2 Tekwaro 4

Jami ma kitiyo pi Ot pa Lubanga

(1 Luk 7:23-51)

1Solomon1otiyo keno tyer me mola ma bore romo puti pyere adek, ki lace bene puti pyere adek; bore ma dok malo romo puti apar wiye abic. 2Ka dok otiyo nam me mola ma kiliyo ma otwode adunu, ma lace romo puti apar wiye abic, nia idoge tungcel nio idoge tungcel; bore tung malo oromo puti abiro ki nucu. Kipimo doge ki tol ci oromo puti pyere angwen wiye abic. 3Ki i tere piny tye iye cal keno munyak ma orumu kom lagwok pii ducu, ma bore tye puti pyere angwen wiye abic; cal keno magi kiryeyogi latyeng aryo. Ikare ma kitiyo lagwok pii, kitiyo ki cal keno ikome lawangacel. 4Ci kicibo lagwok pii ocung iwi cal twoni dyangi apar wiye aryo; kiketo adek gineno tung kumalo, adek gineno tung kupotoceng, adek gineno tung kupiny, ki adek gineno tung kunyango. Kicibo lagwok pii ocung inge twoninu, kun ngegi ducu odok tung iye. 5Kome kinong maromo incic adek; ki doge bene calo dog kikopo, marom ki cal ature lenga, piine romo lita pyere abicel. 62Ka dok otiyo otako apar me lwok, oketo abic tung kupiny ki abic tung kumalo. Magi obedo me lako jami ducu ma kitiyo kwedgi pi gitum awanga, ki lagwok pii kiketo me lwok pa ajwaki. 734

Dok otiyo lacib mac me jabu apar kit ma kiciko ni oketogi i Ot pa Lubanga; ci oketo abic tung kupiny ki abic yo tung kumalo. 8En dok otiyo meja apar, ci oketogi i Ot pa Lubanga, abic tung kupiny ki abic tung kumalo. Dok otiyo becen me jabu miya acel. 9Ka dok oyubu dyekal pa ajwaki, ki dyekal ma dite, ki kika me dyekal, ci omwono kom kika ducu ki mola; 10ka oketo lagwok pii i twok Ot ikine me tung kupiny ki tung kunyango.

11Kuram ocweyo agulu mapol bene, ki akwaya, ki becengu. Kitmeno Kuram otyeko tic ikom Ot pa Lubanga kit ma rwot Solomon ociko pire. 12Kuram gutiyo jami magi: wir aryo, ki lalukana aryo ma olunge macalo agulu ma kiketo iwi wir, ki obwo aryo me umu kom lalukana aryo ma olunge ma obedo iwi wiri. 13Dok otiyo cal okwer pomegranat miya angwen pi obwo aryonu, kun cal pomegranat kiryeyo latyeng aryo ikom obwo acel acel me umu kom lalukana aryo ma olunge ma obedo iwi wir. 14Kuram bene otiyo lutino gadigadi apar, ki otako mola apar ma kilutu i lutino gadigadi, 15ki lagwok pii acel, ki cal twoni dyangi apar wiye aryo ma ite lagwok pii. 16Lwak agulu ki akwaya latokegu, ki gin lacob ringo, ki jami ducu ma mite pi tic ki jami magi ma Kuram-abi otiyogi pi Ot pa Rwot Lubanga ki pi rwot Solomon obedo me mola ma kililo maleng. 17Solomon omiyo kiliyo mola meno i pwor kulu Jordan, kama lobo agulu tye iye, ikin Cukot ki Jereda. 18Solomon otimo lwak jaminu madwong tutwal, mapek me nyonyo bronze meno pe tye ngat mo ma okwano.

19Solomon otiyo jami ducu matye i Ot pa Lubanga kit man: keno tyer me jabu, ki lwak meja ma kicano iye mugati ma kiketo inyim Rwot, 20lacib mac ki lwak laputgi me jabu ma kiliyo maber, ma myero gubed kilyel i Kabedo Maleng Makato ducu, kit ma kicikoni; 21ki lwak cal ature, ki laputgu, ki boyi lakar mac, ducu me jabu ma kiliyo maber makato. 22Magacgu, becengu, atabo me odok eceta, ki weer me wango mac otiyogi ki jabu ma kiliyo maber; ki pata me Ot pa Lubanga ma kiketo ikom kika me Kabedo Maleng Makato ducu, ki i kika me kicika ma dite bene, gubedo me jabu.