2 Tekwaro 6

Solomon oloko ki lwak

(1 Luk 8:12-21)

1Inino meno Solomon owaco ni,

“Rwot in ityeko waco ni in ibibedo i pol macol woko licuc. 2Kombedi dong atyeko geri Ot ma ocudu malo likung, wek obed kabedoni ma koni ibedo iye matwal.”

3Ka dok rwot Solomon oloke, ci olamo gum ikom lwak jo Icrael ma gucoke ducu, kun jo Icrael ma gucokeni gucung mot laling. 41En ocako lok botgi kuman ni. “Kipak Rwot, Lubanga pa Icrael, ma dong cinge otyeko cobo gin ma en oloko ki doge bot wora Daudini, kun waco ni, 5‘Nia wa ikare ma akwanyo kede jona jo Icrael ki i Ejipt, an onongo peya ayero gang mo ma i kaka me Icrael pi gero iye ot mo, wek kiwora iye. Dok pe ayero laker mo me loyo jona jo Icrael; 6ento dong koni atyeko yero Jerucalem wek nyinga obed kenyo, ka dok ayero Daudi me bedo lalo lwaka jo Icrael.’

7I karenu onongo wora Daudi obedo ki tam i cwinye me gero ot pi woro nying Rwot, Lubanga pa Icrael. 8Ento Rwot aye owaco bot wora Daudi ni, ‘Kit macalo onongo dong tam tye i cwinyi me gero ot pi woro nyinga, itimo giri maber pi keto lok meno i cwinyi. 9Ento pe in aye dok ibigera ot, ento wodi ma ibinywalo en aye bigero ot pi woro nyinga.’

10Ikareni, Rwot dong otyeko cobo gin ma en ociko i cikene; pien an dong atyeko leyo katyen wora Daudi, dong atyeko bedo iwi komker pa Icrael, kit mayam Rwot ocikoni, dok bene atyeko gero ot pi woro nying Rwot Lubanga pa Icrael. 11Dong atyeko keto iye kabedo pa Canduk me Gicike pa Rwot, matye iye cike ma Rwot con oketo ki jo Icrael.”

Lega pa Solomon

(1 Luk 8:22-53)

12Solomon dok ocung inyim keno tyer pa Rwot ki inyim lwak jo Icrael ducu ma gucoke, ka ocako tango cinge aryo ducu malo. 13Solomon onongo otiyo abam mola ma bore puti abiro ki nucu, ki lace puti abiro ki nucu, ki bore nia piny dok malo puti angwen ki nucu, ci ocibo idyekal; en ocung i wiye. Ka dok orumu conge piny inyim lwak jo Icrael ducu ma gucoke, ka dong ocako tango cinge aryo ducu malo kun okemo polo, 14kun waco ni, “Ai Rwot, Lubanga pa Icrael, pe tye lubanga mo macalo in, kadi malo i polo nyo piny iwi lobo, matye kagwoko gicikene macalo in, ma i nyutu mar meri ma pe loke bot lutici ma bedo ka lubi ki cwinygi ducu. 15Ibedo kalubu kit gin mayam iciko bot wora Daudi, eyo, gin mayam iloko ki dogi, icako dong tiyone ikare man ki tekoni, ci icobo ducu maber. 162 Kombedi ai Rwot, Lubanga pa Icrael, dong ilub gin mayam iciko ki latici wora Daudi, kun iwaco ni, ‘Pe ibibedo labongo danoni mo inyima ma bibedo iwi komker pa Icrael, teke awobeni gugwoko kitgi maber, kun gilubu cik mera kit macalo ibedo kwede i nyimani.’ 17Ai Rwot, Lubanga pa Icrael, kombedi mii loki dong omok matek, kit ma ceng iloko ki wora Daudi ma latici. 183

Ento Lubanga in ibibedo iwi loboni kacel ki dano ada? Nen, kadi wa polo bene kulu manen malo tutwali pe romo in me bedo iye, ci ot man matidi ma ageroni rom mene kono wek in ibed iye! 19Dong icik iti kawinyo legana ma an latici atye kalego inyimi tin, ki kit ma abako kwede doga, ai Rwot Lubangana, dong iwiny koko ki lega ma atye kalegone inyimi tin; 204wek wangi obed twolo kun ineno Ot man dyeceng ki dyewor, en aye kabedo mayam iwaco pire ni ibiketo iye nyingi wek kiwori iye, kun iwinyo legana ma akelo boti ka aloke akemo kabedo man atir. 21Dok ibed kawinyo bako dog latici ki pa joni jo Icrael, ikare ducu ka walegi kun wakemo kabedo man atir. Eyo, in dong ibed kawinyone ki i polo kama ibedo iyeni; ci ka dong ityeko winyone, dong iwek balwa.

22Kace dano mo otimo bal ikom wadi mo, ci kimiye okwongo kwong mo pire, ka obino ce okwongo kwonge ki inyim keno tyeri ma i Ot man, 23ci in Lubanga iwinye ki i polo, iket i tic lok man me ngol kop pa laticini, imii kop oloo dano ma tingo alii, kun iketo gin ma en otimo iwiye kene, dok imii dano ma pe obalo oloo kop, kun itime ber muporo lengcwinye.

24Kace mony pa lumerok guloyo joni jo Icrael pi balgi ma gutimo ikomi, kace gungut kun gudwogo boti, ci gucako tucu nyingi, ma gilego in ka gibako doggi boti ki i Ot man, 25ci in ber dong iwinygi ki i poloni ai Rwot, ci iwek bal pa joni jo Icrael. Ka dok idwokgi cen wa i lobo mayam imiyo bot kwarigi.

26Kace polo ocege woko, ma kot mo pe ocwer pi lakit balgi mo ikomi, kace lwaki gucako lega kun gukemo kabedo man, kun gitucu nyingi, dok gungut ikom balgi ci gubwoto balgini woko, ki dok nyo ikare ma iketo can malit ikomgini, 27ci ber in Lubanga i winygi ki i polo, iwek bal pa lutici, gin joni jo Icrael, dok bene i pwonygi ki yo maber ma myero gulub; ci dong imii kot ocwer i lobonini mayam imiyo bot lwaki ni obed meggi.

28Kace kec opoto i lobo, nyo ka two gemo opoto, nyo ka cam apita obware nyo odoko ocone, nyo ka bonyo opoto nyo okwil obino, nyo kace merokgi orumugi i gangigi mogo, nyo kadi bed kit gemo ango, nyo kit two moni obino i lobogi, 29kace lwaki gucako lega nyo bako doggi, kadi bed dano acel kok boti, nyo joni jo Icrael ducu, kun dano acel acel gire ngeyo maber kit atwom mere kene, ki kwayi cwercwinye kene bene, ki kace dong otango cinge kun okemo ki otti man; 30ci in Lubanga ber dong iwinygi ki i polo kama ibedo iyeni, ci iwek balgi. Tim dano acel acel kit ma ingeyo kwede cwinye, ma rwate bene ki kit kwone ducu, pien in keni aye ingeyo kit cwiny matye i dano ducu; 31meno bimiyo gibedo kalworo in kun gilubu yo meri nino ducu kama gibedo iye, i lobo mayam imiyo bot kwarigi.

32Wek obed kitmeno bene kace larok mo, ma pe joni jo Icrael, obino kany ma oa ki i lobo mo ma bor, ma obino pi nyingi ma diti, ki badi ma teki, ki bene pi cingi ma i ryeyo, kace laroki obino ce ocako legane ma okemo Ot man, 33ci in Lubanga iwinye ki i polo kama ibedo iyeni, i tim kit gin ducu ma larok meno okok iye kwede inyimi, wek rok me wi lobo ducu gunge nyingi, ci gucak lwori, kit ma iweko lwaki jo Icrael gilworini, dok iwek gunge maber ni, Ot man ma ageroni kilwongo ki nyingi keken.

34Kace lwaki gucito kalweny ikom lumerokgi i kabedo mo ducu ma icwalogi iye, kace gukelo legagi boti ma kun gukemo taun madit man ma in iyero, ki Ot man ma agero pi nyingini, 35ci in iwiny legagi ki bako doggi ki i polo. Ci ikony korgi macalo ineno ni lokgi tye atir.

36Dok kace gutimo bal ikomi, pien pe tye dano mo ma pe balo, ci kace kiniga omaki ikomgi, ci imiyogi i cing lamerok mo ma oyakogi ci oterogi i opii wa i lobo mo kamabor nyo kamacok; 37ento ka ki i lobo ma kiterogi iye i opiini cwinygi otur ikare ma gutamo pi lok meri maleng, ce gungut iye ci gubako doggi boti ki i lobo ma gitye iye i opiini, kun gikok ni, ‘Wabalo, watyeko ngak woko ata, watiyo lwak balgu mapol inyimi,’ 38ci kace gutyeko ngut ada ki tamgi ducu ki cwinygi ducu, wa ki i lobo kama kiterogi iye i opiini, ka dong gulego inyimi kun gukemo lobogi, mayam imiyo bot kwarigini, ki gang man ma nene iyero me keto iye nyingi wek ki wori, ki Ot man ma atyeko gerone pi nyingi malengi, 39ci in Lubanga dong iwiny legagi ki bako doggi ki i polo kama ibedo iyeni, ci iye konyo korgi kit ma ineno ni ber. Ka dok iwek bal pa joni ma gubalo ikomi.

40Ai Lubanga, kombedi dong iwek wangi obed twolo ci icik iti iwiny lega ma kilego i kabedo man. 415

A malo, ai Rwot Lubanga, ci idony i kabedo me yweyoni,

in ki Canduk me Gicike, ma en aye lanyut me teki.

Ai Rwot Lubanga, wek ajwakini guruke ki lare,

wek joni maleng cwinygi obed yom pi beri.

42Ai Rwot Lubanga, pe ikwer lega pa lakeri ma kiwiro!

Po pi mar meri ma pe loke ikom latici Daudi.”