2 Tekwaro 23

Jemo ikom Atalia

(2 Luk 11:4-16)

1Ento i mwaka me abirone Yekoyada obedo ki tekcwiny kun ocamo co ci oweko, en oketo gicike ki ludito abic ma lulo buca mony pa jo miya, Ajaria wod pa Jerokam, Icmael wod pa Yekokanan, Ajaria wod pa Obed, Maceya wod pa Adaya, ki Elicapat wod pa Jikri. 2Ci guket i lobo Juda ducu, kama gubedo kacoko Lulevi ki i taun madito me Juda woko ducu, ki ludito wi kaka ma i dog odi me Icrael ducu, ci gubino kwedgi wa i Jerucalem. 31Lwak mucoke ducu guketo gicike ki rwotgi ki i Ot pa Lubanga. Ci Yekoyada owaco botgi ni, “Nen, man wod pa rwot ene! Wuwek en aye obed lalocwu, kit mayam Rwot oloko ikom likwayo pa Daudi. 4Man aye gin ma wubitiyo. Dong wun ajwaki ki Lulevi ma wua woko ki i dog tic inino me Cabit wubipoke i dul adek; dul acel me adek gubed lugwok dogola, 5ki dul acel me adek mukene gibikuru ot pa rwot, ki dul acel me adek gubed i dogola ma kilwongo ni Guti Ot; ki lwak ducu gubed idyekal me Ot pa Rwot. 6Pe wuwek dano mo odony i Ot pa Rwot, kono ajwaki ki Lulevi ma lutic keken aye gudony, pien gin jo maleng; ento lwak ducu gibigwoko Cik pa Rwot. 7Lulevi gibirumu rwot dyere, kun dano acel acel omako jami lwenye i cinge. Ento dano mo ata ma otemo donyo i Ot pa Rwot kibineke woko. Wubibedo ki rwot kama en bicito iye ducu.”

8Lulevi ki jo Juda ducu gutiyo gin ducu kit macalo ajwaka Yekoyada ociko botgi. Dano acel acel okelo lwake, ma onongo guweko dog ticgi inino me Cabit, gubino kacel ki jo ma gibino katic inino me Cabit; pien ajwaka Yekoyada pe oye jo ducu madong gutyeko ticgi inino meno me dok gang. 9Ajwaka Yekoyada ocako miyo ki ludito me mony lwak tongi ki kwot mapol madito ki matino ma onongo yam pa rwot Daudi, ma onongo tye i Ot pa Lubanga. 10En oketo lwak kagwoko rwot, kun dano acel acel omako jami lwenye i cinge, cake wa tung kupiny me ot nio kwede wa tung kumalo me ot, kun girumu keno tyer. 11Ka dong ocako kelo Yoaci wod pa rwot, oketo lalukana i wiye, ka omiye cik pa Lubanga mamako kit me loc i cinge, ka kitucu atir ni en dong rwot. Yekoyada ki awobene guwiro en ki moo, ci dano gudange ni, “Rwot obed kwo nakanaka!”

12Ka Atalia owinyo woo pa lwak ma guringo kun gipako rwot Yoaci, ci en ocito bot lwak wa i Ot pa Rwot. 13Ka ongiyo piny, ci oneno rwot Yoaci ocung kanget wir ki i dog Ot pa Lubanga, kun ludito me mony ki lukut tum gurumu rwot Yoaci, ki lwak jo ducu ma gua ki ikin gang gubedo kawoo ki tum kun cwinygi yom, ki luwer ma gumako jami wergi gutelo wer me kwero en. Ci Atalia oyeco bongone cut ka ocako kok ni, “Roro yai! Roro yai!” 14Ci ajwaka Yekoyada okelo ludito mony ma gubedo kacel ki monye, ci en ocikogi ni, “Wukel dakonu woko, pe wuwek obwot. Ka ngat mo olubu kore, ci wuneke woko ki pala lucwan.” Pien ajwaka onongo otamo ni pe omyero ki neke ki i Ot pa Rwot. 15Gumako Atalia, ci guwok kwede ki i dogola ma aguragura donyo kwede, guo wa i ot pa rwot ci guneke kenyo.

Alokaloka ma Yekoyada okelo

(2 Luk 11:17-20)

16Yekoyada ocako keto gicike ikin en ki lwak ducu ki rwot Yoaci wek gubed lwak pa Rwot. 17Lwak ducu gucako mol gucito i ot pa jok Baal, ci gumuku gureto woko piny; guturu keno tyere ducu, dok gungido cal jogine woko ducu matinotino, ci guneko Matan ajwaka pa Baal ki inyim keno tyere. 18Lacen Yekoyada oketo lukurpiny me gwoko Ot pa Rwot ite twero pa ajwaki ma Lulevi, ki Lulevi mayam Daudi opoko tic botgi pi bedo lugwok Ot pa Rwot, kun gityero gitum awanga bot Rwot, macalo kicoyo i Cik pa Moses, ki yomcwiny kacel ki wer, kit mayam Daudi oyubuni. 19Yekoyada dok oketo lugwok dogola i dogola Ot pa Rwot, wek dano mo ma kome kikeni pe odony iye. 20En dok okwanyo ludito mony, ki rwodi, ki lulo wi lwak, kacel ki lwak ducu, ci gucako kelo rwot Yoaci woko ki i Ot pa Rwot Lubanga kun gidore giwok ki i cel madit nio kwede wa i ot pa rwot. Ci guketo rwot Yoaci obedo piny iwi komker pa luker. 21Kitmeno lwak ducu cwinygi obedo yom; piny ocako kwe mot ki inge to pa Atalia ma kineke ki pala lucwan.