia

7Lubanga onongo dong otyeko yubu ni Akajia bito ikare ma en bicito kalimo Joram. Pien ka en cito kunu ci onywako wot gin ki Jekoram pi rwate ki Yeko wod pa Nimci, ma Rwot onongo owiro wek otyek jo me ot pa Akab woko. 8Ikare ma Yeko tye kacobo lok ma Rwot ongolo ikom jo me ot pa Akab, en orwate ki ludito me Juda bene ki awobe pa omegi Akajia, ma gitiyo bot Akajia, ci onekogi woko. 9En obedo kayenyo Akajia, ci kimako en ki i Camaria kama okane iye. Ka kikele bot Yeko ci Yeko oneke woko. Ci guyike, pien guwaco ni, “En lakwar Yekocapat, mayam obedo kayenyo Rwot ki cwinye ducu.” Dano mo pe odong i ot pa Akajia maromo camo ker.

Atalia omayo ker tektek

(2 Luk 11:1-3)

10Ka Atalia min Akajia oneno ni wode oto woko, ci en ocako jwero jo me dog otker pa Juda woko ducu. 11Ento Yekocabeat nya pa rwot, otingo Yoaci wod pa Akajia, ci okwalo woko ki ikin awobe pa rwot ma kibinekogini, ci okano en ki lapidine i kicika mo me butu. Yekocabeat, ma nya pa rwot Jekoram obedo dako pa ajwaka Yekoyada, ma en lamin Akajia. En okano Yoaci woko ki bot Atalia kitmeno, ci omiyo Atalia pe oneke. 12Ci en obedo kwedgi pi mwaka abicel, kun ki kano en i Ot pa Lubanga ikare ma Atalia tye kaloyo lobo.