2 Tekwaro 25

Amajia rwot me Juda

(2 Luk 14:1-6)

1Amajia ocamo ker ma mwaka me dite tye pyere aryo wiye abic, ci obedo kaloc i Jerucalem pi mwaka pyere aryo wiye abongwen. Nying mine Yekoadan me Jerucalem. 2En obedo katiyo gin manen atir iwang Rwot Lubanga, ento en onongo pe keto iye cwinye ducu. 3Ka kere omoko matek i cinge, ci ocako neko lutice mayam guneko wone ma rwoti. 41Ento pe oneko lutino pa jo ma luneki, kit macalo kicoyo i buk me Cik pa Moses kama yam Rwot ociko ni, “Won latin pe kibineko pi bal pa wode, nyo latin pi bal pa wone; ento dano acel acel kibineke pi bale kikome.

Lweny ikom Edom

(2 Luk 14:7)

5Amajia dok ocoko lwak me Juda, ci oketogi muporo dog odi pa kwarogi ite ludito ma giloyo buca mony pa jo alip ki pa jo miya, pi jo Juda ki jo Benjamin ducu. Okwano jo ma mwaka me ditogi romo pyere aryo dok kwede malo, ci onongo ni jo ma kiyero ma gin twoni oteka lweny giromo alip miya adek, ma kiyerogi ayera ma giromo lweny, ma gingeyo mako tong ki kwot. 6Dok onongo twoni oteka lweny alip miya acel mukene ki bot jo Icrael kun owilogi ki talanta me ryal miya acel. 7Ento lanebi pa Lubanga obino bote owace ni, Rwoda, pe iye mony pa Icrael ocit kwedwu, pien Rwot pe tye ki jo Icrael, en pe tye ki jo Epraim magi ducu. 8Ento ka in itamo ni ibilimo teko me lweny pi lok meno, ci Lubanga bimiyo lumeroki bitayo in woko; pien Lubanga tye ki teko me miyo dano loc ki me weko kitayo dano woko.” 9Amajia ogamo dog lanebi pa Lubanga ni, “Wabitimo ango pi talanta miya acel ma dong atyeko miyone bot mony pa jo Icraeli?” Lanebi pa Lubanga odok iye ni, “Rwot twero miyi lim madwong makato man.” 10Ci Amajia ocako cwalo mony ma oa ki i Epraim gubino boteni, me dok woko cen i pacogi doki. Ci kiniga omakogi matek ikom jo Juda, ci gucako dok i ganggi ki kiniga mager. 11Ento Amajia odiyo cwinye, ci otero lwake, ocito kwedgi wa i nota me Kado, ci oneko jo Ceir ma giromo alip apar. 12Jo Juda gumako jo mukene makwo ma giromo alip apar bene, ci guterogi iwi got ka gucorogi woko piny ki iwi got kunu; gin ducu gupoto gunyot woko. 13Ento lumony me Icrael ma Amajia okwerogi ni pe gucit i lweny kwedgini, ma ocwalogi gudok cen ni, gumonyo gangi me Juda, cake ki i Camaria, nio kwede i Bet-koron, ci guneko jo alip adek ki kunu, dok guyako jami mapol.

14Ka Amajia odwogo ki ka neko jo Edom, okelo ki lwak lubangagu pa jo Ceir, ci ocibogi gucung macalo lubangane, cut en ocako worogi, kun tyero gitum botgi. 15Pimeno kiniga omako Rwot ikom Amajia ci ocwalo lanebi mo bote, ma owace ni, “Pingo icako lubu kor lubangagu me rok mukene, ma pe gutwero laro lwakgi kikome ki i cingini?” 16Ka lanebi ni pud tye kalok kwede rwot openye ni, “Wan waketo in me bedo lami tam pa rwot bo? Tugi ling! Pingo imito ni kineki woko?” Lanebi ocako ling, ento owaco ni, “Angeyo ni Lubanga otyeko yubu me neki woko, pien in itiyo lok man ma pe iwinyo wa tama ma amiyo ki in ni.”

Lweny ikom Icrael

(2 Luk 14:8-20)

17Amajia rwot me Juda dok openyo tam ki bot jo mukene ci ocwalo lukwena bot Yoaci wod pa Yekoakaj, wod pa Yeko, rwot me Icrael, kun wace ni, “Bin wacam co wanene wang ki wang.” 18Yoaci rwot me Icrael odwoko lok bot Amajia rwot me Juda kun waco ni, “Yam okutu mo ma iwi Lebanon ocwalo kwena bot yat cedar me Lebanon, kun waco ni, ‘Miya nyari wek anyom ki woda.’ Ci lee tim mo me Lebanon ma owok ki kunu onyono okutu woko piny. 19In iwaco ni, ‘Dong atyeko neko Edom woko,’ ci cwinyi otingi malo ki wake madwong. Bedo ki deyo meno romi, ci ibed kwede i paconi; pingo irobo dog dano me kelo ayela ikomi, miyo i poto woko i peko in kacel ki lujudaya pi atwom ma iyenyo ikomi kekeni giri.”

20Ento Amajia pe owinyo lok meno; pien onongo Lubanga oyubu ni wek emigi i cing lumerokgi, pien guloke bot lwak lubangagu pa jo Edom. 21Yoaci rwot me Icrael ocito; ci en ki Amajia rwot me Juda gucamo co ci gurwate i lweny ma i Bet-cemec, ma i gang ma i Juda. 22Icrael ocako loyo Juda, ci dano acel acel oringo odok woko i pacone. 23Yoaci rwot me Icrael omako Amajia rwot me Juda wod pa Yekoac, ma wod pa Akajia, ki i Bet-cemec, ka otere wa i Jerucalem, ci omuku cel me Jerucalem maromo yadi miya aryo kulu, nia ki i dogcel ma kilwongo ni pa Epraim nio kwede wa i dogcel ma i twok taun madit. 24En oyako jabu ki ryal ducu ki atabogu ducu ma onongo tye i Ot pa Lubanga, kacel ki jami ducu ma Obed-edom gwoko me tic i Ot pa Rwot; ka dok bene oyako lim ki i ot kano lim pa rwot, kacel ki lwak dano ma en omakogi me akoka, ci odok kwedgi wa i Camaria.

25Amajia wod pa Yoaci rwot me Juda kong dok obedo kwo ki inge to pa Yoaci wod pa Yekoakaj, rwot me Icrael pi mwaka apar wiye abic. 26Lok kom Amajia mudonge ducu, nia i acakine nio i agikine, kityeko coyone i Buk pa Luker me Juda ki Icrael. 27Cake ikare ma en obwoto Rwot woko, jo mogo gucako piro lok ikome ki i Jerucalem, ci en olwi oringo woko i Lakic. Ento gucwalo dano i kore wa i Lakic ci guneke woko ki kunu. 28Ci gukelo kome ki aguragura, ci ki yiko kacel ki kwarine i gangkal pa Daudi.