2 Tekwaro 24

Yoaci rwot me Juda

(2 Luk 12:1-16)

1Yoaci ocamo ker ma mwaka me dite tye abiro, ci obedo kaloc i Jerucalem pi mwaka pyere angwen. Nying mine Jibia me Beer-ceba. 2Yoaci obedo katiyo gin manen atir iwang Rwot pi kare me kwo pa ajwaka Yekoyada ducu. 3Yekoyada onyomo bote mon aryo, ci onywalo kwedgi lutino co ki anyira.

4Lacen Yoaci obedo ki tam pi yubu Ot pa Rwot. 5Ocoko ajwaki ki Lulevi, ci ocako waco botgi ni, “Wucit wa i gangi pa jo Juda, wek wucok lim ki bot jo Icrael ducu pi yubu Ot pa Lubangawa mwaka ki mwaka; ber wunen ni wutiyo tic man oyotoyot.” Ento Lulevi pe guruyu tiyone oyotoyot. 61Ma omiyo rwot olwongo Yekoyada ajwaka madit, openye ni, “Pingo pe iweko Lulevi gujogo lim ki bot jo ma bedo i Juda ki Jerucalem kit mayam Moses latic pa Rwot ociko ni myero ki gam ki bot lwak jo Icrael pi tic me Kema pa Rwot Lubanga?” 7Pien jo pa Atalia, ma en dako ma latim maraci, onongo dong yam guture woko pi donyo ki balo Ot pa Lubanga, pien gutero jami ducu mayam kidyero pi Ot pa Rwot, gutiyo kwedgi pi woro jok Baal.

8Pimeno rwot ociko ni myero kipaa canduk, ci ki gur doge ki woko inyim dogola me Ot pa Rwot. 9Kitito loke oromo i Juda ki Jerucalem ducu, ni myero dano gukel lim ajog pa Rwot kit ma Moses latic pa Lubanga ceng ociko ki jo Icrael ikare ma pud gitye i timi. 10Pi lok meno lutela kacel ki lwak ducu cwinygi obedo yom, ci gucako kelo lim ajog megi, kun giketo i canduk nio ka lim ma gumiyo opongo iye woko. 11Ikare ducu ma Lulevi gikelo canduk bot ludito ma rwot ocimo, kace guneno ni lim tye i canduk madwong, ci karan pa rwot, kacel ki ajwaka madit, gibino gikwanyo lim woko ki i canduk gicito kwede, ka gidwoko canduk kakare i kabedone. Gubedo katimo kitmeno nino ki nino, ci gucoko lim madwong. 12Rwot gin ki Yekoyada gumiyo lim i cing lutic ma giloyo dog tic me Ot pa Rwot, ci kiculu ki lupaa godi ki lupaa bao pi yubu Ot pa Rwot, kiculu kwede bene lutic ki nyonyo ki mola pi yubu Ot pa Rwot. 13Jo ma kimiyogi tic meno botgi gutiyo ticgi matek dok maber ci yubune owoto oyot i cinggi maber atikatika, ci guyubu Ot pa Rwot odoko ber kit mayam con, ki odoko tek kakare. 14Ka dong gutyeko ticgi, ci gukelo lim mudonge bot rwot ki Yekoyada, ka gutiyo ki jami Ot pa Rwot, pi tic mapatpat ki pi gitum awanga, ki atabo me wango odok eceta, ki jami me jabu ki me ryal. Gutyero gitum awanga i Ot pa Rwot jwijwi ikare me kwo pa Yekoyada ducu.

15Ento ka Yekoyada dong otegi, ma otii woko, ci en oto. Ikare ma en to onongo mwakane dong oromo miya acel ki pyere adek. 16Kiyike i gangkal pa Daudi ikin luker, pien en obedo katiyo tic maber i Icrael, kun tiyo pi Lubanga ki pi Ot pa Rwot.

17Lacen inge to pa Yekoyada, rwodi me Juda gubino guryebe inyim rwot, ci gucako ywayo tame wek owinyo lok ma meggi aye ento pe pa Rwot Lubanga. 18Ci gucako bwoto Ot pa Rwot, ma en aye kabedo me woro Lubanga pa kwarigi, ci gin gudok ka woro Acera ma jok ma dakoni, ki cal jogi apayagu. Cut akeca pa Rwot obino ikom jo Juda ki Jerucalem pi bal meno. 19Ento Rwot pud omede ki cwalo lunebine mogo botgi, wek gudwokgi cen bote, ci gutito loke botgi, ento dano gukwero winyone. 202

Ka Cwiny pa Lubanga obino ikom Jekaria wod pa ajwaka Yekoyada ci en ocung inyim lwak ka ocako owaco botgi ni, “Lubanga owaco kuman ni, ‘Pingo wun wukalo wi Cik pa Rwot, miyo pe wulimo gum? Pien dong wutyeko bwoto Rwot Lubangawu woko, ci en bene dong otyeko bwotowu.’” 21Ento gubedo kalibo en, ci gucele ki got pi gin ma rwot ociko, ci guneke idyekal me Ot pa Rwot. 22Rwot Yoaci pe opo pi kica ki pi ber ma Yekoyada won Jekaria yam onyutu ikome, ento dok oneko wode woko. Ikare ma en to, Jekaria owaco ni, “Ber Rwot onen gin ma otimeni, ci ocul kwora!”

23Ikare me tum mwaka meno mony pa jo Ciria obino kalweny ikom Yoaci. Kun gin gubino ikom Juda ki Jerucalem, ci gujwero lutela pa lwak woko ducu ki ikin dano, ka dok gucwalo jamigi ma guyako ducu bot rwot me Damaciko. 24Kadi bed mony pa jo Ciria obino ki jo manok mo, ento Rwot omiyo mony madit pa jo Juda i cinggi, pien onongo gubwoto Rwot Lubanga pa kwarigi. Kitmeno gucobo kop ma Rwot ongolo ikom Yoaci.

25Ka jo Ciria gua woko ki bote, gubwoto en ma dong guketo ret marac tutwal ikome. Ki lutice bene gupiro lok ikome pi culu kwor pi remo pa wod pa ajwaka Yekoyada, ci guneke woko i ot iwi kitandane. Ci en oto kitmeno, ci kiyike i gangkal pa Daudi, ento pe kiyiko en i lyel pa luker. 26Jo ma gujemo ikome gin ene: Jabad wod pa Cimeat ma nya jo Ammon, ki Yekojabad ma wod pa Cimrit nya jo Moab. 27Lok kom lutino awobe pa Yoaci, ki lok mapol ma lunebi guloko ikome, ki lok kom gero Ot pa Lubanga odoco ki tyeko coyone i Buk Lagony Lok ma i Buk pa Luker. Wode Amajia aye oleyo katyene.