2 Tekwaro 26

Rwot Ujia me Juda

(2 Luk 14:21-22; 15:1-7)

1Lwak me Juda ducu guyero Ujia, ma mwaka me dite onongo romo apar wiye abicel, ci guketo en me bedo rwot wek ole katyen wone Amajia. 2En aye yam omayo Elot ka dok ogero ci odwoko cen bot jo Juda, ki inge to pa wone rwot Amajia ma dong oywe kacel ki kwarine. 3Ujia ocamo ker ma mwaka me dite onongo tye apar wiye abicel, ci obedo kaloc i Jerucalem pi mwaka pyere abic wiye aryo. Nying mine Yekolia me Jerucalem. 4Obedo katiyo gin manen atir iwang Rwot Lubanga, kun lubu gin ducu mayam wone Amajia otiyo. 5Ikare pa ajwaka madit Jekaria en oketo cwinye me yenyo wang Rwot Lubanga kun tiyo bote, pien Jekaria opwonye kit me lworo Lubanga. Pi kare ducu ma en obedo kaketo cwinye ikom Rwot, Lubanga omiye gum.

6En ocito kalweny ki jo Piliciti, ci oturu cel me Gat woko, ki cel me Jabne ki me Acidod; ka inge meno en ogero taun madito mukene i lobo ma inget Acidod, ki i kabedo mukene matye ikin jo Piliciti. 7Lubanga obedo kakonye ikare me lweny ikom jo Piliciti, ki ikom jo Arab ma gibedo i Gur-baal, ki ikom jo Meun. 8Jo Ammon gubedo kaculu mucoro bot Ujia; ci nyinge oywek o wa iwang lobo Ejipt, pien en onongo dong odoko tek mada. 9Ujia dok ogero odi ma tego kun yubu lubele bene ma ocudu iye malo likung i Jerucalem. Oketo lubele ma ogero acel i dogcel ma itwok gang, acel i dogcel ma cito inota ki acel itwoke mukene; ma kigerogi matek tutwal. 10Ka dok ogero odi matego ma ocudu malo i tim, dok okwinyo lwak wang pii mapol, pien onongo tye ki lee makwo madwong; obedo ki lee makwo wa i Cepela ki i bar bene, dok obedo ki lupur wa jo mapuru olok i lobo godi ki i lobo ducu ma ceko cam, pien en onongo yam maro pur.

11Ujia obedo ki dul monye acikari matye atera ma giromo woto ilweny, i lwak buca mapatpat, kit macalo Jeyel ma karane oryeyo kwede welgi gin ki ladit monye Maaceya, ite loc pa Anania, ma en ngat acel ikin ludito ma giloyo mony pa rwot. 12Wel twoni oteka lweny ducu ma gin ludito kaka i odi pa kwarigi yam onongo romo alip aryo ki miya abicel. 13I te loc pa ludito mony magi onongo tye iye mony maromo jo alip miya adek ki abiro, ki miya abic ma gitwero lweny, ma komgi bene tek kalweny pi konyo rwot ki lweny ikom lumeroke. 14Ujia oyubu lwak kwot mapol pi lumony ducu, ki tongi, ki otangwic, ki koti nyonyo, ki lwak atum, ki lalingling me latangdingo. 15Dok oketo bao me lacel atero i Jerucalem ma luryekone guroto, wek kiketgi iwi odi matego ma ocudu malo itwok cel kama lubele kiyubu iye ducu, pi celo atero ki pi bayo lakidi ma ditogu. Nyinge oywek oromo i lobo ducu, pien Lubanga obedo kakonye i yo me aura, nio ka en odoko tek.

16Ento kadi bed en obedo dano matek, en dok oloke obedo lawake, ci man okelo can ikome kene. Pien en ocayo dog Rwot Lubangane; ci en oete odonyo i Ot pa Rwot kawango odok eceta i keno tyer me wango odok eceta. 17Ento ajwaka Ajaria olubu kore cut kun odonyo bote, kacel ki ajwaki pyere aboro ma gin twoni matego ki gin bene pe gin lulworo. 181Ci gucung gupyem ki rwot Ujia kun giwaco bote ni, “Man pe tici, me wango odok eceta bot Rwot, man tic pa ajwaki ma gin likwayo pa Aron, mayam kikwerogi me wango odok eceta. A i kat woko ki i Kabedo Maleng; pien ityeko timo bal, pe dok ibinongo iye deyo mo ma a ki bot Rwot Lubanga.” 19Cutcut kiniga omako Ujia woko matek ikom ajwaki, ma onongo en pud tye ki atabo weer me wango odok eceta i cinge. Ci dobo opoto ikome cut ma ajwaki bene gineno ma onongo pud gitye i Ot pa Rwot, i kanget keno tyer me odok eceta. 20Ajaria ajwaka madit, ki ajwaki ducu ka guneno en, ci gunongo ni dobo tye i tur nyime! Ci guruyu cwale woko cen oyotoyot, en bene orune me cito woko, pien Rwot otyeko pwode. 21Rwot Ujia obedo ladobo nio wa inino me tone; pi bedo ladobo omiyo kipoke obedo i ot kakene, pien pe kiye ni en odony i Ot pa Rwot. Yocam ma wode aye obedo ladit maloyo jo me ot pa rwot, kun loyo kwede bene lwak me lobo meno.

22Lok kom Ujia mudonge ducu, nia i acakine nio i agikine, lanebi Icaya ma wod pa Amoj aye ocoyo. 232Ujia oto, ci en oywe kacel ki kwarine, ci kiyike kacel ki kwarine i kabedogi me yik kama yam kiyiko iye luker, kun guwaco ni, “En ladobo.” Wode Yocam aye oleyo katyene.